Jeremia 32 - mzwDBL

Jeremia harɛ bɛl yawa wa

¹ Korowii bol waa men Jeremia be ɡɛ saŋ Juda Kooro Sedekia aa di kora bene fi ta, dɛ ɡɛ saŋ Babelɔn Kooro Nebukadnesa ɡe di kora bene fi dɛ anuatoro.

² Dɛ Babelɔn kooro laa tena baa bar Jerusalam cheme ɡɛ saŋ, dɛ laɡ mɛ do dea, n do Juda tena koodem dembaah, bela nɛra baa dɛ daah kooro aa lole.

³ Juda Kooro Sedekia laɡ mɛ do dea kɛŋɔ maa ŋɔa ŋɔ Korowii ŋɔ, “N dɛ ba ɡela Babelɔn kooro ba yo bwɛjen nɔ tena, dɛ́ laɡ ba.

⁴ Kooro Sedekia aa won chwa. Baa lawɔɔ ka tɛ Babelɔn kooro, ásɛ o ne o sie ɡba dɔŋa ba bol wa.

⁵ Baa lawɔɔ kaa Babelɔn, o do bela ka tel kɛŋɔ maa nyiŋi o waa bini tonɛ. Hale o yo Babelɔn tena kwaraa naa, aa on kɛrɛdɛɛ chiɡ. Men Korowiirii bola.”

⁶ Korowii bol waa men Jeremia be ŋɔ,

⁷ “He mɛɛ nime Hanamɛl waa ɛ Salum bibaa la ɛɛ ba he bee dɛ́ ba soŋe, hé yawɛ o koo waa lɔ Anatɔt Bɛnjamen harɛ ta. Dɛkalkɛ henee ɛ o lole tenten dɛ dɔ ŋwɛnɛ kɛ he yawɛ harɛ la.”

⁸ Belaa Hanamɛl ba n be dembaah bela, dɛ ba ŋɔ n be ŋɔ ń yawɛ harɛ la ɡɛ Korowii aa bola la. Anee ɡela n jemɛ kɛŋɔ Korowiirii bol waa n be kpela.

⁹ N yawɛ harɛ la le Hanamɛl be dɛ bɔ suuɡa aa chɛa la tɛo, a tɔɡre ɛɛ ɛ suuɡapoŋa fi dɛ anuanɛɛ.

¹⁰ N sɛoh dɛ chwerɛ tɔn la, dɛ kpɔ nɔn ɛɡɛ o ta, o che tɛ n ne o fɔo la, asɛ nomɛl di danseɛ asɛ n maɡɛ suuɡapoŋa aa chɛa kɛŋɔ n kpɔ bɔ kem la.

¹¹ Belaa n kpɔ tɔne anɛ aa dɛ baɡle kɛ n yawɛ harɛ la, ne a wobɛlbwa aa jaa dɛ do tɔn la bini, onɔ la baa marɛ a nyoa ne onɔ la baa wola o nyoa marɛ,

¹² dɛ kpɔa tɛ Nɛrea bibaa Baruk, o nabaa sɔne Maseeya. Hanamɛl ne danseɛ tena baa jaa dɛ ɛɡre ba nɔɔra la, dɛ Juda tena baa soɡe dembaah bela la bwa la siwi ta.

¹³ Ba bwa siwi ta bela la, n ŋɔ Baruk be ŋɔ,

¹⁴ “Koranar Bwa Kooro, Israel tena aa dɛ tomɔ laanee doe ŋɔ he lɛ tɔn baa marɛ o nyoa, ne onɔ la baa wola o nyoa marɛ la bwa, dɛ́ kpɔa do leo bini ásɛ a won biɡri.

¹⁵ Koranar Bwa Kooro, Israel tena aa dɛ tomɔ la bolɔ ŋɔ, ‘Baa berɔ yawɛ deene ne kooni dɛ daa kooni he harɛ nɔ ta ja.’ ”

Jeremia wesoŋa

¹⁶ Maa kpɔ danseɛ tɔn la tɛ Baruk habɔɔ la, n soŋe Korowii ŋɔ,

¹⁷ “Nemenɛ Korowii, henee cheɡɛ he kpeɡri kohona ta dɛ ta nyundua ne harɛ. Wobɛlbwa aa kpeɡe tɛɛ.

¹⁸ He baɡle he nyina nɛra kaɡboŋa nɛ, kɛ he berɔ dɛɛ tɛr nɛra deŋne ba mɛɛnanar wechɔɡa baa ɛa wa. He kan dɛ do kpeɡri, henee Koranar Bwa Kooro.

¹⁹ He dɛ vɔrɔwe vɔrɔwa aa wera dɛɛ ɛ wejena. He sie lɔ wobɛlbwa nɛn aa dɛ ɛ ta, dɛɛ bɔ ba kem ɡɛ bɛlbwa we-ɛɛla aa doa.

²⁰ A saŋ la, he ɛ nyokpowaa Ijipt harɛ ta, he ta teŋɔ dɛɛ ɛa dɛ ba le fini. Israel ne harɛre nɛra bwa bini, a ɡel nomɛlbwa jemɛ he waa bobɛlbwa.

²¹ He cheɡɛ wejena ne nyokpowe-ɛɛla ta, dɛ kpɔ ɔmee kohona ta ya dɔma nɛ, dɛ che he kpeɡri ta lawɛ he nɛra Israel tena le Ijipt harɛ ta.

²² He kpɔ harɛpare ondɛɛɡe waa do ken nɔ tɛɛ ba, ɡɛ he fa aa baɡɛ ba naawa nyoa la.

²³ Kɛ baa bala dɛ ba so o ta la, ba vɛh he Mmarare la, ba ta waa haa do ba a ta kɛɛ waa haa baɡ ba la ta teŋɛ. A waa he kpɔ wenaale nɔ bwa ba ta ba nɛɛ la.

²⁴ Babelɔn tena ma kwaa baa che a ta dɛ́ jo bwɛjen la bini bar o bwa, dɛ́ yoo ba dɛ́ pɔ ba nɛ. Hale ba pa mun kwara. Laa ne lɔr dɛ weela ɛɛ ɡeloo bá pɔ ba nɛɛ warane. He ɡbabir nao kɛŋɔ waa haa bola la ɛ ɡɛ.

²⁵ A lole kɛŋɔ a ka tama Babelɔn tena ba yo dɛ lawɛ yaa kaa. Kɛ ane a bwa, Nemenɛ Korowii, henee do mɛ ŋɔ ń yawɛ harɛ la nɛra baa di danseɛ la siwi ta.”

²⁶ Belaa Korowii ŋɔ men Jeremia be ŋɔ,

²⁷ “Menee Korowii maa dɛ di kora harɛ nɔ nɛra bwa nɛ, wobɛlbwa toole dɛ do kpeɡri tɛ mɛ.

²⁸ N dɛ ba bwɛjen nɔ kpɔe do Babelɔn Kooro Nebukadnesa ne o laa tena nɔn ta, ásɛ ba yoo dɛ́ pɔ o nɛra nɛ,

²⁹ ásɛ dɛ fuh o bwa. Baa fuh bwɛjen la bwaa, ne nɛra baa fuh daawiile dɛɛ tɛ voɡ Baal ba sal deene dor, ne sen sarahare baa fuɡa dɛɛ tɛ voɡare ane dɛ kpɔ dɛɛ muɡli n baah la.

³⁰ Israel ne Juda tena ta wobɛlbwa ɛɛ ka ja wechɔɡa baa ɛa dɛ le ba bechale saŋ n sie. Kasinteŋ, kwaa ba ɡbaɡba aa ɛa nɔɔra nee ba kpɔ muɡli n baah.

³¹ Nɛra baa lɔ bwɛjen nɔ ta ir n bwaawee dɛ ɡel n baah di kohona le awola baa vɔrɔwo. N ɛ n liire kɛ n chɔɡo,

³² Juda ne Israel tena wechɔɡa baa ɛa la wa, ba ne ba koranar ne nomonome dɛ n sɔfore dɛ n keamere la bwa.

³³ Ba berɛ habɔɔ kpo mɛ, a lole kɛŋɔ n teŋɔ dɛɛ baɡ ba n waa la, kɛ baa deŋne cheɡ dɛ́ no n be, ásɛ dɛ hweli.

³⁴ Hale ba kpɔ voɡa maa kia la ba cheɡ n Dea maa ŋɔa baa tom mɛ o bini la ta, dɛ kpɔ doŋa kaoh.

³⁵ Ba ma kwaa baa ɛ sarahare a ta tɛ voɡ Baal deŋɡarere dor. Ba kpoo ba bibaala ne bihaahna ɡe dɛɛ tɛ voɡ Molɛk Henɔm Fɛlembɔjen ta. N ta ban doe ŋɔ ba ɛ ɡɛ waa nɔ, a toole n liire ta kwaraa ŋɔ baa ɛ ɡɛ waa nɔɔ, a che a ta Juda tena ɛ wechɔɡa.”

³⁶ Korowii Israel tena aa dɛ tomɔ ŋɔ n be ŋɔ, “Jeremia, nɛra nɔ dɛ bol ŋɔ laa ne lɔr dɛ weechɔɡa ɛɛ ɡeloo Babelɔn kooro ba yo yaa, dɛ́ pɔ ya nɛ, ásɛ ya do o lɔɡa. Berɛ no waa maa dɔa dɛ́ bol ja,

³⁷ ‘N dɛ ba nɛra maa cheɡɛ n bandia kohona ta dɛ lɔ ba peɡre harɛre bwa ta la nyoa boara, mɛɛ berɔ ba ba bwa ne bonɔ, dɛ́ ɡel ba so deŋnesɔɔhna ta.

³⁸ Baa ɛ n nɛraa, ásɛ n ɡe ɛ Korowii baa dɛ tom mɛ.

³⁹ Webeŋkpoŋ ɡboo mɛɛ ba kpɔe tɛɛ ba ba soɡa bini, a chɛ kɛ baa tɛ mɛ duure saŋ bɛlbwa, ba naanar ne ba ɡbaɡba wer doe wa.

⁴⁰ N ne baa fɔwɛ fɔwee ó chɔ le saŋ bɛlbwa dɛɛ la. Maa wedɛɛɡa maa ɛɛ ba ɡel bwa, mɛɛ kpɔ n ɔmaa do ba bini, ásɛ ba bɛ habɔɔ berɛ kpo mɛ kpa.

⁴¹ N sie ɛɛ lɛo kɛŋɔ mɛɛ ɛɛ ba wedɛɛɡaa, dɛ́ ɡel ba so harɛ nɔ ta saŋ bɛlbwa dɛɛ la.

⁴² Gɛ maa kpɔ wenaale ba ta nɛra nɔ nɛɛ nɔ, ɡɛ tentenee mɛɛ ba wedɛɛɡa ɡe ne bala ba tɛɛ ba, ɡɛ maa baɡ ba nyoa la.

⁴³ Ba dɛ bol ŋɔ harɛ nɔ ɛɛ doo kɛŋɔ pua hɛŋle ɡbo harɛ, ásɛ nɛra kɛɛ kpɔɡ bini ola aa wola won so o ta, ásɛ ba kpɔ do Babelɔn tena nɔn ta. Kɛ baa berɔ yawɛ kooni bonɔ ja.

⁴⁴ Nɛra ɛɛ yawaa, ásɛ ba ɛ a tɔne dɛ́ ɛɡre nɔɔra dɛ́ lɛa do, ásɛ nɛra di a danseɛ. A ɡɛ waa nɔ, Bɛnjamen dea harɛ ne bwɛɛre aa bar Jerusalam ne Juda harɛ ta dɛ deŋɡarere harɛ bwɛɛre, ne Juda bwejena lɔɡre bwɛɛre bwa, dɛ́ kpoŋe kaa Nɛɡɛv waa ɛ pua hɛŋle ɡbo harɛ taa aa ba chiɡa. Mɛɛ laɡ baa ba ba harɛ ta. Men Korowiirii bola.’ ”