Jeremia 30 - mzwDBL

Korowii berɔ lɛ o nɛra Israel tena

¹ Waa Korowii Israel tena aa dɛ tomɔ,

² ŋɔ men Jeremia be ŋɔ, “Chwerɛ waa maa bol he be la bwa do tɔn bini.

³ Tɔpera ane dɛ ba, ásɛ n lawɛ n nɛra Israel ne Juda tena le harɛfala ta, dɛ́ berɛ kpɔ ba ba harɛ maa kpɔa tɛ ba naawa ŋɔ ba konee la ta. Men Korowiirii bola.”

⁴ Waa Korowii aa bol n be, Israel ne Juda tena wa laanee nɔ.

⁵ “N no lɔŋɔ waa do ɔma kohona, hundam chole bobɛlbwa, deŋnesɔɔhna aa wola toole bela.

⁶ Hé pɛɛ no! Baa lɛɛ won kpoŋe tea dɛ́ lolɛ bie aa? Aah ɛrɛɛ mɛɛ na baala ba bwara aa kpeɡa, ba nɔɔra dawɛ ba teene ta kɛŋɔ haah loltea aa lɔɔ nɔɔ? Nomɛlbwa siebɔr ɡwaŋɔ kohona.

⁷ Tɔpechɔɡe bɛl dɛ ba, baa won kpɔ tɔpere bɛlbwa maɡɔ. Wɛɛ ɛ suna dii tɔperee tɛ Jekɔb naanar, kɛ ane a bwa, baa le a nyoaa.”

⁸ Koranar Bwa Kooro ŋɔ, “Awola tɔpere la, mɛɛ kuuɡi kon waa do kɛŋɔ da, ba yon kpɔ dawɛ nae nɛɛ aa parɛ, ba kpɔ dawɛ Jekɔb naanar baŋa ta laanee, dɛ́ kuuɡi jɔɡrɔre la ɡe bwa. Ásɛ nɛŋhɔɔhra aa won dɛɛ fiɡ ba kpa.

⁹ Baa tomɛ men Korowii baa dɛ tom mɛ laanee, ne Kooro Devid naa maa leo tɛɛ ba, wɛɛ di kora ba nɛɛ la.

¹⁰ Anomanta, n nɛra, he bɛ ɔmɛ, Israel tena, he bɛ ɡel he bambile chɔɡ. Mɛɛ lɛ heyaa le bojaŋ harɛre taa ba, he naanar baa laɡ ba kaa bojaŋ harɛfale ta la. Ásɛ he berɛ dɔ deŋnesɔɔhna ne bosɔɔhna, nomɛlbwa aa heyaa aah kpa.

¹¹ Mɛɛ ja he nɛɛ, ásɛ dɛ lɛ heya. Mɛɛ chɔɡ harɛre nɛra maa lɔ heyaa peɡre ba bini bwaa, kɛ he te, maa den chɔɡ heyaa kwaraa. Mɛɛ tɛr he deŋnee, kɛ mɛɛ sune he nɛɛ dɛ́ nyiŋi heya kɛrɛdɛ. Men Korowiirii bola.”

¹² Korowii berɔ bol waa o nɛra be ŋɔ, “He ŋwɛra aa won tonɛ, he bola haa dɔa bwa ɡe haa chaeh dɔ.

¹³ Nomɛlbwa toole dɛ́ nyiŋi he nɛ, tɛɛɡa toole dɛ́ chah he ŋwɛra, hwɛɡa bɛlbwa toole kɛ baa chah heyaa.

¹⁴ He daamanar bwa soh he wa, bɛlbwa toole dɛɛ nyiŋi heyaa kɛrɛdɛ kpa. N baa yo heya kɛ he dɔm, dɛ tɛr he deŋne kohona, dɛkalkɛ he wechɔɡa ne he nyubinikpeɡ kan kɛrɛdɛ.

¹⁵ He bɛ bola baa do he yaa la waa dɛɛ wi, baa won chah heya. He wechɔɡa ne he nyubinikpeɡ kan kohona, a waa n tɛr he deŋne.

¹⁶ Kɛ taraken, nomɛlbwa waa dɛ nyin he chɔɡa la mɛɛ chɔɡoo, ásɛ ba lawɛ he dɔma bwa kaa harɛfala ta. Nɛra baa dɛ fiiɡi heya la, baa fiiɡi ba ɡee, ba pa he laala kaa laa, baa pa ba ɡe laalaa.

¹⁷ Kɛ mɛɛ berɔ ɡel he dɔ bokpeɡa ásɛ dɛ chah he ŋwɛra, a lole kɛŋɔ he dɔma dɛ bol kɛŋɔ, ‘Ba vɛh Saayɔn, nomɛlbwa aa o waa dawɛ kpa.’ Men Korowiirii bola.”

¹⁸ Korowii ŋɔ, “Mɛɛ berɔ lawɛ n nɛra ba ba harɛ ta, dɛ́ dɔ tedoma tɛ bɛlbwa ne o lolanar. Baa berɔ kwaa ma Jerusalam, dɛ́ kwaa o koodem la cheɡ o buɡ ta.

¹⁹ Nɛra baa soɡe bela ɛɛ ɡo kpɛɛra yelaa, dɛ́ do lɔŋɔre dɛɛ hɛɡre. Mɛɛ swee ba andɛɛɡaa, dɛ́ ɡel ba mun ya, ásɛ dɛ dɔ duure.

²⁰ Ba bii ɛɛ berɔ do kɛ saŋ la ken, ásɛ n lawɛ harɛ la nɛra ba che kiŋkiŋ n sie, dɛ́ tɛr nomɛlbwa waa fiɡ ba la deŋne.

²¹ Ba ɡbaɡba binii ba sitɔɔ waa ɛ ba kooro ɛɛ ba lee. Mɛɛ lawɛ ɡɛ nɛn laanee ba n be ó bɛn mɛ. Umee dɛ́ won ba n be dɛ n laa ta nɔn yerɔ wɔ? Men Korowiirii bola.

²² Gɛɛ hɛɛ ba n nɛra ɛɛ, ásɛ n ɡe ɛ Korowii haa dɛɛ tom mɛ.”

²³ Hé na, Korowii bandia do kɛŋɔ peukpeɡ, dɛ́ ta kpɔ nyubinikpeɡ tena nyuune ta.

²⁴ Korowii bandia waa do ɔma la nyoa aa won sɔɔh, atane o tonɛ o bambile bini wa. Tɔpera ane ta dɛ ba mɔɔ, ásɛ n nɛra won no waa nɔ mun.