Jeremia 29 - mzwDBL

Jeremia tɔn waa chwera ka tɛ Juu tena Babelɔn

¹ Kenii tɔn men Korowii keame Jeremia aa chwera le Jerusalam, ka tɛ nomonome baa kaa dɛ ja nɛra baa laɡ ba kaa la, ne sɔfore ne Korowii keamere, dɛ nɛra baa jaa Kooro Nebukadnesa aa laɡ ba le Jerusalam dɛ kaa ba ne Babelɔn la bini waa do.

² N chwerɛ tɔn nɔ ɡɛ saŋ baa lawɛ Kooro Jehoiachin ne o nya ne koodem nomonome, ne Juda ne Jerusalam nomonome, ne nɛra baa dɔ kwaa sɛɛh wejema, dɛ banɔ la baa dɔ kwaa bwa soo siwi ɛɛ wejema laa ta kaa harɛfale ta la.

³ Men Jeremia kpɔ tɔn maa chwera la do Safan bibaa Elasa ne Hilkia bibaa Gemaria, Juda Kooro Sedekia aa laɡ ba tɛ Babelɔn Kooro Nebukadnesa la nɔn ta. O bini waa nɔ,

⁴ “Waa Koranar Bwa Kooro, Israel tena aa dɛ tomɔ aa dɛ bol nɛra baa laɡ ba laa ta le Jerusalam kaa Babelɔn laanee nɔ.

⁵ ‘Hé ma deene dɛ́ so a bini, ásɛ dɛ parɛ bodɛɛɡa dɛ́ du daa dɛɛ di a ta.

⁶ Hé mo haahna dɛ́ loɡle bibaala ne bihaahna, dɛ́ nyin haahna tɛ he bibaala ɡe, ásɛ dɛ kpɔ he bihaahna ɡe tɛ yal, ɡɛ aa ɛ ásɛ ba ɡe dɔ bibaala ne bihaahna. Hé ɡel he mun ya kohona bela, dɛ bɛ mule.

⁷ Hɛ́ɛ nyin wedɛɛɡa ne waa aa ɡel he soɡa bini do wer, bwɛjena maa ɡela ba lawɛ heyaa ka so a ta la ta. Hé che ba naa ta soŋe le n be dɛɛ tɛɛ ba, dɛkalkɛ dɛ ba wobɛlbwa wer dɛɛ tɛɛ ba, ba nɔn bini do wer aa, anee dɛ́ ɡel he ɡe nɔn bini do wer.

⁸ Men Koranar Bwa Kooro, Israel tena aa dɛ tom mɛ dɛ́ kah heyaa ásɛ he bɛ ɡel keame nyosonteŋna ne voɡra baa soɡe he bini la ɛɛ neɡre heya. He bɛ wepila baa ŋɔa ba dɛ na la yarada.

⁹ Nyosonee ba che n sɔn ta teŋe dɛɛ baɡle heya. N ta ban tomɛ. Men Korowiirii bola.’ ”

¹⁰ Waa Korowii aa dɛ bol laanee nɔ, “Bene fifraanuanɛ la ba a jaɡa Babelɔn aa, mɛɛ berɔ ba he be, dɛ́ che suna maa sune he nɛɛ dɛ baɡɛ nyoa ŋɔ, mɛɛ berɔ ba he ne Jerusalam bonɔ la ta.

¹¹ Dɛkalkɛ n jemɛ anɔ la maa vɔrɔwa dɛɛ cheɡ heya. Vɔrɔwa aa ɡel he wobɛlbwa do wer, haa wola chɔɡ, ásɛ he dɔ kerekere hwɛɡa.

¹² Belaa hɛɛ ba n sɔn yera dɛɛ soŋ mɛ, ásɛ n no he wesoŋa.

¹³ Hɛɛ dɛɛ ɡaaɡe n bɔree dɛ́ na mɛ, dɛ he dɛ́ nyin n bɔr he bambile bwa ne naa, hɛɛ na mɛɛ.

¹⁴ Kasinteŋ, hɛɛ na mɛɛ, ásɛ n lawɛ heyaa le Babelɔn harɛ haa kaa so o ta la ta, dɛ́ berɛ ba he ne he buɡ ta Jerusalam. Mɛɛ boa he nyoa le harɛre maa lɔ heyaa peɡre a ta la ta, dɛ́ berɛ ba he ne harɛ maa le he ne o ta kaa harɛfala ta la ta. Men Korowiirii bola.”

¹⁵ He ken ɛɛ dɛɛ boloo ŋɔ, “Korowii tɛ yaa o keamere Babelɔn harɛ ta,

¹⁶ kɛ waa Korowii aa dɛ bol kooro waa soɡe Kooro Devid kara ta, ne nɛra bwa baa ka bwɛjen la ta, ne bwɛɛla baa wola nɛra baa laɡ ba kaa harɛfale ta nɛɛ jae la,

¹⁷ kasinteŋ waa Koranar Bwa Kooro aa dɛ bol laanee kɛŋɔ, ‘Mɛɛ ɡeloo bá kpoo ba laa ta, ásɛ lɔr ne weechɔɡa ɡel ba serewe, dɛ́ ɡel bá ɛ kɛŋɔ fiɡ daa nɔna aa pɔah baa wola won dia la ken.

¹⁸ Mɛɛ kpɔ laa ne lɔr dɛ weechɔɡaa ba ta ba nɛ, ásɛ harɛre nɛra bwa hah ba. Bobɛlbwa maa lɔ ba peɡre kaa la, nɛra ɛɛ na baa ba bambile teŋe ba nyoa kpo waa aa puu ba la wa. Nɛra ɛɛ dɛɛ mam baa, ba berɛ kon nɛra aa na dɛɛ taahno.

¹⁹ Gɛ waa nɔ bwa ɛɛ ba ba nɛɛ, dɛkalkɛ ba ta n waa maa cheɡɛ n bonɔɔna baa ɛ n keamere nɛɛ dɛ bol ba be keraŋwɛnɛ bwa la noɛ. Ba deno vɛh n waa la noe.’ ” Korowiirii bola.

²⁰ Korowii berɔ ŋɔ, “Anomanta, hé cheɡ deŋne dɛ́ɛ no men Korowii wa, he nɛra maa ɡela ba lawɛ heyaa le Jerusalam kaa bojaŋ harɛ Babelɔn la.

²¹ Waa men Koranar Bwa Kooro, Israel tena aa dɛ tom mɛ aa dɛ bol Kolaya bibaa Ahab, ne Maaseya bibaa Sedekia waa nɔ. N ŋɔ, ‘Ba cheɡɛ n sɔn ta dɛɛ teŋe nyosone anomanta, mɛɛ kpɔ baa do Babelɔn Kooro Nebukadnesa nɔn ta, ásɛ o kpoo ba he siwi ta.

²² Ba nomanta, nɛra baa laɡ ba le Juda harɛ kaa Babelɔn la bwa dɛ́ nyin ba taah nɛn aa baa ŋɔ, “Kórowii ɛo kɛŋɔ Sedekia ne Ahab Babelɔn kooro aa fuuh ba la.”

²³ Dɛkalkɛ ba ɛ wedoŋa tenten Israel harɛ ta, ba dɛ nyin ba bala haahna, dɛ che n sɔn ta teŋe nyosone, a ɛ waa maa wola ban a ta doe. N jemɛ a bwa dɛɛ di a danseɛ. Men Korowiirii bola.’ ”

Tɔn baa chwera ka tɛ Sɛmaya

²⁴ Koranar Bwa Kooro, Israel tena aa dɛ tomɔ la kpɔ kala tɛ men Jeremia n kpɔ tɛ Nehelam te Sɛmaya

²⁵ waa chwerɛ tɔn o sɔn ta ka tɛ nɛra baa lɔ Jerusalam bwa, ne sɔfo Maaseya bibaa Sefania dɛ sɔfore baa kaa bwa be. Tɔn la bini la, o bol Sefania be ŋɔ,

²⁶ “Korowii lee sɔfo he ba chiɡ Jehoiada naa ta, dɛɛ nyiŋi o Dea la ta. Henee chɛ kɛ he nyiŋi dɛ́ lawɛ nomɛlbwa waa dɛ we choɡla, dɛɛ ɛ o te kɛ Korowii keamee on la, dɛ́ doo bune jɔɡrɔre ne bune kwaa o baŋa ta.

²⁷ Ɛrɛɛ he ta Jeremia waa le Anatɔt dɛɛ bol waa kɛŋɔ Korowii keame la kaeh yɔ?

²⁸ O kpɔ kala tɛ yaa Babelɔn kɛŋɔ yaa so belaa biɡri. Anomanta, hé ma deene dɛ́ so a bini, ásɛ dɛ parɛ bodɛɛɡa dɛ́ du daa dɛɛ di a ta.”

²⁹ Anee sɔfo Sefania kure tɔn la bini waa baɡle men Jeremia.

³⁰ Ate, Korowii bol waa n be ŋɔ,

³¹ “Kpɔ kala nɔ ka tɛ nɛra baa laɡ ba laa ta kaa harɛfale ta bojaŋ la. Ŋɔ Sɛmaya waa ɛ Nehelam te dɛ ba bol Korowii waa la baɡle la, n laa tomɔ, asɛ o neɡre dɛ ɡel he yarada waa aa ɛ nyosone.

³² Anomanta, mɛɛ tɛr Sɛmaya ne o naanar deŋnee. O nɛmbeŋkpoŋ kwara aa ka dɛ́ do nɛra nɔ bini. Waa kondɛɛɡa maa dɛ ba kpɔe tɛ n nɛra la nae ba, dɛkalkɛ o ɛ deŋnekpeɡ o ta n waa ta teŋɛ. Men Korowiirii bola.”