Jeremia 28 - mzwDBL

Keame nyosonteŋni Hanania

¹ A ɡɛ waa aa teŋa nɔ chiɡo ɡɛ saŋ Juda Kooro Sedekia aa di kora bene anaarɛ korobinue te la ta. Belaa Korowii keame bɛl baa dɛ yerɔ Hanania, o mɛɛ sɔne Asuur o le Gebeɔn, o bol waa men Jeremia be Korowii Dea, nɛra la ne sɔfore bwa sie dɛ ŋɔ,

² “Waa Koranar Bwa Kooro, Israel tena aa dɛ tomɔ la aa dɛ bol laanee nɔ, ‘Mɛɛ kuuɡi Babelɔn kooro kpeɡri, waa do kɛŋɔ ba yon kpɔ daa dawɛ nae nɛɛ aa parɛ laanee.

³ Bene anɛ ne tela dɛ n ɡelɔ ba kpɔ laala a yoɡ aa kpeɡa dɛ fa do Korowii Dea, Babelɔn Kooro Nebukadnesa paa le bonɔ la, dɛ́ berɛ ba a ne.

⁴ Mɛɛ berɔɔ kpɔ Jehoiakim bibaa Kooro Jehoiachin, ne Juda tena bwa baa laɡ ba laa ta kaa bojaŋ harɛfale ta Babelɔn la bwa ba. Kasinteŋ, n dɛ ba n kuuɡi Babelɔn kooro kpeɡri waa do kɛŋɔ ba yon kpɔ daa dawɛ nae nɛɛ aa parɛ la ken. Men Korowiirii bola.’ ”

⁵ Belaa men Jeremia che sɔfore ne nɛra baa lɔ Korowii Dea la sie dɛ bol Hanania be ŋɔ,

⁶ “Aamen! Kórowii ɛa ɡɛ! N dɛ hwɛɡɛ kɛŋɔ ó ɡel o waa haa bola la ɛ kasinteŋ, dɛ́ ɡel laala a yoɡ aa kpeɡa dɛ do Korowii Dea la ne nɛra baa laɡ ba kaa harɛfale ta la bwa, bá berɛ le a bwa ne Babelɔn ba bonɔ.

⁷ Kɛ ane a bwa, berɛ dɛɛ no waa maa dɛ ba he be ne nɛra nɔ be bola.

⁸ Keamere baa tɔ n ne he sie saŋ la bolɔ ŋɔ, harɛre nɛra ne koojena ɛɛ serewe laa taa, ásɛ lɔr ne weechɔɡa ɡe kpoo bane.

⁹ Kɛ keame bɛlbwa waa dɛɛ bol Korowii waa ŋɔ deŋnesɔɔhna lole, ásɛ a ɛ kasinteŋ laanee nɛra ɛɛ ba jema kɛŋɔ keame kasinteŋ Korowii aa tomɔ.”

¹⁰ Belaa Hanania laa daa waa dawɛ men Jeremia baŋa kɛŋɔ bontɔɡa la ku,

¹¹ asɛ dɛ che nɛra la bwa sie dɛ ŋɔ, “Korowii bolɔ ŋɔ, ɡɛɛ wɛɛ ba o kuuɡi Babelɔn kooro kpeɡri waa do kɛŋɔ daa ba yon kpɔ dawɛ nae nɛɛ aa parɛ, Babelɔn kooro kpɔ dawɛ harɛre nɛra baŋa ta la. Bene anɛ ne tela dɛ ɡɛ waa nɔ ɛo.” Ate, Jeremia le bela dɛ kaa.

¹² Keame Hanania aa ku daa waa dawɛ Jeremia baŋa ta habɔɔ la, Korowii bol waa men Jeremia be ŋɔ,

¹³ “Ir la ka ŋɔ Hanania be ŋɔ, ‘Haa wona ku daa la nomanta, buni konee dɛɛ ba ba chiɡ o naa ta.

¹⁴ Waa Koranar Bwa Kooro, Israel tena aa dɛ tomɔ la aa dɛ bol laanee nɔ, dɛ́ wɛɛ kpɔ buni waa do kɛŋɔ daa ba yon kpɔ dawɛ nae nɛɛ aa parɛ laanee dawɛ harɛre nɛra baŋa ta, ásɛ baa tomɛ Babelɔn Kooro Nebukadnesa. Hale dɛ́ ɡel kpɔɡ bini ola ɡba ɛɛ tomɛ Kooro Nebukadnesa.’ ”

¹⁵ Belaa men Jeremia ŋɔ Hanania be ŋɔ, “Dɛɛ no, Hanania! Korowii laa tomɛ, asɛ he teŋe nyosone dɛɛ baɡle nɛra nɔ ba ɡe ɛɛ yarada la.

¹⁶ Anomanta, Korowii dɛ ba he kpoe le harɛ nɔ ta. Benanyoa ne chema dɛ he sewɔ, dɛkalkɛ he ɡelɔ nɛra nɔ berɛ habɔɔ kpoo. Gɛɛ Korowii ŋɔ.”

¹⁷ Asɛ Hanania sewɛ a ɡɛ bena la korobinuanɛ ta.