Jeremia 27 - mzwDBL

Juda tena Kooro Nebukadnesa ka toma wa

¹ Kooro Josia bibaa Sedekia aa baa di kora Juda harɛ ta la, Korowii bol waa men Jeremia be ŋɔ

² ń kpɔ oltɔn ŋwɛɛra vɔwɛ da, dɛ́ kpɔ dawɛ n baŋa ta kɛŋɔ ba yon kpɔ daa dawɛ nae nɛ aa parɛ la.

³ Asɛ Korowii ŋɔ n be ŋɔ, ń kpɔ kala tɛ nomonome baa cheɡɛ koranar baa lɔ Edom ne Moab harɛre ta, ne bwɛjena Amɔn ne Taaya dɛ Sidon naa ta, dɛ ba Kooro Sedekia be Jerusalam la.

⁴ Koranar Bwa Kooro, Israel tena aa dɛ tomɔ la ŋɔ n be ŋɔ, ń do ba bá ka ŋɔ ba koranar be waa Korowii fa aa bola ŋɔ,

⁵ “N kpeɡri waa kana kohona nee n ta harɛ nɔ bwa ne nɛwɛnyini dɛ ola aa lɔ o ta bwa, dɛ kpɔa do nomɛlbwa maa leo nɔn ta.

⁶ Menee kpɔ harɛre nɔ bwa do n bonɔɔ Babelɔn Kooro Nebukadnesa nɔn ta, hale dɛ ɡel kpɔɡ bini ola bwa ɛɛ tomɔ.

⁷ Harɛre nɛra bwa ɛɛ tomɔɔ, dɛ tomɛ o bibaa ne o naa ka tel kɛŋɔ o harɛ la aa chɔɡ. Ásɛ o harɛ nɛra ɛɛ tomɛ harɛre nɛra baa kpeɡa kohona ne koojena.

⁸ Kɛ dɛ harɛ bɛlbwa nɛra ta sɛɛh dɛ kpɔ ba te do o lɔɡa aa, mɛɛ ɡeloo bá kpoo ba laa ta, kɛɛ dɛ́ kpɔ lɔr ne weechɔɡa ba ta ba nɛ, á ɛ ba deŋnetɛra ka tel kɛŋɔ maa ɡela Kooro Nebukadnesa aa chɔɡ ba kwaraa.

⁹ Anomanta, he bɛ he keamere kɛɛ nɛra baa dɛ lii kɛŋɔ baa won baɡle waa aa dɛ ba wona chiɡ kerekere, dɛ che deera kɛɛ lala yera kɛɛ dobodobo we-ɛɛla ta be dɛɛ no. Ba bwa dɛ bol he be ŋɔ he bɛ he te kpɔ do Babelɔn Kooro Nebukadnesa lɔɡa.

¹⁰ Ba dɛ neɡre heya dɛ́ ɡel ba lawɛ heya kaa bojaŋ harɛfale ta. Mɛɛ doŋi heyaa ásɛ he ka serewe.

¹¹ Kɛ dɛ harɛ bɛlbwa nɛra kpɔ ba te ka do Babelɔn kooro lɔɡa dɛɛ tomɔ waa, ate mɛɛ ɡeloo ba so ba ɡbaɡba harɛ ta, dɛɛ parɛ o ta. Men Korowiirii bola.”

¹² Men Jeremia fa tɔ sie bol ɡɛ waa nɔ tenten baɡle Juda Kooro Sedekia ŋɔ, “Kpɔ he te do Babelɔn kooro lɔɡa. He ne he nɛra tomɔ ásɛ dɛ dɔ he nyu.

¹³ Ɛrɛɛ chɛ kɛ he ne he nɛra sewɛ laa ta, kɛɛ lɔr kɛɛ weechɔɡa kpoo heya ɔ? Gɛ waa nɔɔ Korowii ŋɔ aa pu harɛ bɛlbwa nɛra baa vɛah dɛ kpɔ ba te do Babelɔn kooro lɔɡa la.

¹⁴ He bɛ keamere baa ŋɔa he bɛ he te kpɔ do o lɔɡa la be no. Neɡraa baa neɡre heya.

¹⁵ Korowii ɡbabir bolɔ ŋɔ o ta bɛlbwa tomɛ, asɛ ba che o sɔn ta dɛɛ teŋe nyosone la. Anomanta, o ŋɔ wɛɛ doŋi he bwaa, ásɛ ba kpoo heya, he ne keamere baa dɛ teŋɛ nyosone la bwa.”

¹⁶ Belaa n ŋɔ sɔfore la ne nɛra la be waa Korowii fa aa bola ŋɔ, “He bɛ keamere baa dɛ bol ŋɔ aa biɡri bá berɛ kpɔ laala a yoɡ aa kpeɡa dɛ faa do Korowii Dea bonɔ la le Babelɔn ba la be no. Neɡraa baa neɡre heyaa la.

¹⁷ He bɛ ba be dɛɛ no! Hé kpɔ he te ka do Babelɔn kooro lɔɡa, ásɛ dɛ dɔ he nyu! Ɛrɛɛ chɛ kɛŋɔ bwɛjen nɔ paɡre dɛ́ berɛ dimɡbia ɔ?

¹⁸ Dɛ ba ɛ Korowii keamere kpela aa, bá bɔɔ le men Koranar Bwa Kooro be, ásɛ n bɛ ɡel laala a yoɡ aa kpeɡa dɛ do n Dea, ne anɔ la aa lɔ koodem bela la, ba paa kaa Babelɔn harɛ ta.”

¹⁹ Waa Koranar Bwa Kooro aa dɛ bol pilare ne loɡjen baa dɛ yerɔ Mpo, ne kwaane aa do kɛŋɔ torɔɡo ba won a taɡa, dɛ laala ane baa kpɔa ɛ Dea la bini a do wer dɛ ka bwɛjen nɔ bini,

²⁰ Kooro Nebukadnesa aa wola kpɔe kaa Babelɔn, ɡɛ saŋ waa lawɛ Juda Kooro Jehoiakim bibaa Jehoiachin laa ta le Jerusalam kaa Babelɔn, o ne Juda ne Jerusalam nomonome bwa la.

²¹ Hé no, waa men Koranar Bwa Kooro, Israel tena aa dɛ tomɛ, aa dɛ bol laala a yoɡ aa kpeɡa, dɛ do n Dea ne koodem waa lɔ Jerusalam la wa.

²² “Baa paa kaa Babelɔn harɛ ta, a do bela ka tel kɛŋɔ n liire aa berɛ ba a ta. Ásɛ n berɛ ɡel bá berɛ ba a ne, ásɛ n berɛ lɛa cheɡ bonɔ. Men Korowiirii bola.”