Jeremia 26 - mzwDBL

Jeremia aahra dɛ́ kpo wa

¹ Kooro Josia bibaa Jehoiakim aa dena ba di kora Juda harɛ ta la, Korowii bol waa aa teŋa nɔ men Jeremia be ŋɔ,

² “Ir ka che n Dea dembaah, dɛ́ bol waa bwa maa doe ŋɔ he bol baɡle nɛra baa le Juda bwɛɛre ta dɛ baa tom mɛ bela la. Bɛ webeŋkpoŋ kwaraa ta, bol a bwa.

³ Ba ken ɛɛ noo dɛ́ charɛ le ba wechɔɡa ta. Ba ɛ ɡɛ tenaa, mɛɛ charɛ n liiree chɔɡa n fe aa ŋɔa mɛɛ kpɔɔ ba ta ba nɛɛ laanee.”

⁴ Korowii berɔ ŋɔ ń bol nɛra la be ŋɔ, “Hɛɛ teŋɛ n waa maa dɛ baɡle heyaa la ta,

⁵ ásɛ dɛɛ no waa n bonɔɔna baa ɛ n keamere maa tom ba he be keraŋwɛnɛ bwa la be. Kɛ ane a bwa, he ta waa maa cheɡɛ ba nɛ dɛ bol he be la ta teŋɛ.

⁶ Dɛ he ta teŋɔ dɛɛ ɛ deŋnekpeɡ aa, ate waa maa ɛ Silo laanee mɛɛ ba n Dea bonɔ ɛɛ, ásɛ harɛre nɛra bwa kpɔ bwɛjen Jerusalam sɔn ɛ kon baa taahno.”

⁷ Sɔfore, ne Korowii keamere dɛ nɛra la bwa no waa men Jeremia aa bola Korowii Dea bela la.

⁸ Maa dena tonɛ waa Korowii aa do mɛ ŋɔ ń bol baɡ ba la, sɔfore la ne Korowii keamere dɛ nɛra la bwa baa laɡ mɛ dɛ ŋɔ, “He chɛ kpoe!

⁹ Ɛrɛɛ he che Korowii sɔn ta dɛɛ bol ŋɔ Dea nɔ ɛɛ doo kɛŋɔ Silo, ásɛ bwɛjen nɔ ɡe chɔɡ, nɛra aa wola o taa so kpa nɔɔ?” Ate, nɛra la bwa den ba bar men Jeremia Korowii Dea bela.

¹⁰ Juda nomonome aa no ɡɛ waa nɔ la, ba le koodem bela dɛ la Korowii Dea, dɛ ka che ba chebɔra doonyoa bɛl baa dɛ yerɔ Doonyofale la ta.

¹¹ Belaa sɔfore, ne Korowii keamere la ŋɔ nomonome la ne nɛra la bwa be ŋɔ, “Baa nɔ chɛ kɛ ba kpoo, dɛkalkɛ o bol Korowii waa yaɡɛ bwɛjen nɔ nɛra. He ɡbabir noɔ!”

¹² Ate, n ŋɔ nomonome la bwa ne nɛra la be ŋɔ, “Korowiirii tom mɛ ŋɔ ń ba bol waa aa dɛ ba Dea nɔ ne bwɛjen nɔ ta baɡle heya.

¹³ Anomanta, hé charɛ he soɡa ne we-ɛɛla bwa, dɛ́ɛ teŋɛ Korowii haa dɛ tomɔ nɛ, ásɛ o charɛ o liire dɛ bɛ wenaale waa bol a waa la kpɔ ba ta he nɛɛ kpa.

¹⁴ N te, n dɔɔ do he nɔn ta, wobɛlbwa haa dɛ nyin la, hé kpɔ ɛɛ mɛ.

¹⁵ Kɛ he jemɛ kɛŋɔ dɛ he kpo mɛ naa, he ne nɛra baa lɔ bwɛjen nɔ ta ɛɛ di bolchɔɡee, kɛŋɔ haa kpo nɛn waa wola wechɔɡa bɛlbwa ɛɛ. Kasinteŋ, Korowiirii tom mɛ ŋɔ ń ba kah heya.”

¹⁶ Belaa nomonome ne nɛra la bwa ŋɔ sɔfore ne Korowii keamere la be ŋɔ, “Korowii yaa dɛ tomɔ sɔn taa baa nɔ che dɛ bol waa baɡle yaa, a ta chɛ kɛ bá kpoo.”

¹⁷ A habɔɔ la, nomonome la bane iro che dɛ bol nɛra baa chema la be ŋɔ,

¹⁸ “Gɛ saŋ Juda Kooro Hɛsɛkea aa di kora la, Korowii keame Maeka waa le Mɔresɛt bol Koranar Bwa Kooro waa baɡle Juda tena bwa ŋɔ, ‘Saayɔn ɛɛ doo kɛŋɔ koo baa parɔ dɛ du kwaa o ta ken, Jerusalam bwa ɛɛ kuuɡuu dɛ́ chɔ pɛɛ, ásɛ Korowii Bwejen Dea aa chɔŋɛ o ta la berɛ kɔr.’

¹⁹ Juda Kooro Hɛsɛkea ne Juda tena ta Maeka kpoe. Kooro Hɛsɛkea ɔmɛ Korowii dɛ soŋe ŋɔ o na o sum. Asɛ Korowii charɛ o liire wenaale waa ŋɔa o fe ɛɛ kpɔɔ ba ta ba nɛɛ la ta. Kɛ taraken ya berɔ dɛɛ nyin wenaale kohona dɛ́ ba ta ya nɛ.”

²⁰ Dɛ baa bɛl ɡe lole baa yerɔ Uria, o mɛɛ sɔne Sɛmaya dɛ le bwɛɛ Kiriat Jearim. O ɡe bol waa Korowii sɔn ta, waa aa dɛ ba bwɛjen nɔ ne harɛ nɔ ta bala, ɡɛ Jeremia fa aa bola la.

²¹ Kooro Jehoiakim ne o laa tena dɛ o nomonome bwa aa no waa Uria aa bola la, dɛ o dɛ nyinu dɛ́ kpo. Kɛ Uria noɔ kɛ kooro dɛ nyinu dɛ́ kpo, asɛ dɛ kpɔ ɔmee chwa kaa Ijipt harɛ ta.

²² Kooro Jehoiakim tomɛ Akbɔ bibaa Ɛl Netan ne baala bane Ijipt ŋɔ, bá ka lawɛ Uria ba.

²³ Ba lawɛ Uria le Ijipt harɛ dɛ kpɔɔ ka tɛ Kooro Jehoiakim, asɛ o kpoo dɛ kpɔ o chɔɔ la ka ta bela baa dɛ huɡe nɛmpɛɛne la.

²⁴ Kɛ ane a bwa, men Jeremia te dɔ n nyu di, dɛkalkɛ Safan bibaa Ahikam cha mɛ o ta ɡelɛ ba laɡ mɛ tɛ nɛra la ba kpo mɛ.