Jeremia 25 - mzwDBL

Dɔma baa le weekaŋle nyunduabɔr wa

¹ Kooro Josia bibaa Jehoiakim aa di kora bene anaarɛ ta la, Korowii bol waa men Jeremia be nɛra bwa baa lɔ Juda harɛ ta wa. Dɛ Babelɔn Kooro Nebukadnesa ɡe di benanyoa beŋkpoŋ o kora ta.

² Anomanta, men Korowii keame Jeremia bol Juda tena la bwa ne nɛra baa lɔ Jerusalam be ŋɔ,

³ “Le bene fifraanɛ dɛ atoro, ɡɛ saŋ Juda Kooro Amɔn bibaa Josia aa di kora bene fi dɛ atoro la, dɛ Korowii dɛ bol waa n be, asɛ n bol he be keraŋwɛnɛ bwa, kɛ he ta n be noɛ.

⁴ Keraŋwɛnɛ bwaa Korowii tomɛ o bonɔɔna baa ɛ o keamere he Juda ne Jerusalam tena be, kɛ he ta deŋne cheɡɛ, a ba ɛ kɛŋɔ hɛɛ noo.

⁵ Ba yon ŋɔ, ‘Hé charɛ he liire le he wechɔɡa ne he we-ɛɛla aa wola were ta, ásɛ he won so harɛ Korowii aa kpɔa tɛ he ne he naawa la ta, saŋ bɛlbwa dɛɛ la.

⁶ He bɛ voɡare nɛɛ dɛɛ teŋɛ, ásɛ dɛɛ toma. He bɛ kwaa he ɡbabir aa kpɔ nɔɔra kwaara kpɔ ir Korowii bwaawee. He ɛ ɡɛ tenaa, waa heyaa chɔɡ.’

⁷ Kɛ Korowii ŋɔ he ta o be noɛ, dɛ kpɔ kwaa he ɡbabir aa kpɔ nɔɔra kwaara ir o bwaawee, a ba wenaale ne ba ta he nɛ.

⁸ Anomanta, Koranar Bwa Kooro bolɔ kɛŋɔ, haa wola o be noɛ nomanta,

⁹ wɛɛ yerɛ nɛra baa lɔ weekaŋle nyunduabɔr, ne o bonɔɔ Babelɔn Kooro Nebukadnesaa, ásɛ ba ba yo nɛra baa soɡe Juda ne harɛre aa bara cheme bwa. Wɛɛ chɔɡ ba bwaa kwaraa ken, ásɛ ba do kɛ komɛl waa doŋa nɛra na dɛɛ mamɛ, harɛ la bwa chɔ pɛɛ saŋ bɛlbwa dɛɛ la.

¹⁰ Wɛɛ ɡeloo ba silɛɛ ne ba hanfalwaa ɡbɔɡa bwa ba a jaɡa. Nɛra aa mea baa dɛ nama nambwe ta ɡbɔɡaa no, kɛɛ dɛ na kandere chaahna.

¹¹ He harɛ nɔ bwa ɛɛ berɛ dimɡbiaa, nɛra na ba nyoa kpo, ásɛ harɛre aa baro cheme la nɛra do Babelɔn kooro lɔɡa, dɛɛ tomɔ bene fifraanuanɛ.

¹² Kɛ bene fifraanuanɛ la baa kaa laa, wɛɛ tɛr Babelɔn kooro ne o harɛ nɛra deŋnee ba wechɔɡa la wa, ásɛ dɛ chɔɡ harɛ la o berɛ dimɡbia saŋ bɛlbwa dɛɛ la.

¹³ Wɛɛ kpɔ wenaale bwa baa chwera do tɔn nɔ bini, o che men Jeremia nɛɛ ŋɔ wɛɛ kpɔɔ ba ta harɛ la ta laanee ba ta ba nɛ.

¹⁴ Wɛɛ bɔ Babelɔn tena kemee waa baa ɛa la wa, ásɛ harɛre nɛra ɡalɡa ne koojena ba laɡ ba yoma.”

Korowii bandia danana nee nyɔe wa

¹⁵ Korowii Israel tena aa dɛ tomɔ la ŋɔ, “Jeremia, lɛ numol nɔ, sen aa lɔ o bini do kɛŋɔ n bandia danana ne, mɛɛ ba kpɔe tɛ nɛra bá nyɔ dɛ́ tɛr ba deŋne. Kpɔ kaa harɛre nɛra maa tomɛ ba be la be, dɛ́ ɡel bá nyɔ.

¹⁶ Ba nyɔɔ tonaa, baa dɛɛroo dɛɛ yɛɛɡe, asɛ choɡla chole ba nɛ, laa maa kpɔa dɛɛ ba ba nɛɛ la wa.”

¹⁷ Anomanta, n lɛ numol la, dɛ ɡel harɛre nɛra waa tom mɛ ba be la nyɔ o bini sen la. Banee,

¹⁸ Jerusalam ne Juda bwɛɛre nɛra, ba ne ba koranar ne nomonome bwa, ásɛ a ɡel ba harɛ berɛ dimɡbia, nɛra bambile teŋe baa mamɛ dɛɛ taah ba dɛ kpoŋe ba le fini.

¹⁹ Ijipt kooro ne o bonɔɔna ne o nomonome dɛ o nɛra bwa,

²⁰ ne nɛŋhɔɔhra bwa baa lɔ bela, ne Us harɛ koranar ne Filisti koranar bwa, banɔ la baa le Askɛlɔn ne Gasa ne Ekron dɛ nɛra baa kaa dɛ do Asdɔd,

²¹ ne Edom ne Moab dɛ Amɔn harɛre ta,

²² ne koranar baa lɔ bwɛjena Taaya ne Sidon bwa, ne harɛre aa lɔ ba lɔɡa dɛ do mpo la baŋ bwa,

²³ ne Dedan ne Tema ne Bus, dɛ banɔ la baa lɔ bojaŋ harɛre ta bwa,

²⁴ ne Arab koranar bwa ne harɛfala koranar baa soɡe pua hɛŋle ɡbo harɛre ta,

²⁵ ne Simri ne Elam dɛ Midia koranar bwa,

²⁶ dɛ weekaŋle nyunduabɔr koranar baa lɔ bojaŋa ne ambori bwa ta, ásɛ harɛre nɛra bwa teŋɛ dɔŋa nɛɛ dɛɛ nyɔ. Ba bwa habɔɔ la, mɔɔ Babelɔn kooro ɡe ba nyɔ danana nee la.

²⁷ Belaa Korowii ŋɔ n be ŋɔ, “Ŋɔ nɛra la be ŋɔ men Koranar Bwa Kooro, Israel tena aa dɛ tom mɛ la dɛ do ba ŋɔ, bá nyɔ n bandia danana sen la ka tel kɛŋɔ baa dɛɛ dɛ chwɛɛ, ka tel kɛŋɔ baa choɡli baa wola won ir kpa, laa maa kpɔa dɛɛ ba ba nɛɛ la wa.

²⁸ Kɛ dɛ ba vɛh numol la lɛɛ dɛ nyɔ aa, hé ŋɔ ba be ŋɔ men Koranar Bwa Kooroo ŋɔ a chɛ kɛŋɔ bá nyɔ.

²⁹ Mɛɛ kpɔ wenaalee ba ta bwɛjen n ɡbabir sɔn aa dawɛ o ta. Ba dɛ lii kɛŋɔ ba tenee wola deŋnetɛraa dɔ aa? Akai, baa won le a nyoa, dɛkalkɛ n dɛ ba laa ne ba ta harɛ nɔ nɛra bwa nɛ. Men Koranar Bwa Kooroo bola.

³⁰ Hen Jeremia, bol n waa la ba be ŋɔ, ‘Korowii dɛ kɔɡre kɛŋɔ nyujente dɛ le nyundua dɛɛ ba. O taa do kɛŋɔ bwaala kɔra, dɛ le o soŋnibɔr waa do ɡoroŋ bela, dɛɛ nyɛɡ o nɛra baa lɔ o harɛ nɔ ta nɛ. Wɛɛ tiɡri ba nɛɛ kɛŋɔ ba yon dɛɛ tiɡri ɡrepo daa nɔna la ken.

³¹ Nɛra baa lɔ harɛ jaɡa bwa ɛɛ no o nyɛɡa laanee. Korowii ne harɛre nɛra dɔɔ, wɛɛ bol nɛwɛnyina bwa waa dɛ́ pa bole, ásɛ dɛ kpoo nyubinikpeɡ tena.’ ” Korowiirii bola.

³² Waa Koranar Bwa Kooro aa dɛ bol laanee nɔ. “Hé na, wenaale dɛ ba, o le harɛ bɛl nɛra be dɛ kaa bane ɡe be. O do kɛŋɔ peukpeɡ aa taa le harɛ jaɡa ken.”

³³ Gɛ saŋ la, nɛra baa kpoo ba laa ta la ɛɛ warɔɔ chɔ harɛ nɔ ta bobɛlbwa, le harɛ baŋ bɛl ba kaa o jaɡa. Nomɛlbwa aa ba lwee ɛ, a ba ɛ kɛŋɔ ba huɡ ba. Ásɛ ba chɔɡ, dɛ́ do kɛŋɔ nabena aa ɡela harɛ ɛɛ do wer ken.

³⁴ He nomonome haa do kɛŋɔ peteɡra dɛɛ nyiŋi n nɛra nɛɛ la, hé do lɔŋɔre dɛɛ wi kohona! Hé chɔ harɛ dɛɛ ɡbili, dɛkalkɛ saŋ telo kɛ bá kpoo heya. Hɛɛ doo kɛŋɔ vii yon le harɛ dɛ paɡre la ken.

³⁵ Nomonome haa do kɛŋɔ peteɡra la aa bɔree dɔ chwa kaa bobɛlbwa.

³⁶ Hɛ́ɛ no nomonome baa do kɛ peteɡra la lɔŋɔre ne wii baa dɛ wi, dɛkalkɛ Korowii chɔɡ ba peera dibɔra.

³⁷ Haa deŋnesɔɔhnaa dɔ harɛ la ta, Korowii bandia kohona la wa.

³⁸ Korowii vɛh o nɛra kɛŋɔ nyujente yon chwa le o sɔɔhbɔr la ken. Harɛ la berɛ pua hɛŋle ɡbo harɛ, dɛkalkɛ Korowii cheɡɛ o bandia kohona ta ɡel ba dɔma ba chɔɡ ba harɛ.