Jeremia 24 - mzwDBL

Fiɡ daa nɔna wɛɡrɛ dela anɛ ane wa

¹ Babelɔn Kooro Nebukadnesa lawɛ Juda Kooro Jehoiakim bibaa Jehoiachin ne o nomonome, ne nɛra baa dɔ kwaa sɛɛh wejema, dɛ nɛra baa dɔ kwaa bwa soo siwi ɛɛ wejema le Jerusalam kaa bojaŋ harɛ Babelɔn. A habɔɔ, Korowii ɡel men Jeremia na waane chaahna ta, dɛ fiɡ daa nɔna wɛɡrɛre anɛ cheɡɛ o Dea doonyoa bela.

² Nɔndɛɛɡa su wɛɡrɛ beŋkpoŋ, anee tɔ sie swɛɛ, asɛ wɛɡrɛ nɛɛte la te kwaa ɛ nɔnchɔɡa, baa wola won dia.

³ Belaa Korowii bɔɔ mɛ ŋɔ, “Jeremia, bɔkwaa hɛɛ na nɔ?” Asɛ n chaŋe ŋɔ, “Fiɡ daa nɔnaa mɛɛ na. Anɔ la aa ɛ nɔndɛɛɡa la wer, kɛ anɔ la aa ɛ nɔnchɔɡa la te bwa chɔɡɔ, baa wola won dia.”

⁴ Belaa Korowii berɛ ŋɔ n be ŋɔ,

⁵ “Kenii men Korowii Israel tena aa dɛ tom mɛ la ŋɔ, ‘Fiɡ nɔndɛɛɡa la do kɛŋɔ, Juda tena maa ɡela ba laɡ ba laa ta kaa bojaŋ harɛ Babelɔn.

⁶ Mɛɛ do sie ba bee ba wobɛlbwa ta, dɛ́ berɛ ba bane bonɔ, dɛ́ laɡ ba ir bá kpeɡ, maa ɡel ba chole, dɛ́ kwaa ba du, maa ban fuɡri ta kɛŋɔ dua.

⁷ Mɛɛ ɡeloo ba dɔ nyina bambile, á ɡel ba jemɛ kɛŋɔ menee Korowii baa dɛ tom mɛ. Mɛɛ ɛ Korowii baa dɛ tom mɛɛ, ásɛ ba ɡe ɛ n nɛra, dɛkalkɛ baa kpɔ ba bambile bwaa tɛ mɛ, dɛ́ berɛ ba n be.

⁸ Kɛ fiɡ nɔnchɔɡa baa wola won dia la te, men Korowii ŋɔ ɡɛɛ mɛɛ ba Juda Kooro Sedekia ne o nomonome, ne nɛra baa kaa dɛ do Jerusalam ɛɛ. Hale ba lɔ bonɔ harɛ nɔ ta, kɛɛ dɛ ka so Ijipt harɛ ta kwaraa noo.

⁹ Mɛɛ kpɔ wenaale kohonaa ba ta ba nɛ, ásɛ harɛre nɛra bwa ɔmɛ kohona. Nɛra ɛɛ dɛɛ mam baa dɛɛ muɡli ba baah, dɛɛ taah ba bobɛlbwa maa lɔ ba peɡre bwa.

¹⁰ Laa ne lɔr, dɛ weechɔɡaa mɛɛ ba kpɔe ba ta ba nɛ, ka tel kɛŋɔ beŋkpoŋ kwaraa aa wola ka, harɛ maa kpɔa tɛ ba ne ba naawa la ta.’ ”