Jeremia 23 - mzwDBL

Kerekere hwɛɡa wa

¹ Korowii ŋɔ, “Sitɔɔla baa do kɛŋɔ peteɡra, dɛɛ chɔɡ n nɛra, dɛ lɔ ba dɛɛ peɡre la, bá bwɛɛlɛ.”

² Anomanta, waa Korowii Israel tena aa dɛ tomɔ la aa dɛ bol sitɔɔla aa chɛ kɛ bá nyiŋi o nɛra nɛɛ laanee nɔ, “He ta n nɛra la nɛɛ nyiŋe dɛ doŋ ba, dɛ ɡel ba lɔ peɡre. Taraken, n dɛ ba he deŋne tɛra, he wechɔɡa haa ɛa la wa.

³ N ɡbabir ɛɛ boa ba bwa nyoa, dɛ́ le harɛre maa lɔ ba peɡre a ta la ta, dɛ́ berɛ teɡ ba ba harɛ baa dɔ kpɔɡa dɛɛ chwe ta. Baa loɡle biirii warɛ, ásɛ dɛ ya kohona.

⁴ Mɛɛ berɔɔ le sitɔɔla baa nyiŋi ba nɛ, ásɛ bɛlbwa aa ɔmɛ kɛɛ dɛ́ nyoɡre kpa. Men Korowiirii bola.”

⁵ Korowii ŋɔ, “Tɔpera ane dɛ ba ásɛ n ɡel Kooro Devid naa o wa aa toɡra, dɛ do kɛŋɔ Daa Kpale ba, dɛ́ ba di kora. O balaa, wɛɛ che wejema taa nyiŋi ba nɛ, dɛɛ ɛ waa aa wera harɛ la bwa ta.

⁶ O baa di kora aa, Juda tena ɛɛ dɔ bosɔɔhnaa, ásɛ Israel tena ɡe so deŋnesɔɔhna ta. Sɔn baa dɛɛ yerɔ laanee, ‘Korowii Waa Dɛ Lɛ Yaa.’

⁷ Tɔpera ane dɛ ba ásɛ nɛra aa n sɔn taa ŋwɛɛ ŋɔ, ‘Korowii waa lole saŋ bɛlbwa, dɛ lawɛ Israel tena le Ijipt harɛ ta kpa.’

⁸ Kɛ baa ŋɔɔ, ‘Korowii waa lole saŋ bɛlbwa, dɛ lawɛ Israel tena le weekaŋle nyunduabɔr harɛ ta, ne harɛre waa lɔ ba peɡre a ta.’ Ásɛ ba dɔ ba ɡbabir harɛ dɛ́ so o ta.”

Keame nyosonteŋna wa

⁹ A ɡɛ waa nɔ ɛ Korowii keamere wa. N loo kuu a kpɔ bochela ta n nɛ, n hoɡa bini bwa ɛɛ wee mɛ. N do kɛŋɔ sennyɔdɛɛ ken, kɛ nɛn waa nyɔ sen kohona, Korowii waa aa do ɡoroŋ o bol n be la wa.

¹⁰ Jwamane su harɛ la ta, Korowii taahna nomanta, harɛ la chɔɡɔ, a ɡel kondɛɛra dibɔra aa lɔ pua hɛŋle ɡbo harɛ hol. Keamere la kpɔ ŋwɛnɛchɔɡa ta dɛɛ di kpeɡri.

¹¹ Korowii ŋɔ, “Keamere la ne sɔfore bwa aa men duu, hale n Dea bela, ba dɛ ɛ wechɔɡa.

¹² Anomanta, mɛɛ ɡeloo ŋwɛnɛre baa dɛ kpɔ a ta do vɔle, biro do o ta, ásɛ ba lɔ naa dɛ́ choɡli. Mɛɛ kpɔ wenaalee ba ta ba nɛ, ba deŋnetɛra tɔpere. Men Korowiirii bola.

¹³ N na waane maa kia keamere baa lɔ Samaria nɛ. Ba dɛ bol waa voɡ Baal sɔn ta, a ɡel n nɛra Israel tena nyoɡre ŋwɛnɛ.

¹⁴ N berɔ na waane aa wola were kwaraa keamere baa lɔ Jerusalam ɡe nɛ. Ba dɛ bɔ jwamane dɛɛ teŋe nyosone. Ba dɛ do wechɔɡ-ɛɛra ɡbemba wechɔɡa ɛɛ ta, a ɡel nomɛlbwa aa charɛ dɛɛ le a ta. Ba wechɔɡa do kɛŋɔ Sodom ne Gomoora tena n be.”

¹⁵ Anomanta, Koranar Bwa Kooro bol keamere baa lɔ Jerusalam waa ŋɔ, “Mɛɛ do tɛɡchɔɡa kondikwaa taa bá di, dɛ́ do ane ɡe nee ta bá nyɔ, dɛkalkɛ ba ɡelɔ nɛra aa men tomɛ harɛ la ta bobɛlbwa.”

¹⁶ Waa Koranar Bwa Kooro aa dɛ bol laanee nɔ. “He bɛ waa keamere la aa dɛ bol he be la no, ba dɛ chɔɡ he liire, hwɛɡa bɛlbwa toole a ta. Anɔ la baa liira ɡboo ba na chaahna ta dɛɛ baɡle, waa men Korowii aa bola laa.

¹⁷ Ba teŋɔ dɛɛ bol nɛra baa vɛh n waa ta teŋa be ŋɔ, ‘Korowii ŋɔ, hɛɛ dɔ deŋnesɔɔhnaa.’ Dɛɛ bol deŋnekpeɡ tena ɡe be ŋɔ, ‘Wenaale bɛlbwa aa he nɛɛ ba.’

¹⁸ Kɛ keamere nɔ bɛlbwa aa Korowii liire ne o wesɔɔhla jemɛ. Bɛlbwa toole dɛ no, kɛɛ dɛ jemɛ o waa la mun.

¹⁹ Hé na, Korowii bandia do kɛŋɔ peukpeɡ waa dɛ ta, kɛŋɔ kawulewule dɛ ta dɛɛ kpɔ nyubinikpeɡ tena nyubaahna.

²⁰ Korowii bandia la nyoa aa sɔɔh, ka tel kɛŋɔ waa ɛ o tetoowa tonɛ. Tɔpera ane dɛ ba bala, ásɛ mɔɔ he no waa nɔ mun kɛrɛdɛ.

²¹ N laa tomɛ ɡɛ keamere nɔ, kɛ ane a bwa, dɛ ba iro dɛ kaa. N ta ŋɔe ba ka bol wobɛlbwa, kɛ ba cheɡɛ n sɔn ta kaa bol wa.

²² Dɛ n ne ba fe chemo, ba jemɛ n liire ne n wesɔɔhla la aa, n nɛraa ba fee ka bol n waa la baɡle, ásɛ ba charɛ ba liire le ba wechɔɡa ne nyubinikpeɡ we-ɛɛla bwa ta.

²³ N ɛ Korowii maa lɔ bobɛlbwa, bobeŋkpoŋ ɡbo laa n do.

²⁴ Nomɛlbwa aa won ka sɔh bobɛl maa wola on na. N toole nyundua ne harɛ ta bwa naa? Men Korowiirii bola.

²⁵ N no keamere nyosonteŋna maa wola ban tomɛ, asɛ ba che n sɔn ta dɛɛ bol n waa la wa. Ba yon ŋɔ, ba deero dɛ na men Korowii waa chaahna ta.

²⁶ Saŋ besoo a ɡɛ keamere nyosonteŋna baa cheɡɛ ba ɡbabir liire ta dɛɛ baɡle waa nɔ ɛɛ ba ɡela ɔ?

²⁷ Ba dɛ lii ŋɔ chaahna baa dɛ na, dɛɛ bola dɔŋa be la ɛɛ won ɡel n nɛra soh n wa, ɡɛ ba naawa fa aa cheɡɛ voɡ Baal toma ta, dɛ soh n waa la.

²⁸ Keame bɛlbwa na waane chaahna ta naa, o yon ŋɔ deeraa o dee, kɛ n keame bɛlbwa waa dɛ bol waa aa le n be la te, wɛ́ɛ bola kasinteŋ ta. Haahra ta korɛ, asɛ mea ɡe koraa?

²⁹ N waa la do kɛŋɔ nii, dɛ berɛ do kɛ hamba waa won bwea paɡra burbur ken. Men Korowiirii bola.

³⁰ Anomanta, n ne a ɡɛ keamere baa ŋwɛ waa dɛɛ le dɔŋa be, dɛ ŋɔ n waa baa bol la dɔɔ.

³¹ Kasinteŋ, n hah keamere ba ɡbabir aa dɛ bol ba wa, dɛ yon ŋɔ a ɛ men Korowii waa la.

³² Anomanta, n ne nɛra baa cheɡɛ chaahna ta, dɛ teŋe nyosone dɛɛ maŋkura ba te la dɔɔ. Ba bola dɛ ɡel n nɛra ɛɛ nyoɡre, dɛ n ɡe laa tom ba. Ba waa la aa nɛra nɔ cha tama bɛlbwa. Men Korowiirii bola.”

Keame nyosonteŋna baa wola Korowii waa bol

³³ Korowii ŋɔ men Jeremia be ŋɔ, “Dɛ n nɛra nɔ bini bɛlbwa kɛɛ n keame, kɛɛ n sɔfo bɔɔre ŋɔ, ‘Bɔkwa waa men Korowii ɛɛ bol ɔ?’ Asɛ he chaŋe ŋɔ, ‘He waa do kɛ bone dɛ dawɛ Korowii nɛ, anomanta, wɛɛ vɛh heyaa.’

³⁴ Kɛ dɛ nomɛlbwa kɛɛ n keame, kɛɛ sɔfo bɛlbwa bol waa ŋɔ, ‘Bone aa ɡwaala Korowii kpɔ dawɛ ya nɛ’ aa, mɛɛ tɛr ba ne ba lolanar deŋnee.

³⁵ A chɛ kɛ bá ɡarɛ bɔɔ ba daamanar ne lolanar ŋɔ, ‘Bɔkwa waa Korowii chaŋe ɔ? Bɔkwa waa o bol ɔ?’

³⁶ Anomanta, ba bɛ waa aa ɡwaala Korowii kpɔ dawɛ ba nɛɛ la waa bol kpa, dɛkalkɛ dɛ bɛlbwa ɛ ɡɛ naa, mɛɛ ɡeloo n waa la do kɛŋɔ bontɔɡa ɡbaɡba dawɛ o nɛ. Ba berɛ Korowii baa dɛ tomɔ waa la sie, Korowii waa lole saŋ bɛlbwa dɛ ɛ Koranar Bwa Kooro la.

³⁷ Jeremia, bɔɔ n keamere la ŋɔ, ‘Ɛrɛɛ Korowii chaŋe heya ɔ? Bɔkwa waa o bol ɔ?’

³⁸ Dɛ ba vɛh waa maa do ba a ta, dɛ ŋɔ waa aa ɡwaalaa n kpɔ ba dawɛ ba nɛ aa, ŋɔ ba be ŋɔ,

³⁹ ‘Kasinteŋ, Korowii ɛɛ soh he waa, dɛ́ kpɔ he ne bwɛɛ waa kpɔa tɛ he ne he naawa la ka ta bojaŋ, ásɛ he le o sie kwaraa.

⁴⁰ Wɛɛ ɡeloo he di sihiih taeh, sihiih nomɛlbwa aa wola o waa soh bwa.’ ”