Jeremia 21 - mzwDBL

Korowii vɛh Kooro Sedekia wesoŋa

¹ Korowii bol waa Jeremia be ɡɛ saŋ Juda Kooro Sedekia aa tomɛ Malkija bibaa Pasur, ne Maaseya bibaa sɔfo Sefania o be. Ba ŋɔ,

² “Bɔɔ le Korowii be tɛ yaa, dɛkalkɛ Babelɔn Kooro Nebukadnesa dɛ ba ba yo yaa. Korowii ken ɛɛ ɛ nyokpo waanee tɛ yaa kɛ saŋ la, ásɛ o berɛ habɔɔ kaa.”

³ Ate, Jeremia chaŋ ba ŋɔ, “Hé ŋɔ Kooro Sedekia be ŋɔ,

⁴ ‘Korowii Israel tena aa dɛ tomɔ la ŋɔ, o ɡbabirii dɛ́ yo he laa tena haa kpɔ ba dɛɛ la ka yo Babelɔn kooro ne o laa tena la, dɛ́ pɔ he nɛ. Wɛɛ boa he laa tena dɔmkwaa nyoa, a daŋɛ chɔ bwɛjen la baah ta.

⁵ O ɡbabirii dɛ́ yo heya o bokpeɡa ne o bandia kohona bwa ne.

⁶ Wɛɛ kpo nomɛlbwa waa soɡe bwɛjen la binii, nɛra ne ola bwa, ásɛ weechɔɡa kpoo ba bwa.

⁷ A habɔɔ la, wɛɛ lawɛ Juda Kooro Sedekia ne o nomonome, ne nɛra baa kaa dɛ do bwɛjen nɔ bini dɛ dɔ ba nyu le weechɔɡa, ne laa kɛɛ lɔr la ta do Babelɔn Kooro Nebukadnesa ne ba dɔma baa dɛ nyin ba dɛ kpo la nɔn ta. Kooro Nebukadnesa aa bɛlbwa ɡela ba, waa bɛlbwa nɛɛ sune kɛɛ dɛ dɔ tedoma tɛo. Korowiirii bola.’ ”

⁸ Ate, Korowii berɛ ŋɔ men Jeremia be ŋɔ ń bol nɛra la be ŋɔ, “Hé no. Webele anɛ nɔɔ n kpɔ dɛɛ tɛ heya, ŋwɛnɛ haa che o ta dɔ mkpa, ne ŋwɛnɛ haa che o ta dɔ seo.

⁹ Nomɛlbwa soɡe bwɛjen nɔ ta naa, baa kpoo laa taa, kɛɛ weechɔɡa ne lɔr ɡel o sewɛ. Kɛ bɛlbwa waa kpɔ o te ka do Babelɔn tena baa chɔa bar heyaa nɔ lɔɡa te ɛɛ dɔ o nyuu.

¹⁰ N siwi beɡrɔ kɛ ń chɔɡ bwɛjen nɔ, o kɛrɛdɛ doe te laa. Babelɔn kooro nɔn taa wɛɛ ba doe, ásɛ o fuh o bwa dɛɛboo ken.” Korowiirii bola.

¹¹ Korowii berɔ ŋɔ men Jeremia be ŋɔ, ń bol Juda koodem tena be ŋɔ, “Hé cheɡ deŋne dɛɛ no waa men Korowii aa dɛ bol.

¹² Kooro Devid naanar, waa Korowii aa dɛ bol laanee nɔ. ‘Hé na kɛŋɔ waa aa wera dɛ toɡre lole tɔpere bɛlbwa, hé lɛ nɛra baa dɛ fiɡ ba le ba dɔɔranar nɔn ta, nɛra baa lɛ ba laala bwa la. Dɛ ɡɛ laa aa, n bandia ɛɛ fuuh kohona kɛŋɔ nii ken, bɛlbwa aa wola won sɔɔh o nyoa, wechɔɡa haa ɛa la wa.

¹³ N ne Jerusalam tena dɔɔ, heyaa soɡe deŋɡarere dor, a do kɛŋɔ he soɡe bwetal harɛ waa chɔa kaa ta ken. He yon ŋɔ, “Umee dɛ́ won ba yo yaa ɔ? Umee dɛ́ won ba ku ya danjwɛkpeɡa dɛ́ jo ya be nɔ?”

¹⁴ Mɛɛ tɛr he deŋnee ɡɛ he we-ɛɛla aa doa. Mɛɛ ɡeloo nii le he kɔne bini dɛ́ fuh komɛlbwa aa lɔ a ta, Men Korowiirii bola.’ ”