Jeremia 20 - mzwDBL

Jeremia ne sɔfo Pasur

¹ Dɛ baa bɛl sɔne Ima, o bibaa sɔne Pasur. Dɛ sɔfo Pasur ɛ nomonjen waa chɔ nɛra baa dɛ nyiŋi Korowii Dea nyoa. Waa noa kɛŋɔ men Jeremia dɛ bol ɡɛ waa nɔ la,

² o ɡelɔ ba lɔɔ mɛ, dɛ do mɛ jɔɡrɔre. Bela bɛne Bɛnjamen Doonyoa nyunduabɔr, Korowii Dea bela.

³ Tɔ aa pera la, Pasur baa foo n jɔɡrɔre la, asɛ n ŋɔ o be ŋɔ, “Korowii ta ŋɔe ŋɔ he sɔne Pasur, sɔn waa pae laanee Maɡor Misabib.

⁴ Waa Korowii aa dɛ bol laanee nɔ. ‘N dɛ ba ɡela a che he nɛɛ ɔmee chole he ne he daamanar bwa nɛ, ásɛ ba dɔma kpoo ba laa ta he siwi ta. N dɛ ba Juda tena bwa kpɔe do Babelɔn kooro lɔɡa. Wɛɛ lawɛ banee kaa o harɛ ta dɛ́ kpoo bane ɡe.

⁵ Mɛɛ berɔ ɡel ba dɔma pa ba kondɔɔh aa lɔ bwɛjen nɔ ta bwa, dɛ́ kpɔ nɔn dawɛ ba komɛlbwa ta, hale Juda koranar kwaa a yoɡ aa kpeɡa bwa, dɛ́ che a bwa kaa Babelɔn harɛ ta kɛŋɔ laa ta kwa.

⁶ Kɛ hen Pasur te, baa lawɛ he ne he dem tena bwaa kaa Babelɔn harɛ ta. Belaa hɛɛ ba sewa bá huɡe, he ne he bala haa teŋe nyosone kohona tɛɛ ba la bwa.’ ”

Jeremia Korowii waa naɡra

⁷ N Naa Korowii, he neɡ mɛ, asɛ n teŋɛ he nɛ. He pɔ n nɛ, dɛkalkɛ he kpeɡri ɡwaa mɛ. Nɛra dɛ muɡli n baah, tɔpebir bwaa baa mam mɛ.

⁸ N dɛ ba waa bola aa, lɔŋɔree mɛɛ do, dɛɛ bol yoi ne kwaa chɔɡa wa. Waa Korowii waa la aa kpɔa tɛ mɛ laanee, chɛɡa ne bammuɡla tɔpebir bwa.

⁹ Kɛ dɛ n ŋɔ maa Korowii sɔnee yerɛ, kɛɛ dɛ́ bol waa o sɔn ta kpa aa, o waa la yon do n bambile bini, dɛɛ fuh n hoɡa bini kɛŋɔ nii ken. N yon takapɔ ŋɔ n lawɛ n te, kɛ dɛ n horɔ.

¹⁰ N dɛ no nɛra bwa aa dɛ ŋwalɛ ŋɔ, “Ɔmee kohona bar yaa cheme! Hé ɡel ya kpɔ o waa ka bil nomonome sie.” N daamanar ɡba dɛ nyin n harɛ lɔe, dɛɛ ŋɔ, “Nomɛl ken ɛɛ won neɡro, ásɛ ya won lawɔ, dɛ́ bɔ ya kem.”

¹¹ Kɛ hen Korowii, he ja n nɛɛ kɛŋɔ banyoo ken, anomanta, nɛra baa cheɡɛ n nɛɛ bwa ɛɛ horɔɔ. Sihiih ɛɛ kpo ba saŋ bɛlbwaa dɛɛ la, dɛkalkɛ ba wobɛlbwa aa maɡra ba. Nɛra aa sihiih baa di la soeh ba bwa.

¹² Koranar Bwa Kooro, henee dɛɛ nyiŋi nɛn o wa aa toɡra bini, dɛ jemɛ waa aa lɔ o bambile ne o liire bini. Anomanta, ɡel n na kembɔr haa kpɔ tɛ n dɔma, dɛkalkɛ he nɔn taa n kpɔ n waa do.

¹³ Hé ɡo yela kpɛɛ Korowii. Hé jam Korowii. Onee lɛ nyaara dɛɛ le nyubinikpeɡ tena nɔn ta.

¹⁴ N taah nyoa tɔpere baa lol mɛ o ta. Soh tɔpere n nya aa lol mɛ wa.

¹⁵ Nyotaahna lawɛ naate waa ɡela n mɛɛ no a wa, dɛ ɡel o sie lɛ dɛ ŋɔ, “Ba lolɛ bibaa tɛɛ” la.

¹⁶ Kórowii ɛ naate ó do kɛ bwɛjena waa chɔɡa, o ta ba nɛɛ sune la ken. Ó ɡel naate ɛɛ no wii ɡbɔɡa chɔɔ, dɛɛ no laa lɔŋɔre ɡe webaŋa,

¹⁷ dɛkalkɛ naate ta men kpoe n nya tea bini, ásɛ bela fee ber mɛ lalbɔɔ.

¹⁸ Bɔkwa waa ɡela ba lol mɛ te nɔ? Ń ba na wenaale dɛɛ di suna, ásɛ sihiih kpo mɛ n soɡa bini bwa waa kɛɛ?