Jeremia 19 - mzwDBL

Jeremia ne leo bɛl waa paɡra wa

¹ Korowii berɔ ŋɔ men Jeremia be ŋɔ, “Ir la ka yawɛ leo le o mamaa be. Kpɔ bwɛjen la nomonome ne sɔfore la bane ja he nɛ,

² ásɛ he la Jerusalam Bɛn Henɔm Fɛlembɔjen waa bɛne Kaŋli Doonyoa la ta. He tel bela aa, hé bol waa maa bol he be la.

³ Korowii ŋɔ n be ŋɔ, ‘Juda koranar ne Jerusalam tena, hé bwa cheɡ deŋne no men Koranar Bwa Kooro, Israel tena aa dɛ tom mɛ aa dɛ bol. N dɛ ba wenaale kpɔe ba ta harɛ nɔ ta, á ɡel nomɛlbwa waa no la, o bwara yɔr kohona.

⁴ Waa maa dɛ ba ba ɛɛ laanee la, dɛkalkɛ ba vɛɛh mɛ dɛ kpɔ harɛre ane voɡare ba su bonɔ bwa. Ba fuh saraha kwaa tɛ voɡare ba ɡbabir kɛɛ ba naawa, kɛɛ Juda koranar ɡba aa wola an jemɛ bwa. Dɛ kpoo nɛra baa wola wechɔɡa bɛlbwa ɛɛ, ba chale su bonɔ.

⁵ Ba ma kwaa baa ɛ sarahare a ta tɛ voɡ Baal, dɛ fuh ba bibaala ɛ sarahare dɛɛ tɛo. N ta ban doe ŋɔ ba ɛ ɡɛ, a toole n liire ta kwaraa.

⁶ Anomanta, tɔpere bɛl dɛ ba bala, ásɛ nɛra aa bonɔ Tɔfɛt kɛɛ Bɛn Henɔm Fɛlembɔjenii yerɛ kpa. Baa dɛɛ yerɔ Nɛŋkpoa Fɛlembɔjenii.

⁷ Bonɔɔ mɛɛ ba Juda ne Jerusalam tena vɔrɔwa baa vɔrɔwa bil bwa chɔɡa. Mɛɛ ɡeloo ba dɔma pɔ ba nɛɛ dɛ́ kpoo ba laa ta, ásɛ ba ola berɛ jumbii ne kpɔɡ bini ola kondikwa.

⁸ Chɔɡa kohona waa do kenii mɛɛ ba kpɔe ba ta bwɛjen nɔ ta, ásɛ o berɛ kon nɛra baa teŋa baa kaa na, dɛ́ ɔmɛ ba nyoa kpo, o nɛra bola baa do ba wa.

⁹ Ba dɔma ɛɛ ba bar bwɛjen laanee dɛɛ nyin dɛ́ kpo o bini nɛra. Kwaa baa ma dɛ́ che a ta jo ba be ɛɛ do ɔmaa kohona, a ɡel lɔr chole o nɛra nɛ, ásɛ ba kpoo dɔŋa dɛɛ chwe, hale ba bibaala ne bihaahna bwa.’ ”

¹⁰ Ate, Korowii ŋɔ ń paɡre leo la nɛra n ne baa la bela la siwi ta,

¹¹ asɛ n ŋɔ Koranar Bwa Kooro ŋɔ, “N dɛ ba bwɛjen nɔ ne o nɛra chɔɡa, ó do kɛŋɔ leo waa paɡra baa wola won kwaa mao kpa. Baa huɡe nɛra Tɔfɛt belaa, ka tel kɛŋɔ bɔr aa wola lee do baa huɡ ba kpa.

¹² Gɛɛ mɛɛ ba kpɔe ɛ bwɛjen nɔ ne o nɛra. Mɛɛ ɡeloo ó do kɛŋɔ Tɔfɛt la ken. Men Korowiirii bola.

¹³ Jerusalam deene bini ne Juda koranar deene, ne saldor baa fuh daawiile dɛɛ tɛ weweela, dɛ bela baa fuɡe sen ɛ saraha dɛɛ tɛ voɡare bwa ɛɛ kah doŋaa kɛŋɔ Tɔfɛt ken.”

¹⁴ Belaa men Jeremia le Tɔfɛt bela Korowii aa tom mɛ n ka bol o waa la. Asɛ n ka che Korowii Dea dembaah bela dɛ ŋɔ nɛra la bwa be ŋɔ,

¹⁵ “Koranar Bwa Kooro, Israel tena aa dɛ tomɔ la ŋɔ, ‘Hé no! N dɛ ba wenaale bwa maa ŋɔa ŋɔ mɛɛ kpɔɔ ba ta bwɛjen nɔ ne bwɛjeɡre bwa aa baro bwa nɛra nɛɛ la ne, dɛkalkɛ ba ɛ lwɛmkpeɡ tena dɛ vɛh n waa la noe.’ ”