Jeremia 18 - mzwDBL

Jeremia la vimamaa bɛl dem

¹ Korowii berɔ bol waa men Jeremia be ŋɔ,

² “Ir dɛ́ la vimamaa dem, belaa mɛɛ ba n bol waa he be.”

³ Anomanta, n iro dɛ tu la vimamaa la dem, dɛ ka na kɛ o soɡo dɛɛ ma.

⁴ Kɛ dɛ o baa na kɛŋɔ vii la bɛlbwa ta kɛrɛdɛ doe o be naa, o yon chɔɡo dɛ́ berɛ kwaa kpɔ ma konfale bɛlbwa waa dɛ nyin.

⁵ Belaa Korowii bol waa n be ŋɔ,

⁶ “Israel tena, maa won ɛ heyaa kɛŋɔ mamaa nɔ aa ɛa nɔ naa? Gɛ choh yon do mamaa nɔn ta la, ɡɛɛ he Israel tena ɡe do n nɔn ta.

⁷ Dɛ saŋ bɛlbwa n ŋɔ mɛɛ chɔɡ harɛ bɛl nɛraa, dɛ́ paɡro dɛ́ kuuɡi o bwa,

⁸ dɛ ɡɛ harɛ nɛra la berɔ charɛ ba liire le ba wechɔɡa ta naa, amɔ te mɛɛ ɡeloo, dɛ́ nyiŋi wenaale n fe aa ŋɔa mɛɛ kpɔɔ ba ta ba nɛɛ la ta.

⁹ Gɛɛ dɛ n ŋɔ mɛɛ che harɛ bɛl nɛra habɔɔ dɛ́ ɡel ba won vɔrɔwe ba bwɛɛ la ó che kiŋkiŋ,

¹⁰ kɛ dɛ harɛ la nɛra berɔ dɛɛ ɛ wechɔɡa baa men duu aa, mɛɛ ɡel wedɛɛɡa n fe aa ŋɔa mɛɛ ɛo tɛɛ ba laanee.

¹¹ Anomanta, ŋɔ Juda tena ne nɛra baa lɔ Jerusalam be ŋɔ kenii men Korowii ɛɛ bol, ‘Hé na, n dɛ ba ń kpɔ wenaale ane ba ta he nɛ, dɛ́ɛ vɔrɔwe he vɔrɔwa ɡe. Anomanta, bɛlbwa charɛ o liire dɛ́ ɡel o ŋwɛnɛre ne o we-ɛɛla do wer.’

¹² Kɛ baa chaŋo ŋɔ, ‘A bɛlbwa ta tɔnɔ dɔe. Ya ɡbabir ɛɛ dɛɛ nyiŋi ya we-ɛɛla taa, ásɛ bɛlbwa ɛɛ teŋɛ o bambikpeɡ ne o wechɔɡa waa ta.’ ”

¹³ Anomanta, waa Korowii aa dɛ bol laanee nɔ. “Bɔɔ harɛre nɛra ŋɔ, ‘Umee no waa nɔ dɔŋa kaɔ? Israel tena fe ɛ nɛndɛɛɡa, kɛ ba ɛ wedoŋa ne waa aa wola were kohona.

¹⁴ Lɛbanɔn dombwea bwa won mwɛɛla le o bwejena dor kwaraa naa? Lɛbanɔn bwejena neerare aa sɔna dɛ palɛ dɛɛ le a ta la ɛɛ won ɡel pala aa?

¹⁵ Kɛ n nɛra te soh n wa. Ba fuh daawiile dɛɛ tɛ voɡa a wa aa wola tɔnɔ dɔe. Ba lɔ na, dɛ ɡel ŋwɛnɛbena la ta kpɔe, dɛ kaa kpɔ ŋwɛnɛfala baa wola a ta jemɛ ta.

¹⁶ Ba harɛ ɛɛ berɛ dimɡbiaa, dɛ́ berɛ waa nɛra aa na dɛɛ mamɛ tɔpere bɛlbwa, ásɛ nɛra baa teŋa baa kaa bwa nyoa kpo dɛɛ viiɡi nyuune.

¹⁷ Gɛ peu yon ta le wee leebɔr la, ɡɛɛ mɛɛ ba ba lɔe peɡre ba dɔma sie. Ba wenaale tɔpere ta la, mɛɛ berɛ habɔɔ kpo ba, maa n sie berɛ dɛ́ cha ba.’ ”

¹⁸ Asɛ nɛra la bane ŋɔ, “Hé ba ya vɔrɔwe Jeremia vɔrɔwa, dɛkalkɛ sɔfore waa baa dɛ bol la ɛɛ do lee, wejerema ɡe webaɡla aa tonɛ, ɡɛɛ Korowii keamere ɡe waa la ɛɛ ba cheɡa. Anomanta, hé ɡel ya nyin waane dawɛ o nɛ, dɛ́ ɡel waa waa dɛ bol la noe.”

¹⁹ Anomanta, men Jeremia soŋɔ ŋɔ, “N Naa Korowii, cheɡ deŋne, dɛ́ no waa nɛra baa hah mɛ aa dɛ bol.

²⁰ A chɛ kɛ bá kpɔ wechɔɡa bɔ wedɛɛɡa kem aa? Kɛ ba kwi nafuɡe dɛɛ nyin mɛ dɛ́ lawɛ. Lii kɛŋɔ n fa cheɡɛ he sie, dɛ bol ba waa tɛɛ ba ŋɔ, hé laa he bandia kpɔ ba nɛ.

²¹ Anomanta, ɡel lɔr kpoo ba bii, kɛɛ ba serewe laa ta. Gel ba haahna ɛ luhaahna dɛ bɛ bii dɔ, ásɛ dɛ ɡel ba kpoo ba jaranar, ásɛ ba bonɔɔna ɡe serewe laa ta.

²² Gel ba dɔma piɡri lɔ ba tɔ ba nɛ, dɛ́ pa ba laala, ásɛ ɔmee laɡ ba baa dooɡe lɔŋɔre, dɛkalkɛ ba kwi nafuɡe dɛ sɔh har mɛ bela, dɛɛ nyin mɛ dɛ́ lawɛ.

²³ Kɛ hen Korowii, he te jemɛ vɔrɔwa bwa baa dɛ vɔrɔwe dɛ́ kpo mɛ. Bɛ ba dichɔɡa kpɔ kɛ ba, kɛɛ dɛ́ fee ba wechɔɡa he sie. Gel ba choɡli chɔ he sie, ásɛ dɛ che he bandia ta tɛr ba deŋne kohona.”