Jeremia 17 - mzwDBL

Juda tena wechɔɡa ne ba deŋnetɛra wa

¹ Korowii ŋɔ, “Juda tena, ba kpɔ buni chwerɛ he wechɔɡa dawɛ he bambili ta, dɛ kpɔ kwɛrboɔ dia ɡwine dawɛ nyeɡlare aa paaɡe saraha kwaa loŋkoni la ta.

² He nɛra laŋɔ kaa tomɛ kwaa haa dɛ ɛ sarahare a ta, ne voɡhaah Asera dajaŋa baa paaɡa dajena mune ne deŋɡarere,

³ dɛ bwejena bwa dor. Mɛɛ ɡeloo he dɔma ba kpɔ he kondɔɔh, ne laala a yoɡ aa kpeɡa bwa, dɛ bwejena dor haa dɛ tomɛ voɡare la do ba nɔn ta, he wechɔɡa bwa haa ɛa harɛ la ta wa.

⁴ Hɛɛ paŋɛ harɛ maa kwaara cheɡ heya o ɛ he kapɛrɛ kon laanee. Mɛɛ kpɔ heyaa do he dɔma lɔɡa hɛɛ tom ba, harɛ haa wola o ta jemɛ bwa ta, dɛkalkɛ he ɡelɔ n baah di, waa wola sɔɔh bwa.”

⁵ Waa Korowii aa dɛ bol laanee. “Nomɛlbwa waa kpɔ o te dawɛ nɛwɛnyini nɛ, dɛɛ hwɛɡɛ o bokpeɡa ta dɛ berɛ habɔɔ kpo men Korowii la, o bwɛɛlɛ.

⁶ Naate ɛɛ doo kɛŋɔ dajeɡa waa cheɡɛ pua hɛŋle ɡbo harɛ ta. Wobɛlbwa aa werii do tɛo. Harɛ waa hola dɛ peɡri, nomɛlbwa aa wola won so o ta, komɛlbwa ɡe aa wola won kpeɡ o ta la, o taa wɛɛ ba cheɡa.

⁷ Kɛ nomɛlbwa waa kpɔ o te dawɛ n nɛɛ la, o na som.

⁸ Naate ɛɛ doo kɛŋɔ daa baa duu nee nyoa, o dɛ ta lune kaa nee la ta. Hwel cheɡɔ waa, aa on wobɛlbwa ɛ, dɛ o te ta dɔ papooni. Bwaala ta nɛɛ benanyobir kwaraa naa, dɛ o ta won nɔna.

⁹ Umee dɛ́ won jemɛ nɛwɛnyini bambile bini waɔ? Wobɛlbwa toole o bini ka ja neɡra ɡbo, nomɛlbwa aa wola won kwaaro.

¹⁰ Men Korowii te, n dɛ nyiŋi nɛn liire bini, dɛ́ jemɛ anɔ la bwa aa lɔ o bambile ta. Dɛ́ che bɛlbwa we-ɛɛla ta tɛo, o kembɔr ɡɛ aa chɛo.”

¹¹ Nɛn waa dɛ nyin suuɡa sibeɡra ne la, o do kɛŋɔ jal waa tee hala aa wola o kwaa ɛɛ. Naate soɡa bini tama la, wɛɛ paŋɛ o kondɔɔh laanee, ásɛ a habɔɔ ó na kɛ o ɛ ɡɛnewa.

¹² Jeremia ŋɔ, “Saŋ la bwaa Korowii Dea yaa dɛ tomɔ o bini do kɛŋɔ kookara Korowii jirima aa lɔ o ta, asɛ o che bwejen doa.

¹³ N Naa Korowii, he nɛɛ Israel tena sie dawɛ, sihiih ɛɛ kpo nɛra baa berɛ habɔɔ kpoe bwaa. Nɛra baa chwaa le he be bwa sɔna ɛɛ nyoɡroo kɛŋɔ nɛra baa serewa ken. Dɛkalkɛ ba vɛh hen haa do kɛ nee waa dɛ bule saŋ bɛlbwa dɛɛ tɛ Israel tena.

¹⁴ N Naa Korowii, chaah mɛ ásɛ n bwara sɔɔh mɛ kɛrɛdɛ. Lɛɛ mɛ ásɛ n dɔ bosɔɔhna kohona, dɛkalkɛ henee mɛɛ kpɛɛ saŋ bɛlbwa.

¹⁵ Juda tena teŋɔ dɛɛ bol n be ŋɔ, ‘Leperaa waa Korowii aa ŋɔa aa chiɡu la dɔɔ? Gel á ba ya na.’

¹⁶ N ta vɛɛh kɛŋɔ mɛɛ nyiŋi he nɛra nɛɛ kɛŋɔ peteɡre, maa nyin kɛ he kpɔ sibeɡra tɔpere bɛlbwa ba ba nɛ. Wobɛlbwa aa le n nyoa la chɔ he sie.

¹⁷ Bɛ men ɔmee kohona dɛɛ do, henee n chwa baa marɛ sibeɡra tɔpere.

¹⁸ Gel sihiih kpo nɛra baa cheɡɛ n nɛ, kɛ bɛ ɡel sihiih kpo mɛ. Gel ɔmee laɡ ba kohona, dɛ laa ɔmee kohona kpɔ n nɛ. Gel ba na he sibeɡra tɔpere la, dɛ́ chɔɡ ba, dɛ́ berɛ chɔɡ ba ja.”

Ona Tɔpere dii wa

¹⁹ Waa Korowii aa bol men Jeremia be laanee nɔ. “Ir la ka che doonyojen baa dɛ yerɔ Nɛra Doonyoa, bela Juda koranar aa kpɔa jo dɛɛ le, ásɛ dɛ ka che Jerusalam doonyojena bwa ɡe ta,

²⁰ dɛ́ ŋɔ ba be ŋɔ, ‘Hé cheɡ deŋne dɛɛ no Korowii wa, hé Juda koranar ne nomɛlbwa waa soɡe Jerusalam dɛ che doonyoa nɔ ta dɛɛ jo bwa.

²¹ Hé nyiŋi kɛrɛdɛ dɛ bɛ bone che Ona Tɔpere, kɛɛ dɛɛ che bone dɛɛ kpɔ Jerusalam doonyojena ta.

²² He bɛ bone bɛlbwa kpɔ le he deremi ta, kɛɛ dɛɛ ɛ toma Ona Tɔpere la ta. Hé ɡel ó do ɡoroŋ ɡɛ maa do he naawa la.

²³ Kɛ ba ta deŋne cheɡɛ, ba ɛ deŋnekpeɡ, ba ta n be noɛ á ba ɛ kɛŋɔ baa hweli waanee le n be.

²⁴ Kɛ dɛ he cheɡ deŋne dɛ no n be, he ta bone bɛlbwa kpɔe kpɔ bwɛjen nɔ doonyojena ta Ona Tɔpere ta, dɛ ɡel tɔpere la do ɡoroŋ, he ta toma bɛlbwa o ta ɛɛ yaa,

²⁵ amɔ bwɛjen nɔ doonyojena taa koranar baa soɡe Kooro Devid kookara ta, ne ba nomonome ɛɛ ba kpɔe dɛɛ jo. Ba ne ba nomonome ɛɛ so jaɡre ne kwaa aa do kɛŋɔ torɔɡore taa ba, ásɛ Juda baala ne nɛra baa lɔ Jerusalam bwa ɡe ja, ásɛ nɛra so bwɛjen nɔ ta saŋ bɛlbwa dɛɛ la.

²⁶ Nɛra ɛɛ le Juda bwɛɛre ne bwɛjeɡre aa bar Jerusalam, ne Bɛnjamen dea harɛ ne wee cholibɔr bwea lɔɡre bwɛɛre, ne deŋɡarere harɛ, dɛ Nɛɡɛv waa ɛ pua hɛŋle ɡbo harɛ, dɛ́ kpɔ saraha kwaa baa fuah ne anɔ la baa kpoora, ne mea sarahare, ne daawiile a sɔɔh aa soma, dɛ jam saraharee ba Korowii Dea.

²⁷ Kɛ dɛ he taŋ deŋne he ta Ona Tɔpere la dii o do ɡoroŋ, dɛ che bone dɛɛ jo Jerusalam doonyojena la ta naa, amɔ mɛɛ choŋi nii aa wola dime bwaa Jerusalam doonyojena bwa ta, ásɛ dekpeɡa bwa fuh.’ ”