Jeremia 15 - mzwDBL

Wekpeɡa aa dɛ ba Juda tena nɛɛ wa

¹ Belaa Korowii bol n be ŋɔ, “Hale Mosis ne Samoɛl ba fa aa ɛ n bonɔɔna baa che n sie dɛɛ soŋe kwaraa naa, maa nɛra nɔ nɛɛ sune. Gel ba kaa, bá le n sie bonɔ kaa.

² Asɛ dɛ ba bɔɔre ŋɔ, ‘Leperaa yaa ba kaala aa,’ hé ŋɔ ba be ŋɔ waa Korowii aa dɛ bol laanee nɔ, ‘Weechɔɡaa dɛ́ kpoo bane, baa kpoo bane ɡe laa taa, ásɛ lɔr kpoo bane ɡe, mɔɔ ba lawɛ bane laa ta kaa bojaŋ harɛre ta.’

³ Men Korowii ɛ n liire kɛŋɔ wekpeɡa bele anaarɛɛ mɛɛ ba ɡela ba na. Baa kpoo ba laa taa, ásɛ nyootena tuɡ ba ka ta. Jumbii ne kpɔɡ bini olaa dɛ́ di ba ola kabora.

⁴ Mɛɛ ɡeloo harɛre nɛra bwa bambile teŋe ba wa, waa Juda Kooro Hɛsɛkea bibaa Manasɛ aa ɛa Jerusalam la wa.”

⁵ Korowii ŋɔ, “Jerusalam tena, umee dɛ́ sune he nɛɛ jaɔ? Nomɛl lole dɛ́ wi tɛ heya aa? Umee dɛ́ bɔɔ heyaa he bokpeɡa dɔe waa jaɔ?

⁶ He berɛ habɔɔ kpo mɛ, he deno na teŋɛ dɛɛ vɛɛh mɛ. Anomanta, mɛɛ kpɔ nɔnee dawɛ he nɛ dɛ́ chɔɡ heya, maa won dɔ tedoma tɛ heyaa kpa. Korowiirii bola.

⁷ Mɛɛ lɔ heyaa peɡre, ɡɛ ba yon palɛ mea la ken, bwɛjen doonyojena la ta. Mɛɛ kpoo he ne he biirii, dɛkalkɛ he ta liire charɛ le he wechɔɡa ŋwɛnɛre ta.

⁸ Mɛɛ ɡeloo luhaahna warɛ harɛ la ta, dɛ́ ɡwaa mpo nyoa hɛŋle. Mɛɛ ɡeloo he dɔm ba chɔɡ bonɔɔna ne ba nyare webaŋkpelaa, ásɛ dɛ kpɔ bambiteŋa ne ɔmee kohona ba ta he nɛ.

⁹ Bii banuanɛ nya bwara ɛɛ yɔroo ó hwaahɡe. Webaŋkpela ɛɛ berɔ jwaanaa, ásɛ sihiih kpoo o bambile ɛɛ weo. Mɛɛ ɡeloo he dɔma ba kpoo he bini banɔ la baa kaa la. Men Korowiirii bola.”

¹⁰ Asɛ men Jeremia ŋɔ, “Akwe, n nya, n na waa kɛ haa lol mɛ, harɛ nɔ nɛra bwa hah mɛ dɛɛ yoo mɛ. N ta bɛl kon kemɛ kɛɛ dɛ kemɛ le bɛl be, kɛ nɛra bwa ɡarɔ dɛɛ taah mɛ.”

¹¹ Korowii ŋɔ, “Kasinteŋ, mɛɛ lɛ heyaa, ásɛ wobɛlbwa maɡre tɛ heya, dɛ́ ɡel he dɔma ba ɡuŋi heyaa harɛ, he wenaale ne suna dii tɔpera ta.

¹² Umee dɛ́ won ku buni ɔ? Gɛɛ haa wola won yo he dɔma baa do kɛŋɔ buni ayaawa aa koo o ta o do kpeɡri, ba le weekaŋle nyunduabɔr.

¹³ He wechɔɡa aa kana harɛ la ta bwa nomanta, mɛɛ ɡeloo dɔma pa he kondɔɔh, ne laala a yoɡ aa kpeɡa bwa kɛŋɔ laa ta kwa, ásɛ a ɛ deŋnetɛra tɛ heya.

¹⁴ Mɛɛ ɡeloo he do he dɔma lɔɡa dɛɛ tom ba harɛfale haa wola o ta jemɛ ta, dɛkalkɛ n bandia iro dɛɛ fuh kɛŋɔ nii dɛɛ ba he nɛ.”

¹⁵ Belaa men Jeremia ŋɔ, “N Naa Korowii, he ɡbabir jemɛ waa nɔ mun, lii n wa, dɛ́ nyiŋi n nɛ. Bɔ n dɔma baa dɛ nyin mɛ dɛ́ kpo kem. Bɛ so nyiŋi bá dɔ bɔr dɛ́ ba kpo mɛ, dɛ́ na kɛŋɔ he waa mɛɛ na anɔ bwa.

¹⁶ Korowii Waa Ɛ Kpeɡri Bwa Dɔɔ, haa bol waa n be la, n cheɡ deŋne dɛ́ noa. A ɛɛ mɛ silɛɛ n bambile lawa, dɛkalkɛ henee dɔɔ mɛ.

¹⁷ N laa n te kpɔ nɛra baa soɡa dɛɛ do ɡbɔɡa, dɛɛ hɛɡre kɛŋɔ sennyɔdɛɛra bini. N ɡbo soɡo, dɛkalkɛ he ja n nɛ, asɛ bwaawee far mɛ.

¹⁸ Ɛrɛɛ n bonyɛɡa aa wola tonɛ, asɛ ba do mɛ bol kohona, maa wola chaah dɔ nɔɔ? He do kɛŋɔ nenabɔɔ kɛɛ bule hwel saŋ, nee aa wola toole a ta tɛ mɛ kɛɛ?”

¹⁹ Anomanta, waa Korowii aa dɛ bol men Jeremia be laanee nɔ, “He berɔ ba n be naa, mɛɛ lɛɛ, ásɛ he berɛ ɛ n keame. He dɛ bol wobodɛɛɡa, dɛ anchɔɡa laa aa, hɛɛ bol n waa dɛɛ tɛ mɛ. Gel nɛra nɔ no, dɛ́ ba he be, he te laa dɛ́ la ba be.

²⁰ Mɛɛ ɡeloo he do kpeɡri kɛŋɔ danjwɛkpeɡ tɛ nɛra nɔ, danjwɛkpeɡ tenten baa kpɔ ayaawa ɛo. Baa yoi kɛ baa won pɔ he nɛ, dɛkalkɛ n ja he nɛɛ dɛ́ lɛɛ. Men Korowiirii bola.

²¹ Mɛɛ lɛɛ le nɛnchɔɡa nɔn ta, dɛ́ ɡel ba nyubinikpeɡ waa baa dɛ vɔrɔwe bwa ɛ pɛɛ.”