Jeremia 13 - mzwDBL

Yapondɛɛɡe kiriso wa

¹ Korowii berɔ bol men Jeremia be ŋɔ, “Ka yawɛ yapondɛɛɡe dɛ́ ɛo kiriso vɔwɛ he chara. Bɛ ɡel nee leɡo.”

² Anomanta, n kaa yawɛ yapondɛɛɡe kiriso la, dɛ kpɔ vɔwɛ n chara, ɡɛ Korowii aa ŋɔ n be la.

³ Belaa o berɛ bol waa n be ŋɔ,

⁴ “Kpɔ kiriso haa yawa dɛɛ vɔwɛ chara la, dɛ́ kpɔ kaa Yufretis Moo ta ka sɔh o bwebɔɔne bini taraken.”

⁵ Anomanta, n laŋɔ dɛ ka kpɔ do Yufretis Moo bwebɔɔ bini, ɡɛ Korowii aa ŋɔ n be la.

⁶ A habɔɔ la, Korowii berɔ bol waa n be ja ŋɔ, “La Yufretis Moo ta ka kpɔ kiriso maa ɡela he kpɔ ka sɔh la ba.”

⁷ Anomanta, n laŋɔ dɛ ka kwi bela maa kpɔa huɡe la. Kɛ dɛ o bwa chɔɡɔ kwaraa, o ta wobɛlbwa ɛɛ doe.

⁸ Belaa Korowii bol waa n be ja ŋɔ,

⁹ “Gɛ kiriso la aa chɔɡa la, ɡɛ tentenee mɛɛ ba Juda ne Jerusalam tena baa dɛ ɛ mbarafo la chɔɡa.

¹⁰ Gɛ nyubinikpeɡ tena nɔ vɛh n waa ta teŋa. Ba deŋne kpeɡri, ba nyu bini do kpeɡri kohona, asɛ dɛ kaa tomɛ harɛre ane voɡare. Anomanta, baa doo kɛŋɔ kiriso waa chɔɡa, waa wola ɛɛ doe kpa la ken.

¹¹ Gɛ ba yon kpɔ kiriso vɔwɛ chara la, ɡɛɛ n lawɛ Israel ne Juda tena vɔwɛ n te. Ásɛ ba fe ɛ n nɛra, dɛ́ kpɔ kpɛɛra ne duure tɛ mɛ. Kɛ ba vɛh n waa noe. Men Korowiirii bola.”

Sen loŋa ane wa

¹² Korowii ŋɔ n be ŋɔ, “Jeremia, ŋɔ Israel tena be ŋɔ sen loŋ bɛlbwa chɛ kɛŋɔ hé do sen o bini ó su. Baa chaŋo ŋɔ ba jemɔ kɛŋɔ sen loŋ bɛlbwa chɛ kɛ ó su sen.

¹³ Ásɛ he berɛ ŋɔ ba be ŋɔ men Korowii dɛ ba ɡela nɛra baa soɡe harɛ la ta dɛɛ, kɛŋɔ baa nyɔ sen ken. Hale koranar baa ɛ Kooro Devid naanar, ne sɔfore ne n keamere, dɛ banɔ la baa soɡe Jerusalam bwa jao.

¹⁴ Mɛɛ laɡ baa lɔ dɔŋa, kɛŋɔ ba yon kpɔ loŋa lɔ dɔŋa a paɡre la ken. Hale mɛɛnanar ne ba bii bwa. Maa bɛlbwa sumii na, kɛɛ dɛ́ dɔ tedoma tɛ nomɛlbwa ŋɔ maa ban chɔɡ. Men Korowiirii bola.”

Jeremia ja nɛra mbarafo ɛɛ wa

¹⁵ Israel tena, Korowiirii bol waa la. Hé cheɡ deŋne dɛɛ no o be, he bɛ deŋnekpeɡ ɛ.

¹⁶ Hé tɛ Korowii haa dɛ tomɔ nɔ jirima mɔɔ o ɡel bɔr bir, ásɛ he bɛ naa lɔ deŋɡarere dor. Hé dɛ nyin kɛ bɔr chaah he nɛ, kɛ wɛɛ berɔ ɡel bɔr chaahna la berɛ biro ta he nɛ, dɛ́ bir kpirkpir ken.

¹⁷ Kɛ dɛ he vɛh o waa la noe yaa, sɔeh mɛɛ ba sɔeh dɛ́ wi, he mbarafo wa. Mɛɛ wiu kohona siniire yɔɔ mɛ, lawa baa lawɛ Korowii nɛra laa ta kaa bojaŋ harɛ ta la wa.

¹⁸ Korowii berɔ ŋɔ ń ŋɔ kooro ne o nya be ŋɔ, “Hé le he kookane ta tu ba, dɛkalkɛ he kooɡbɛrɛre aa wera dɛ́ ba he nyuune ta lee.”

¹⁹ Baa tɔɔɡe Juda weekaŋle harɛbɔr bwɛjena ɡbenii baa wola won yaa, dɛkalkɛ ba dɔma baa chɔ bar bwɛɛ la. Baa lawɛ Juda tena bwaa kaa bojaŋ harɛfala ta.

²⁰ Hé ha sie nyiŋi, he dɔma le weekaŋle nyunduabɔr dɛɛ ba. Leperaa nɛra baa lɔ he nɔn ta, he koh ba waa dɛɛ ɛ mbarafo la dɔɔ?

²¹ Dɛ nɛra haa dɛ lii ba he daamanar baa yo heya, dɛ pɔ he nɛɛ he do ba lɔɡa aa, bɔkwa waa hɛɛ ba bola ɔ? Hɛɛ doo kɛŋɔ haah loltea aa lɔɔ wɛɛ ba lola ken.

²² Kɛ he berɔ ŋɔ, “Ɛrɛɛ ɡɛ waa nɔ pu yaa nɔɔ?” He wechɔɡa kohona waa he bwara laala kɛɛ, a ɡel he bwara ɛɛ nyɛɡ kohona la.

²³ Itiopia te ɛɛ won charɛ bwadabi aa? Kɛɛ noniete ŋɔ waa nyin kɛ o bwara lɛɡre aa? Gɛɛ he nɛra wechɔɡa aa jooɡe heyaa nɔ aa wola won ɡel hɛɛ ɛ wedɛɛɡa.

²⁴ “Mɛɛ lɔ heyaa peɡre kɛŋɔ, peu yon ta haahra ɛɛ kaa la ken.

²⁵ Anɔ la aa chɛ kɛŋɔ hé dɔ laanee la, anee n maɡɛ tɛ heya, dɛkalkɛ he vɛɛh mɛ dɛ kaa tomɛ voɡare a wa aa wola kasinteŋ dɔe. Men Korowiirii bola.

²⁶ Anomanta, mɛɛ ɡbaa he bwara laalaa kaa nyundua, ásɛ nɛra na he ncho dii, sihiih kpo heya.

²⁷ N jemɛ he jwamane ne pɛlchɔɡa we-ɛɛla wa. Dɛ na ɡɛ haa tomɛ voɡa deŋɡarere dor ne kpɔɡ bini ba fe aa kia la. Jerusalam tena, hé bwɛɛlɛ. Saŋ besoo he kah doŋa ka tel ɔ?”