Jeremia 11 - mzwDBL

Korowii ne Jeremia fɔo fɔwa wa

¹ Korowii ŋɔ men Jeremia be ŋɔ,

² “Cheɡ deŋne, dɛ́ no waa aa lɔ n ne he fɔo yaa fɔwa la ta, ásɛ dɛ bol baɡle Juda harɛ ne Jerusalam tena bwa.

³ Ŋɔ ba be ŋɔ men Korowii Israel tena aa dɛ tom mɛ ŋɔ, nomɛlbwa waa wola waa aa lɔ fɔo nɔ ta teŋɛ la, nyotaahna lawɔ.

⁴ A ɛ waa maa do ba naawa ɡɛ saŋ maa laɡ ba le Ijipt harɛ waa do wɔrɔbe ba nɛɛ kɛŋɔ nii aa won buni mwɛɛla la. N ŋɔ ba be ŋɔ, baa duu mɛ dɛɛ teŋɛ wobɛlbwa maa do ba a ta la ta, ásɛ ba ɛ n nɛra, n ɡe ɛ Korowii baa dɛɛ tom mɛ.

⁵ Belaa n fe ɛɛ ba harɛ maa baɡɛ ba naawa nyoa ŋɔ o ɛ harɛpare ondɛɛɡe la kpɔe tɛɛ ba ó ɛ ba kon. Harɛ baa soɡe o ta fini nɔ.” Anee n chaŋe ŋɔ, “N Naa Korowii, á ɛ ɡɛ.”

⁶ Anee Korowii ŋɔ n be ŋɔ, “Ka bol ɡɛ waa nɔ bwa Juda bwɛjena ta, ne Jerusalam fɔɡbaahna. Bol nɛra la ɡe be ŋɔ bá cheɡ deŋne dɛ́ no waa aa lɔ fɔo nɔ ta kɛrɛdɛ dɛ́ɛ teŋɛ a ta.

⁷ Le saŋ maa lawɛ ba naawa le Ijipt harɛ ta ba le fini, keraŋwɛnɛ bwaa n kah ba ŋɔ baa duu mɛ.

⁸ Kɛ ba ta deŋne cheɡɛ dɛ no n be. Dɛɛ teŋɛ ba deŋnekpeɡ we-ɛɛla ne wechɔɡa ta. Anomanta, n kpɔ taahna bwa aa lɔ fɔo la maa do ba ŋɔ ba fe ɛɛ teŋɛ a ta la ba ta ba nɛ, dɛkalkɛ ba ta n waa la noɛ.”

⁹ Anee Korowii berɛ ŋɔ n be ŋɔ, “Juda ne Jerusalam tena dɛ vɔrɔwe n vɔrɔwa.

¹⁰ Ba charɛ ba liire dɛɛ ɛ ba naawa wechɔɡa baa ɛa la, dɛ vɛh n waa ta teŋa. Ba kaa teŋɛ voɡare ane nɛɛ dɛɛ toma. Israel ne Juda tena bwa chɔɡ fɔo n ne ba naawa aa fɔwa la.

¹¹ Anomanta, men Korowii ŋɔ mɛɛ kpɔ wekpeɡa baa wola won le a nyoa ba ta ba nɛ. Ba wio dɛɛ yer mɛ kwaraa naa, maa ba bee no.

¹² Juda bwɛɛre ne nɛra baa lɔ Jerusalam ɛɛ wiu yerɛ voɡa baa dɛ fuh konsɔɔhsoma a ta laanee, kɛ wekpeɡa la balaa, aa won cha ba.

¹³ Juda tena voɡare warɔ kɛŋɔ ba bwɛjena ken, asɛ kwaa baa dɛ fuh konsɔɔhsoma a ta dɛɛ tɛ ba sihihvoɡ Baal ɡe warɛ, kɛŋɔ Jerusalam fɔɡbaahna aa wara la.

¹⁴ Jeremia, bɛ nɛra nɔ naa ta che soŋe le n be tɛɛ ba, dɛkalkɛ ba wio yer mɛ ba sibeɡre wee ta naa, maa ba bee no.

¹⁵ N nɛra maa dɛ nyin ba ta ŋwɛnɛ dɔe dɛ́ so n Dea kpa. Ba ɡalɡa nyu bini kpeɡri, hale dɛ yon kpɔ n saraha kwaa ba fe aa fuh tɛ mɛ la le kaa. Kɛ dɛ n kpɔ wenaale ba ta ba nɛ aa, ba sie aa lɛ kpa.

¹⁶ N fa ŋɔ ba do kɛŋɔ ɔleve daa waa kpeɡa kohona dɛ dɔ papooni, asɛ nɔndɛɛɡa su o bwa, dɛ do wer. Mɛɛ ɡeloo peukpeɡ ta kerabeŋkpoŋ, ásɛ nii le o papooni ta, dɛ́ kuuɡi o kpala.

¹⁷ Israel ne Juda tena fa do kɛŋɔ daa men Koranar Bwa Kooro aa dua, kɛ taraken n liiro kɛ ń kpɔ wahala ba ta ba nɛ. Ba wechɔɡa waa a ɡɛ waa nɔ ɡure ba nyu ta. Dɛkalkɛ ba ɛ wechɔɡa dɛ jo n nɛ, dɛ kaa fuh daawiile voɡ Baal ta dɛɛ muɡli n baah.”

Jeremia kpoe vɔrɔwa wa

¹⁸ Korowii ɡelɔ men Jeremia jemɛ vɔrɔwa n dɔma aa dɛ vɔrɔwe n wa.

¹⁹ Dɛ n do kɛŋɔ pebie waa pwɛra ba lawɔ dɛɛ kaa kpobɔr ken. N ta jemɛ kɛŋɔ ba dɛ vɔrɔwe n bwara wechɔɡa ŋɔ, “Hé ɡel ya kpo Jeremia ɡɛ ba yon chɔɡ daa ne o nɔna bwa la, dɛ́ kpoo le harɛ nɔ ta, ásɛ o sɔn den he kwaraa.”

²⁰ Ate, Jeremia soŋe ŋɔ, “Koranar Bwa Kooro haa dɛ pa bole aŋwɛnɛ ta dɛɛ nyiŋi ɡɛ nɛn liire ne o bambile aa doa, tɛr ba deŋne, dɛ́ bɔ ba kem, dɛkalkɛ he nɔn taa n kpɔ n waa do.

²¹ Anomanta, Korowii ŋɔ Anatɔt baala bane ŋɔ n bɛ Korowii waa bol o sɔn ta, ɡɛ laa aa baa kpo mɛɛ.”

²² Anomanta, Koranar Bwa Kooro ŋɔ, “Mɛɛ tɛr ba deŋnee. Baa kpoo ba bonɔɔna laa taa, lɔr kpo ba bibaala ne bihaahna ɡe ba serewe.

²³ Ba bini bɛlbwa toole dɛɛ ba kae, dɛkalkɛ chɔɡa tentenee mɛɛ ba kpɔe ba ta Anatɔt baala nɛ, ba deŋnetɛra bena la ta.”