Jeremia 10 - mzwDBL

Korowii ne voɡare wa

¹ Jeremia berɔ ŋɔ Israel tena be ŋɔ, bá cheɡ deŋne dɛ́ no waa Korowii aa dɛ bol ba be ŋɔ,

² “He bɛ harɛre nɛra bane we-ɛɛla ta dɛɛ teŋɛ. He bɛ waa aa dɛ chiɡ nyundua, dɛɛ baɡle waane aa ha heya, a lole kɛŋɔ harɛre nɛra bane te dɛ ɔma.

³ Ba nawee waa bwa ɛ wepuu, ba yon teŋe daa le kɔr bini, ásɛ nɛn waa jemɛ kwaa sɛɛh kpɔ o buni sɛoh.

⁴ Ba kpɔ suuɡaswɛm ne suuɡapoŋa ɛ o bwara, ó do wer, dɛ kpɔ hamba lɔ dadowɛre do o ta, ɡɛ aa ɛ ó che kiŋkiŋ, dɛ bɛ chole.

⁵ Ba ɛa a do kɛŋɔ yakwane baa saɡa koo, dɛ kpɔ dɛɛ doŋi jumbii la ken, ba voɡare la aa won waa bol. Cheɡaa baa chea, dɛkalkɛ aa won valɛ. He bɛ an dɛɛ ɔmɛ, wobɛlbwa toole á won ɛ, kɛɛ dɛ́ won ɛ wedɛɛɡa ane tɛ heya.”

⁶ N Naa Korowii, nomɛlbwa ta kpeɡri dɔe kɛ hen, he kan kohona, nɛra bwa jemɛ kpeɡri kohona haa dɔa wa.

⁷ Harɛre nɛra bwa Kooro, umee dɛ ŋɔ waa duuree kpɔ tɛɛ nɔ? A chɛ kɛ nomɛlbwa duuri. Harɛre bwa nɛra ne wejerema dɛ ba koranar, bɛlbwa ta do kɛ hen.

⁸ Ba bwa ta liire dɔe dɛ ɛ ɡɛna ɡbo. Bɔkwaa baa ba wona hweli le daa voɡare baa ɛa, aa wola tɔnɔ bɛlbwa dɔe ta nɔ?

⁹ Ba yon kpɔ suuɡapoŋa le bwɛjen Taases ne suuɡaswɛm le bwɛjen Ufas ta, dɛ baa ɛ ba voɡare bwara. Nɛra baa dɔ kwaa sɛɛh, ne suuɡaswɛm dɛ yale sɔeh wejema ɡe, yon kpɔ yaburum ne yakɔl ɛ a bwara.

¹⁰ Kɛ hen N Naa Korowii, he waa dɔ kasinteŋ, henee kooro haa lole saŋ bɛlbwa. He baah diu waa, harɛ bwa dɛ chel, harɛre nɛra aa won che he bandia nyoa.

¹¹ Korowii berɔ ŋɔ, “Ŋɔ ba be ŋɔ voɡare aa wola wone ta nyundua ne harɛ nɔ la, a dɛ ba chɔɡa le harɛ nɔ ta kwaraa.”

Korowii kpɛɛra yel

¹² Korowii cheɡɛ o kpeɡri ta dɛ ta harɛ, o wejema nee o ta harɛ nɔ bwa, dɛ che o liire ta dɛ paɡri nyundua ɡe.

¹³ O bol wa aa, bwaala dɛ nɛ dɛɛ kɔɡre nyundujaɡla, o ɡelɔ baama aa dɛ nɛ bwaala ir dɛɛ le harɛ jaɡa. O ɡelɔ bwaala ɛɛ nɛ dɛɛ nyɛɡle, asɛ dɛ ɡel peu ta le bela waa lole.

¹⁴ Nomɛlbwa ta liire dɔe, ba ɡɛnɔ, sihiih kpo nɛn waa kpɔ suuɡaswɛm kwaa o voɡare la. Kwaa waa ɛa la bwa ɛ nyosone, a ta hweera dɔe.

¹⁵ A waa ta tɔnɔ bɛlbwa dɔe, dɛ ɛ kwaa a wa aa dɔ wesoma. A chɔɡa saŋ telo Korowii ba naa, wɛɛ chɔɡ a bwaa.

¹⁶ Kɛ Korowii Israel tena aa dɛ tomɔ la ta do kɛ ban, dɛkalkɛ onee ta komɛlbwa, dɛ le Israel tena tɛ o te, dɛ kpɔ ba ɛ o kapɛrɛ nɛra. Koranar Bwa Kooroo o sɔn.

Harɛchɔɡ waa dɛ ba

¹⁷ Jerusalam tena, hé boa he laala nyoa, dɛ́ le harɛ la ta, he dɔma chɔɔ bar heyaa dɛ́ ba yo heya.

¹⁸ Anomanta, Korowii ŋɔ, “Mɛɛ doŋi nɛra baa soɡe harɛ nɔ taa, dɛ́ kpɔ wenaale kohona ba ta ba nɛ, ásɛ ba laɡ ba kaa.”

¹⁹ Jerusalam tena dɛ dooɡe lɔŋɔre ŋɔ, “Ya na wa, bola baa do yaa wa! Yaa won chah ya ŋwɛra! Ya liiro kɛ yaa koh ya weela taa, kɛ yaa le a nyoa.

²⁰ Ya tɛnte deene chɔɡɔ, a ŋwɛɛra bwa chaa. Ya bii bwa kaalɔ ɡel yaa, beŋkpoŋ kwaraa toole, dɛ́ baŋre ya tɛnte deene, kɛɛ dɛ́ nyin sobɔra tɛ yaa.”

²¹ N chaŋɔ ŋɔ, “Ya sitɔɔla bwa nya liire, baa waa bɔɔrɛ dɛɛ le Korowii be. Anomanta, aa ban kɛrɛdɛ chiɡ, asɛ ba nɛra bwa lɔ peɡre.

²² Hɛ́ɛ no! Waane dɛ ba, laa tena ɡbɔɡa le weekaŋle nyunduabɔr dɛɛ ba, dɛ́ ba chɔɡ Juda bwɛjena á berɛ dimɡbia, ásɛ kalampoŋare kpɔ bela berɛ a soŋnibɔra.”

Jeremia wesoŋa wa

²³ N Naa Korowii, nomɛlbwa ta o nyokala kpeɡri dɔe, bɛlbwa ɡe aa won jemɛ o soɡa waa bini.

²⁴ Kpɔ kasinteŋ ŋwɛnɛ ta toɡ mɛ, he bandia ne laa, ɡɛ laa aa, hɛɛ chɔɡ mɛɛ.

²⁵ Gel harɛre nɛra na he bandia, banɔ la baa wola hen tomɛ, dɛ vɛɛh la. Ba kpoo he nɛra Israel tena dɛ chɔɡ ba harɛ kwaraa.