Jeremia 1 - mzwDBL

¹ Baa bɛl sɔne Hilkia, dɛ o ɛ sɔfore baa lɔ Anatɔt la bɛl, dɛ do Bɛnjamen dea harɛ ta. O bibaa sɔne Jeremia, Jeremia waa waa bola laanee teŋa nɔ.

² Korowii bol waa Jeremia be ɡɛ saŋ Amɔn bibaa Kooro Josia aa di kora Juda harɛ ta bene fi dɛ atoro ta,

³ ne ɡɛ saŋ Kooro Josia bibaa Jehoiakim aa di kora Juda harɛ. A habɔɔ, Korowii berɔ bol waa Jeremia be ka tel Kooro Josia bibaa Sedekia aa di kora bene fi dɛ beŋkpoŋ ta. A ɡɛ bena la korobie anue ta la, ba lawɛ Jerusalam tena laa ta kaa bojaŋ harɛfale ta.

Korowii yera waa yerɛ Jeremia

⁴ Korowii bol waa men Jeremia be ŋɔ,

⁵ “N tɔ sie lee cheɡ dɛ tɛɛ mkpa, mɔɔ ba lolɛ la, dɛ n lee cheɡ, menee lee ŋɔ hé ɛ n keame harɛre nɛra bwa nɛ.”

⁶ Anee n chaŋe ŋɔ, “Nemenɛ Korowii, n ta ɛ bechala, maa wobol jemɛ.”

⁷ Ate, Korowii ŋɔ n be ŋɔ, “Bɛ ŋɔ he ɛ bechala, a chɛ kɛ he la nomɛlbwa maa tomɛ o be la be, dɛ́ ka bol wobɛlbwa maa doe ŋɔ hé bol.

⁸ Dɛɛ berɛ ba ɔma. Mɛɛ ja he nɛɛ dɛ́ lɛɛ. Men Korowiirii bola.”

⁹ Belaa Korowii tɛr nɔn leɡe n nyoa dɛ ŋɔ n be ŋɔ, “Taraken n kpɔ n waa dɛɛ do he nyoa, hé ka bol.

¹⁰ Na, n lee fini dɛ tɛɛ kpeɡri harɛre nɛra bwa nɛ, hé fuɡri dɛ́ kuuɡi dɛ́ chɔɡ, dɛ́ berɛ laɡ ba ir dɛ́ du, bá kpeɡ kɛŋɔ konduula ken.”

¹¹ Korowii berɔ bɔɔ mɛ ja ŋɔ, “Jeremia, bɔkwaa hɛɛ na nɔ?” N chaŋe ŋɔ, “N Naa Korowii, n na almɔn daa kpale.”

¹² O ŋɔ, “He bol kasinteŋ, kɛ n dɛ nyiŋi kɛŋɔ n waa maa bola la bwa ɛ ɡɛ.”

¹³ Korowii berɔ bɔɔ mɛ ja ŋɔ, “Bɔkwaa hɛɛ na nɔ?” Asɛ n chaŋe ŋɔ, “N na vii bɛl nee do o bini, dɛɛ wure kɛŋɔ waa chɔŋɛ nii ta ken, dɛ wɛle le weekaŋle nyunduabɔr.”

¹⁴ Korowii berɔ ŋɔ n be ŋɔ, “Wenaale ɛɛ le weekaŋle nyunduabɔree dɛ́ ba nɛra baa lɔ Juda harɛ ta nɛ.

¹⁵ N dɛ ba nɛra baa lɔ weekaŋle nyunduabɔr harɛre ta bwa yera cheme. Ba koranar ɛɛ bao ba cheɡ ba kookane Jerusalam doonyojena ta, dɛ́ ba yoo ba, dɛ́ kuuɡi o danjwɛjena aa baro, dɛ Juda bwɛɛre bwa ɡe.

¹⁶ Mɛɛ ba bol n nɛra waa dɛ́ tɛr ba deŋne, ba nyubinikpeɡ ne habɔɔ baa bera kpo mɛ la wa, ba fuh daawiile ɛ sarahare voɡare ane ta, dɛɛ tomɛ kwaa ba ɡbaɡba aa kpɔ nɔn ɛ.

¹⁷ Ir, dɛ́ kpɔ he te, Jeremia, dɛ́ ka bol wobɛlbwa maa doe ŋɔ hé bol ba be. Dɛɛ berɛ ba ɔma taraken, he ɛ ɡɛ naa, henee mɛɛ ba ɡela he berɛ ɔm ba kohona ba sie.

¹⁸ Fini, n ɡelɔ he do kpeɡri kɛŋɔ bwɛjen baa ma danjwɛkpeɡ baro, ne buni pila ne ayaawa danjwɛɛ harɛ la ta, ásɛ he won yo Juda koranar ne ba nomonome, sɔfore ne nɛra baa lɔ harɛ la ta.

¹⁹ Baa yoi, kɛ baa won pɔ he nɛ, dɛkalkɛ n ja he nɛɛ ásɛ dɛ lɛɛ, men Korowiirii bola.”