Jems 5 - mzwDBL

Kondɔɔhna jae wa

¹ Kondɔɔhna ɡe, hé no n be! Waa aa dɛ ba heyaa pui la nomanta, hé dooɡe lɔŋɔre dɛ́ɛ wi.

² He kondɔɔh chɔɡɔ, kwaa di he bwara laala bwa.

³ He suuɡaswɛm ne suuɡapoŋa bwa ɡe deero. Awola Korowii aa dɛ ba he waa bola la, he suuɡare aa deera la ɛɛ ɛ danseɛ kɛŋɔ he ɛ wechɔɡa, dɛ́ we heyaa kɛŋɔ nii ken. Bɔkwaa hɛɛ cheɡ suuɡa tɔpera aa ka mun nɔ ta dɛ́ ɛɔ?

⁴ Hɛ́ɛ no! Nɛra haa kpɔ ba, ba ɛ he kooni tomare he ta ban kem bɔe dɛ faah ba la, ba dɛ wi he tɛl. A ɡɛ nɛra la wii chole Korowii waa ɛ komɛlbwa Dɔɔ la deŋna ta.

⁵ He dɔ sobɔrdɛɛɡe harɛ nɔ ta dɛ so, dɛɛ di he bwara. Gɛ haa dɛ di he bwara la, he do kɛŋɔ kondɛɛre baa ku kpɔɡa dɛɛ tɛo ó di dɛ́ je bá kpoo la.

⁶ He pa nɛndɛɛɡa ba wa aa do kaih la bolchɔɡe dɛ kpoo ba, ba ta wone ɛ wobɛlbwa dɛ lɛ ba te.

Bambile lawa wenaale ta

⁷ Kɛ yabala, hé lawɛ bambile, dɛ́ ka tel ɡɛ saŋ ya Dɔɔ la aa ba. Hé na ɡɛ paa yon so kpa bwaala loɡla á nɛ ó du o kwa, dɛ́ lawɛ bambile, ásɛ yoo ɡe yo mɔɔ o koo kwaa la yon ɛ la.

⁸ Gɛ tentenee chɛ kɛŋɔ he ɡe lawɛ bambile dɛ́ che kiŋkiŋ, dɛkalkɛŋɔ he Dɔɔ la bala telo.

⁹ Yabala, he bɛ dɔŋa waa dɛɛ naɡre ásɛ dɛ ba di bolchɔɡe Korowii sie. Ya bole pae dɛ tel.

¹⁰ Yabala, hé nyiŋi Korowii keamere la baa cheɡɛ o sɔn ta dɛ bol waa baɡle nɛra la na, dɛ na ɡɛ baa na wa, kɛ dɛ won lawɛ bambile ba wahala ta la. Hé ɡe ɛ ɡɛ.

¹¹ Ya dɛ yerɛ nɛra baa wona lawɛ bambile, dɛ che kiŋkiŋ la nɛra baa na som. He fa no Job wa, ɡɛ waa wona lawɛ bambile dɛ che kiŋkiŋ o wahala bini ka tonɛ, asɛ a habɔɔ Korowii chao. Nɛra waa dɛ domɛ Korowii tea wɛɛ sune ba nɛ.

¹² Yabala, anɔ la aa jaa dɛ ɛ siswɛm waa laanee kɛ, he bɛ Korowii kɛɛ harɛ kɛɛ komɛlbwa dɛɛ ŋwɛɛ. Ba dɛ bɔɔ heyaa waa dɛ a ɛ kpela aa, hé sɛh ŋɔ, “Ɔɔh,” dɛ nyosone ɡee yaa, hé ŋɔ, “Ɔɔhɔh.” He bɛ ŋwɛɛ ja, ásɛ a bɛ wechɔɡa ɛ dɛ́ tɛ heya.

Korowii soŋa yarada ne

¹³ Dɛ sibeɡrewaane pu bɛlbwa naa, wɛ́ɛ soŋe Korowii. Dɛ silɛɛ waane ɡe pui naa, ɡo yela dɛ́ kpɛɛ Korowii.

¹⁴ Dɛ he bini bɛlbwa ɡe bwara dɛ weo waa, ó tomɛ nɛn o ka yerɛ asɔre la bini nomonome, ásɛ ba ba kpɔ noo leɡe o tile Yeesu sɔn ta, dɛ́ soŋe Korowii tɛo.

¹⁵ Dɛ ba kpɔ yarada dɛ soŋe Korowii aa, weela te la ɛɛ dɔ bokpeɡaa. Ya Dɔɔ la ɛɛ ɡeloo o bwara do kpeɡri. Dɛ wechɔɡa anee o ɛ kwaraa naa, Korowii ɛɛ kpɔɔ kɛo.

¹⁶ Anomanta, a wer kɛŋɔ he bol he wechɔɡa dɛɛ baɡle he bala he ne baa teŋɛ Yeesu nɛɛ la, ásɛ ba ɡe won soŋe Korowii dɛɛ tɛ heya, ásɛ o tɛ heyaa bokpeɡa, dɛkalkɛŋɔ nɛndɛɛɡe dɛ soŋe Korowii aa, o dɛ no dɛ ɛ dɛɛ tɛo.

¹⁷ Korowii keame Elaeja fa ɛ nɛn kɛŋɔ yan. O soŋe Korowii taeh dɛ ŋɔ ó ɡel bwaala nɛɛ, asɛ bwaala ta nɛɛ, hwel che bene atoro korobie anumɛl.

¹⁸ Asɛ o berɛ soŋe Korowii ja dɛ ŋɔ ó ɡel bwaala nɛ, asɛ nyundua pili, bwaala nɛ taeh, harɛ ta kwaa bwa le.

¹⁹ Yabala, dɛ he bini bɛl nyoɡrɔ le kasinteŋ ŋwɛnɛ la ta, asɛ he bini bɛl ɡe won berɛ chao dɛ baɡlo, asɛ o berɛ ba teŋɛ kasinteŋ ŋwɛnɛ la ta ja aa, dɛ naate waa chao la ɛ waa taeh.

²⁰ Hé jemɛ kɛŋɔ nomɛlbwa waa wona cha wechɔɡ-ɛɛ asɛ o ɡel wechɔɡa ɛɛ dɛ berɛ baa ɛ wedɛɛɡa ja la, dɛ naate lɛ wechɔɡ-ɛɛ la mkpa, dɛ ɡel o wechɔɡa damanta bwa waa ɛa la, Korowii kpɔ kɛo.