Jems 4 - mzwDBL

Hé kpɔ he te tɛ Korowii

¹ Bɔkwaa dɛɛ ba naɡra ne he baah ta nɔ? Kwaa haa dɛ pɛlɛ a nɛɛ laa dɛɛ ba a ne naa? Anee dɛɛ yo heya.

² Kwaa haa dɛ nyin haa wola dɔ la waa hɛɛ kpoo dɔŋa la. He dɛ nyin kwaa sibeɡra ne, kɛ haa dɔ, a waa ɡela hɛɛ naɡre dɛɛ yo la. Haa wola Korowii soŋe la waa haa wola he konnyina dɔ la.

³ He dɛ soŋo, kɛ haa dɔ, dɛkalkɛŋɔ liire haa cheɡɛ a ta dɛɛ soŋo la aa were. He ɡboɡbo konnyina ne kwaa haa dɛ pɛlɛ a nɛɛ waa hɛɛ soŋo.

⁴ He nɛnchɔɡa nɔ haa wola Korowii ɔmɛ kɛŋɔ hanchɔɡe waa dɛ nyin baala nɔ! Haa jemɛ kɛŋɔ nɛn waa dɛ nyin harɛ nɔ ta kwaa la vɛh Korowii dɛ ɛ o dɔm kɛɛ? Nomɛlbwa waa daŋre harɛ nɔ ta kwaa nyina ne la vɛh Korowii.

⁵ Kɛ he dɛ lii kɛŋɔ pɛɛpɛɛ Korowii Tɔn la ŋɔ lileo Korowii aa kpɔa do ya bini la dɛ mee la?

⁶ Kɛ chae Korowii aa na ya sum dɛɛ cha yaa la, on kpeɡa, ɡɛ Korowii Tɔn la aa baɡla ŋɔ, “Korowii dɛ ba nɛra baa dɛ ɛ sɔnnyin la ne harɛ, dɛɛ sune nɛra baa dɛ pwɛr ba te nɛ.”

⁷ Anomanta, hé kpɔ he te tɛ Korowii ásɛ dɛ no o be. Hé yo Bɔnsam. Wɛɛ chwao le he be.

⁸ Hé suuh tel Korowii, ásɛ o suuh ba he be. Wechɔɡ-ɛɛra, hé charɛ he liire dɛ́ le he wechɔɡa ta. He banɔ la he liire aa ɛ anɛnɛ la, hé laa doŋa kpɔ he nɛ.

⁹ Hé ɡel he tea bini chɔɡ, hé wi. Hé ɡel he mama berɛ wii ásɛ he silɛɛ ɡe berɛ sum.

¹⁰ Hé pwɛr he te tɛ Korowii. Wɛɛ ɡɔɔ heyaa.

¹¹ Yabala, he bɛ he bala dɛɛ ŋwalɛ. Nomɛlbwa waa ŋwalɛ o dɔŋ kɛɛ dɛ́ pwaoh la, dɛ Mmara laanee o ŋɔ aa were dɛɛ pwah la. Dɛ he bol waa dɛɛ yaɡɛ Mmara la aa, amɔ te dɛ haa waa Mmara la aa baɡla la ɛ. Dɛ he dɛ ɡɔɔ he te dɛɛ pwah Mmara la.

¹² Korowii ɡbosoroo dɛ́ won do Mmara dɛ́ won bol nɛn wechɔɡa wa, o ɡbosoroo dɛ́ won lɛ nɛra dɛ́ won chɔɡ bane ɡe. He ɡee umeo he won bol he dɔŋ bwara wechɔɡe ɔ?

Mbarafo ɛɛ jae wa

¹³ Hé berɛ dɛɛ no. He banɔ la haa dɛ lii he nyuune bini dɛɛ ŋɔ, “Fini kɛɛ tɔpere nɔ tɔpesoo yaa la bwɛɛ nɔ bwɛsoo taa, dɛ́ ka di benanyoa dɛɛ di bona dɛ́ nyin kwa,”

¹⁴ kɛ dɛ he ɡe aa jemɛ ɡɛ tɔɔ aa dɛ ba he pera la! Gɛ kɔɔla yon ta, kɛ aa biɡri dɛ yon kaa la, ɡɛɛ he mkpa do.

¹⁵ Anomanta, a fe chɛ kɛŋɔ he ŋɔ, “Dɛ Korowii sɛoh dɛ tɛ yaa ŋwɛnɛ te naa, tɔɔ perɔ yaa ka ɛ kenii kɛɛ anɔɔ.”

¹⁶ Kɛ taraken he dɛ ɛ mbarafo kɛ he ɡbo ɛɛ wonoo ɛ ɡɛ haa dɛ nyin. A ɡɛ waa la bwa ɛ wechɔɡa.

¹⁷ Anomanta, nomɛlbwa waa jemɛ waa aa wera kɛŋɔ o ɛ, dɛ vɛh ɛɛ la, dɛ o ɛ wechɔɡa.