Jems 3 - mzwDBL

Waa nyondoŋe aa won ɛɛ

¹ Yabala, he bwa laa chɛ kɛ he ɡel he sie beɡre Korowii waa baɡla ta, dɛkalkɛ ɡɛ haa jema la, ya nɛra yaa dɛ baɡle Korowii waa la waa binii wɛɛ ba nyiŋa kɛrɛdɛ ɡwaa nɛra baa kaa la.

² Ya bwa dɛ koni saŋ bɛlbwa. Dɛ nɛn aa wobɛlbwa waa dɛ bol la ta koni aa, dɛ o ɛ nɛn o wa a toɡra tenten. Nɛn waa won o wobol nyiŋa la, o won o te lawa wobɛlbwa ta.

³ Ya kpɔ bune dɛɛ do jaɡre nyoo asɛ aa no ya wa, asɛ ya won a bera dɛɛ kaa bela bwa yaa dɛ nyin.

⁴ Yá ta sie na ɡɛ stiimae aa kana, asɛ peukpeɡ yon ta dɛ kpɔɔ dɛɛ kaa, kɛ dajeɡa bɛlee lɔ o ta ba kpɔ dɛɛ menɛ o sie asɛ wɛɛ kaa bela bwa baa dɛ nyin.

⁵ Gɛɛ nyondoŋe do jeɡaa nɛn bini, kɛ dɛ won wejena ɛɛ. Hé na ɡɛ kɔr aa doa asɛ nihɔl won o fuih.

⁶ Nyondoŋe do kɛŋɔ nihɔl ken, dɛ won wechɔɡa ɛɛ taeh ya bini, dɛ won yaa chɔɡa ya soɡa bini bwa. Bɔnsam niinii dɛɛ choŋu.

⁷ Kpɔɡ bini ola ne olchɔɡa ne jumbii ne kwaa aa dɛ huuh, dɛ mpo bini pɛŋa bwa, nɛn won a dɛɛra á do pwɛre.

⁸ Kɛ nyondoŋe te, nomɛlbwa toole dɛ won o nyiŋa. O ɛ konchɔɡe haa wola won toɡro. O dɛ kpo kɛŋɔ tɛɡchɔɡa ken.

⁹ O nee yaa jam Korowii waa ɛ ya Naa ne ya Mɛɛ la, dɛ berɛ kpɔ o tenten dɛɛ taah ya dɔŋa Korowii aa ta ba kɛŋɔ o tenten la.

¹⁰ Nyoa beŋkpoŋ la taa wobodɛɛɡa ne taahna bwa ɛɛ le. Yabala, a ta chɛ kɛŋɔ aa ba ɡɛ!

¹¹ Nenabɔɔ ɛɛ wonoo palɛ, o nee ane do som ásɛ ane ɡe do nyɛɡre aa?

¹² Yabala, fig da ɛɛ wonoo nɔnɛ sombie aa, kɛɛ bambi ɛɛ wonoo nɔnɛ fiɡ nɔna aa? Gɛ tentenee nenabɔɔ o nee aa do nyɛɡre la aa wola won berɛ do som buɡ ta tenten.

Wejema anɛ ane wa

¹³ He bini umee ɛ wejereme dɛɛ no waa mun ɔ? Gel o pwɛr o te dɛɛ ɛ wedɛɛɡa, ásɛ o da baɡle kɛ o ɛ wejereme.

¹⁴ Dɛ he dɛ nyin kɛ he ɡbo dɔ, dɛ dɔ bɔweela ne sibeɡra he bambile bini naa, amɔ he bɛ sɔn dɛ́ɛ nyin dɛ́ɛ ŋɔ he dɔ wejema. Dɛ he dɛ ɛ ɡɛ naa, dɛ he ta kasinteŋ dɔe.

¹⁵ Gɛ wejema nɔ ta Korowii doa wejema ɛɛ, a ɛ harɛ ta kwa. Korowii Domadɛɛɡe toole a ta. Bɔnsam liiree.

¹⁶ Anomanta, bela bɔweela ne n ɡbo dɔ aa lole la, belaa wesaɡasaɡare ne wedoŋa bwa do.

¹⁷ Nɛn waa dɔ Korowii doa wejema la, kenii o da do, o waa do kaih, o waa dɔ deŋnesɔɔhna, o pwɛre, o dɛ no o dɔŋ wa, o dɛ na o dɔŋ sum, o ɛ nɛndɛɛɡe, o we-ɛɛla bwa wer, waa nɛra bane duure dɛɛ ɡwaa bane, o tea too.

¹⁸ Nɛra baa dɛ nyin deŋnesɔɔhna la, nyopɛo nee baa ɛ ba wa, aa le wedɛɛɡa.