Jems 2 - mzwDBL

Nɛra bini chala jae wa

¹ Yabala, haa dɛ yarada Yeesu Kristo waa ɛ jirima Dɔɔ nɔ, a ta chɛ kɛŋɔ he duu nɛra bane dɛ́ ɡwaa bane.

² Dɛ he ne he bala chemo dɛɛ tomɛ Korowii, nɛra banɛ ba jo he bini, bɛl do suuɡaswɛm kwaa dɛ tɔ yadɛɛɡe, bɛl ɡe tɔ yadoŋ,

³ asɛ he tɛ onɔ la waa do suuɡaswɛm kwaa dɛ tɔ yadɛɛɡe la sobɔrdɛɛɡe, dɛ ŋɔ onɔ la waa tɔ yadoŋ la be ŋɔ, ó te che bela kɛɛ ó ba so harɛ he sie naa,

⁴ amɔ dɛ he dɛ duu bane dɛ ɡwaa bane. Nɛra siebɔree hɛɛ nyiŋi dɛɛ duu bane dɛɛ nyiŋi bane nyubaahna. Haa kɛrɛdɛ ɛ.

⁵ Yabala, hé no! Korowii we-ɛɛlaa kɛŋɔ ó le harɛ nɔ ta nyaara baa yaradao kɛrɛdɛ ásɛ ba yarada la ɛɛ ba kondɔɔh, ásɛ ba dɔ bɔr dɛ́ ja o Kora waa baɡɛ nyoa ŋɔ wɛɛ ɡeloo nɛra baa dɛ nyinu ja o ta la.

⁶ Kɛ he te lawɛ nyaara sie teɡɛ harɛ. Dɔɔhna laa dɛɛ fiiɡi heya, dɛ lawɛ heyaa kaa che kɔɔto la aa?

⁷ Gɛ nɛra nɔ laa dɛɛ bol wechɔɡa dɛɛ yaɡɛ Yeesu sɔndɛɛɡe nɔ baa kpɔa dawɛ heyaa la aa? Kɛ banee hɛɛ duu la!

⁸ Dɛ he dɛ teŋɛ Korowii Kora Mmara baa chwera ŋɔ, “Nyin he dɔŋ kɛ he te ɡbaɡba la” ta naa, dɛ he dɛ ɛ kɛrɛdɛ.

⁹ Kɛ dɛ he dɛ duu nɛra bane dɛ ɡwaa bane aa, dɛ he dɛ ɛ wechɔɡa. Mmara baɡlɔ kɛŋɔ he di bolchɔɡe.

¹⁰ Nomɛlbwa waa teŋɛ Mmara la bwa ta kɛ dɛ koni o bini beŋkpoŋ la, dɛ o koni o bwa, dɛ di bolchɔɡe.

¹¹ Korowiirii baɡla ŋɔ, “Bɛ jwamane bɔ.” O tentenee bera baɡle kɛ “Bɛ nɛn kpo.” Dɛ he ta jwamane bɔe dɛ kpo nɛn aa, dɛ he ɛ nɛn haa koni Mmara la.

¹² Hé jemɛ kɛŋɔ Korowii dɛ ba ya waa bola o Kora Mmara waa kpɔa lɛ yaa asɛ ya dɔ ya te la ne. Anomanta, hé nyiŋi he nyoo wobol ne he we-ɛɛla ta kɛrɛdɛ,

¹³ dɛkalkɛŋɔ Korowii aa naate waa wola o dɔŋ sum na la sumii na awola waa dɛɛ bol ya waa la. Naate waa dɛ na o dɔŋ sum la aa o waa bola ɔmɛ.

Yarada ne wedɛɛɡa ɛɛ

¹⁴ Yabala, dɛ nomɛl ŋɔ o dɛ yarada Korowii, dɛ o ta o yarada kpɔe dɛɛ ɛ wedɛɛɡa aa, tɔnɔ besoo o yarada la dɔɔ? A ɡɛ yarada nɔ ɛɛ wonoo lɛo wa aa?

¹⁵ He nao kɛŋɔ he dɔŋ baa kɛɛ haah dɛ chɔ waa, dɛɛ nyin yal dɛ́ tɔ, dɛɛ nyin kondikwaa ɡe dɛ́ di,

¹⁶ asɛ he ŋɔ o be ŋɔ, “Kórowii tɛɛ bokpeɡa dɛ tɛɛ bosɔɔhna,” dɛ vɔmɔ kwaa aa tɛo bokpeɡa la te naa, dɛ tɔnɔ besoo lɔ waa haa bola tɛo la ta nɔ?

¹⁷ Gɛɛ a do yarada ta kɛŋɔ dɛ nɛn ta wedɛɛɡa ɛɛ dɛɛ ja o yarada ta naa, dɛ o yarada la ɛ wepuu.

¹⁸ Bɛl lole nomɛl ɛɛ ŋɔɔ yaradae ɡboo wɛɛ yarada Korowii, ásɛ bɛl ɡe ŋɔ wedɛɛɡaa o ɡee ɛ. Kɛ ɡɛ ɡe aa won maɡre. Ɛrɛɛ hɛɛ ba wona baɡ mɛ he yarada dɛ he ta wedɛɛɡa ɛɛ dɛɛ ja a ta nɔ? N te, mɛɛ che n wedɛɛɡa ɛɛ taa, ásɛ he jemɛ kɛ n dɛ yarada Korowii.

¹⁹ He dɛ yarada kɛŋɔ Korowii beŋkpoŋii lole naa? A wer ɡa! Kɛ he ne Bɔnsam toromaa soɡe dabeŋkpoŋ ta. Ba ɡba dɛ yarada Korowii ɔmee ne bochela ne.

²⁰ Gɛne! He dɛ nyin n baɡle kɛŋɔ yarada wedɛɛɡa ɛɛ aa wola a ta jae la ɛ pɛɛpɛɛ aa?

²¹ Ya naa Abraham fe aa dɛ ba o bie Aesek kpoe dɛ tɛ Korowii la, a ta laa a che Korowii ŋɔ o ɛ nɛndɛɛɡe o waa su o siwi la aa?

²² He ta nae kɛŋɔ o yarada ne o wedɛɛɡa ɛɛ bwa aa pɛ aa? O wedɛɛɡa ɛɛ taa a che o yarada ɛ yarada kasinteŋ.

²³ Belaa Korowii Tɔn waa la ɛ kpela kɛŋɔ baa ŋɔa ŋɔ, “Abraham yarada Korowii, asɛ o yarada nomanta, Korowii ŋɔ o ɛ nɛndɛɛɡe o waa su o siwi” la. Dɛ ba dɛ yerɔ Korowii dam.

²⁴ Kɛ he nao kenɛ, nɛn wedɛɛɡa ɛɛ ne o yarada bwa taa a che wɛɛ ɛ nɛndɛɛɡe o wa ɛɛ su Korowii siwi, o yarada ɡbo ta laa.

²⁵ Gɛ tentenee a do hanjwamane baa dɛ yerɔ Rahab la ɡba nɛ. Israel tena toroma bane aa bala dɛ́ fe ba sɔh hweli o bwɛɛ harɛ waane dɛ́ ka taa ba bwɛɛ tena be la, o lɛɛ ba sɔh dɛ baɡ ba ŋwɛnɛfale ba chwa kaa. Gɛ wedɛɛɡa nɔ taa a che Korowii ŋɔ o ɡe ɛ nɛndɛɛɡe o waa su o siwi.

²⁶ Anomanta, ɡɛ nɛn ta hweera dɔe yaa dɛ o sewɔ la, ɡɛɛ yarada wedɛɛɡa ɛɛ aa wola a ta jae la ɛ yaradapuu.