Jems 1 - mzwDBL

¹ Men Jems maa ɛ Korowii ne ya Dɔɔ Yeesu Kristo bonɔɔ laanee chwerɛ tɔn nɔ dɛɛ tɛ he Israel deene fi dɛ anɛ tena haa lɔ bobɛlbwa la. N dɛ na heya.

Yarada ne wejema

² Yabala, dɛ wobɛlbwa pu heyaa dɛ ɛ wekpeɡa aa, hé ɡel he sie lɛ.

³ A chɛ kɛŋɔ hé jemɛ kɛŋɔ dɛ wobɛlbwa pu heyaa he ta habɔɔ berɛ kpo Yeesu aa, anee dɛɛ ba ɡela he dɔ bambile, dɛ́ won che kiŋkiŋ wobɛlbwa ta.

⁴ Hé dɔ bambile wobɛlbwa ta dɛ́ ka tonɛ, ásɛ dɛ won che a ta dɛ́ jemɛ wa, dɛ́ dɔ dadɛɛɡe, ásɛ wobɛlbwa bɛ heyaa nya harɛ nɔ ta.

⁵ Dɛ wobɛlbwa pu heyaa hɛɛ nyin a wejema aa, hé soŋe Korowii ásɛ o tɛ heya. O tea chɔ pɛɛ, waa nɛn kon tɛ o waa berɛ dɛɛ we o nɛ. Wɛɛ tɛ heyaa.

⁶ Kɛ hé kpɔ yarada dɛ́ɛ soŋo, dɛ bɛ dɛɛ tɔŋle. Nomɛlbwa waa dɛ soŋe Korowii dɛɛ tɔŋle kɛ o ken aa o konnyinii dɔ la, o ta yarada dɔe. O liire won bera warawara kɛŋɔ peu yon ta dɛɛ beɡre mpo nee dɛɛ kaa bobɛlbwa la.

⁷ Nɛn o liire aa ɛ anɛ la dɛ chole, o wobɛlbwa aa maɡre.

⁸ Dɛ naate dɛ soŋe Korowii aa, o bɛ dɛɛ lii kɛŋɔ wɛɛ no o bee.

⁹ Dɛ he nyao dɛ ɛ Yeesu habɔteŋre aa, ɡel he sie lɛ, dɛkalkɛŋɔ he ɛ nɛnjen Korowii be.

¹⁰ Dɛ he ɛ dɔɔh ɡe aa, ɡel he sie lɛ kɛŋɔ he ne nyaa la bwa ɛ beŋkpoŋ, dɛkalkɛŋɔ he ɛ nɛŋɡwɛɡre Korowii be. Haa biɡri sewɛ kɛŋɔ kpɔɡa yon fe dɛ́ chure warane dɛ́ berɛ sewɛ la.

¹¹ Gɛ wee yon le dɛ́ lɔ, ásɛ kpɔɡa sewɛ dɛ́ chure a fedɛɛɡa la ta, ásɛ a wer tonɛ la, ɡɛ tentenee dɔɔh ɡee ba sewa o kwaa nyina ta, ásɛ o kondɔɔh la bwa ɛ pɛɛpɛɛ.

¹² He bini bɛlbwa waa takapɔ lawɛ bambile dɛ́ɛ na wahala la, o na som. Dɛ wenaale la kpoŋee la sie dɛ ba horɛ, kɛ he ta teŋɛ Korowii nɛɛ he bambile bwa ne naa, wɛɛ tɛɛ mkpa waa ŋɔa ŋɔ wɛɛ kpɔɔ tɛ nɛra baa dɛ nyinu laanee, á ɛ kompoŋ haa yoa dɛ le ba vɔwɛ.

¹³ Dɛ waane pu nomɛl o ɛ wechɔɡa aa, o bɛ ŋɔ Korowiirii ɡela o ɛ wechɔɡa. Wobɛlbwa toole dɛ́ won ɡel Korowii ɛ wechɔɡa. Waa waane ɡee kpɔ ta ya nɛɛ ya ɛ wechɔɡa.

¹⁴ Dɛ waane pu nomɛl o ɛ wechɔɡa aa, o ɡbabir pɛla waa dɔa laanee ɡela o ɛ wechɔɡa.

¹⁵ Pɛla waa wola were la dɛ́ lolɛ wechɔɡa, ásɛ wechɔɡa ɡe baa waraa, a yon lolɛ seo.

¹⁶ Yabala, he bɛ ɡel ba neɡre heya.

¹⁷ Komɛlbwa waa wera la le Korowii be. Komɛlbwa waa ɛ kondɛɛɡe la, Korowiirii kpɔa kɛ yaa. Onee ya Mɛɛ waa ta kwaa bwa aa lɔ nyundua dɛɛ chaah harɛ. Gɛ kwaa nɔ dɛ chaah, ane ta ɡe aa chaah, kɛ Korowii te aa beɡre bwa.

¹⁸ O ɡbaɡba tetooraa ya dɔ o waa aa ɛ kasinteŋ la dɛɛ no, dɛ che a ta ɛ o bii, ásɛ dɛ su o siwi kwaa waa taa la bwa bini.

Korowii waa noe ne a ɛɛ

¹⁹ Yabala, hɛ́ɛ lii waa nɔ aa teŋa nɔ. Hé ɡel he sie beɡre waa noe ta, dɛ́ nyiŋi kɛrɛdɛ mɔɔ dɛɛ bol wa, ásɛ dɛ bɛ ɡel he baah ɛɛ di warawara.

²⁰ Nɛwɛnyini bandia aa wobɛlbwa kwaa Korowii ŋwɛnɛdɛɛɡe teŋa ta.

²¹ Anomanta, hé le wedoŋa ne wechɔɡa aa lɔ he bini dɛ ɡwaa he nɛɛ la ta, dɛ́ pwɛr he te, dɛ́ kpɔ he te tɛ Korowii waa la waa kpɔa do he bambili bini á won lɛ heyaa la.

²² He bɛ waa la no dɛ́ ɡel a ɛɛ. Dɛ he dɛ ɛ ɡɛ naa, he dɛ neɡre he te. Hé ɛ ɡɛ waa la aa baɡla la.

²³ Nomɛlbwa waa no waa nɔ, waa wola ɡɛ waa la aa baɡla la ɛ la, o do kɛŋɔ nɛn waa dɛ nyiŋi diɡi ta dɛɛ na o ɡbaɡba la.

²⁴ Waa nyiŋi o te diɡi la ta dɛ na ɡɛ waa doa la, tamaa ken, dɛ o berɔ soh ɡɛ waa doa.

²⁵ Korowii Mmara wer kɛrɛdɛ, o ɡelɔ yaa dɔ ya te, waa yaa vɔrɔwe. Nomɛlbwa waa dɛ no dɛɛ pese o bini, waa wola soh dɛɛ ɛ ɡɛ waa baɡla la, Korowii ɛɛ swee andɛɛɡa tɛ naate o we-ɛɛla bwa ta.

²⁶ Dɛ nomɛl dɛ lii kɛ o ɛ Korowii torome, dɛ o ta nyotɔɡbom dɔe yaa, o dɛ neɡre o nyu. Naate Korowii toma la ɛ pɛɛpɛɛ.

²⁷ Waa Korowii waa ɛ ya Mɛɛ aa dɛ nyin a do wer dɛ́ maɡre o toma bini laanee kɛŋɔ, yá cha bilalbii ne luhaahna ba wahala bini, ásɛ dɛ laa ya te kpɔ harɛ nɔ wechɔɡa ta.