Sitɔɔla 9 - mzwDBL

Abemɛlɛk wa

¹ Gedeɔn bibaa Abemɛlɛk la Sɛkem o nya nimambii ne o nɛra bwa be, dɛ ka ŋɔ bá bɔɔ Sɛkem tena ŋɔ,

² “Umee hɛɛ nyin kɛ ó ɛ he kooro ɔ? Gedeɔn bibaala fifraanuanɛ la kɛɛ nɛmbeŋkpoŋ ɔ? Hé jemɛ kɛ n ɛ he bini bɛl.”

³ O nya nimambii la aa bol ɡɛ waa nɔ Sɛkem nɛra be la, ba sɛoh teŋɛ Abemɛlɛk nɛ dɛ ŋɔ, “Ya nimee.”

⁴ Ba kpɔ suuɡapoŋa fifraanuanɛ le ba voɡ Baal Bɛret dea ba tɛo. O kpɔ ɡɛ suuɡa la bɔ nɛra ba siwi aa kpeɡa paa ba ba teŋɛ o nɛ.

⁵ Abemɛlɛk la o mɛɛ Gedeɔn bwɛɛ Ofra, dɛ ka kpoo o mɛɛ bii fifraanuanɛ baa ɛ o dɔɔranar ne nimanar bwetal bɛl ta. Kɛ ba bini bechala baa dɛ yerɔ Jotam la kpɔ o te sɔh.

⁶ Ate, nɛra baa lɔ Sɛkem ne Bɛt Milo cheme pila bɛl jwɛh dajen la mun, dɛɛ ba Abemɛlɛk kora ta cheɡa.

⁷ Jotam aa no waa nɔ la, o teeh Geresim Bwejen dɛ ka che o doa, dɛ kpɔ takpeɡ sɛɡ ba ŋɔ, “Sɛkem tena, hé no n be ásɛ Korowii ɡe no he wa.

⁸ Awola bɛl, daa bwa kaa cheme dɛ ŋɔ a dɛ cheɡ a kooro. A ŋɔ ɔleve daa be ŋɔ ó ɛ a kooro.

⁹ Anee ɔleve daa ŋɔ, ‘Maa won ɡel noo maa ɛa dɛɛ tɛ voɡa ne nɛra baa dɔ jirima nɔ, dɛ́ ba di kora he nɛ.’

¹⁰ Belaa daa la bwa berɛ la fiɡ daa ɡe be ŋɔ, ‘Ba ɛ ya kooro.’

¹¹ Fiɡ daa la ɡe ŋɔ, ‘Maa won ɡel n nɔna aa do som kohona nɔ nɔna, dɛ́ ba di kora he nɛ.’

¹² Asɛ a berɛ ŋɔ ɡrepo daa be ŋɔ ó ba ɛ ba kooro.

¹³ O ɡe ŋɔ, ‘Maa won ɡel sen maa dɛ tɛ nɛra ne voɡa baa dɔ silɛɛ nɔ, dɛ́ ba di kora he nɛ.’

¹⁴ A bwa habɔɔ la, daa la bwa ŋɔ sɔɔh daa be ŋɔ ó ba ɛ ba kooro.

¹⁵ Asɛ o ŋɔ, ‘He dɛ nyin kɛ he cheɡ mɛ kooro aa, hé ba sɔh n chunchule ta. Dɛ ɡɛ laa tenaa, mɛɛ ɡeloo nii le dɛ́ ba fuh peleme daa aa lɔ Lɛbanɔn harɛ ta.’ ”

¹⁶ Jotam berɔ ŋɔ, “Haa cheɡ Abemɛlɛk kora ta la, ŋwɛnɛ waa wera ne kasinteŋ taa he kpɔ aa? He ɛ Gedeɔn ne o dem tena kɛrɛdɛ ɡɛ aa chɛa aa?

¹⁷ N mɛɛ Gedeɔn kpɔ o nyu charɛ seo dɛ yo Midian tena dɛ lɛ heyaa le ba nɔn ta, haa ɡɛ waa la liiraa?

¹⁸ Kɛ fini, he cheɡɛ n mɛɛ dem tena nɛɛ dɛ kpoo o bibaala fifraanuanɛ bwe beŋkpoŋ ta, asɛ dɛ ɡel o yomhaah bibaa Abemɛlɛk di kora Sɛkem tena nɛ, waa ɛ he lole la nomanta.

¹⁹ Dɛ he kpɔ ŋwɛnɛ waa wera ne kasinteŋ ta dɛ ɛ Jerub Baal ne o dem tena aa, amɔ hé ɡel he sie lɛ he koofale Abemɛlɛk nɛ, ásɛ o ɡe sie lɛ he nɛ.

²⁰ Dɛ ɡɛ haa ɛ n mɛɛ Gedeɔn ne o bii nɔ ta maɡrɛ tenaa, amɔ nii le Abemɛlɛk be dɛ́ fuh he Sɛkem ne Bɛt Milo tena, nii berɛ le he Sɛkem tena ne Bɛt Milo tena be dɛ́ ba fuh Abemɛlɛk.”

²¹ Jotam nyoa aa chiɡa la, o chwao le bela dɛ ka so Beɛ, dɛkalkɛŋɔ o dɛ ɔmɛ o dɔɔ Abemɛlɛk.

²² Abemɛlɛk aa di kora Israel harɛ ta bene atoro habɔɔ la,

²³ Korowii kpɔ waa ba ta Abemɛlɛk ne Sɛkem tena baah ta, asɛ ba leo tɛ.

²⁴ Korowii ɛ ɡɛ dɛ kpɔ bɔ Abemɛlɛk ne Sɛkem tena baa chao dɛ kpoo Gedeɔn bibaala fifraanuanɛ la kem.

²⁵ Sɛkem tena le Abemɛlɛk habɔɔ dɛ ɡel nɛra ka sɔh deŋɡarere dor, dɛ che bela ɛɡre nɛra baa dɛ kpɔ bela dɛɛ lɛ ba kwa, asɛ nomɛl ka taa Abemɛlɛk be.

²⁶ Dɛ Ɛbɛd bibaa sɔne Gaal. Awola bɛl, Gaal ne o nimanar iro ka so Sɛkem, asɛ bwɛɛ la tena ɛɛ yaradao.

²⁷ Ba kaa chaa ba ɡrepo nɔna dɛ harame a nee dɛ kpɔ ɛ sen. Asɛ ba tɔpejen bɛl ta, ba ka so ba voɡ dea dɛ di kwaa dɛɛ nyɔ sen asɛ dɛ taah Abemɛlɛk.

²⁸ Anee Ɛbɛd bibaa Gaal ŋɔ, “Umee Abemɛlɛk ɔ? Ɛrɛwaa ya Sɛkem tena do o lɔɡa ɔ? O laa Gedeɔn bibaa la aa? Sebul ɡe ɛ o nachiɡe. Hé tomɛ Sɛkem mɛɛ Hamɔ naanar, banee Sɛkem tena! Ɛrɛɛ a chɛ kɛŋɔ yáa tomɛ Abemɛlɛk ɔ?

²⁹ Dɛ menee nɛra nɔ kooro aa, n fe ɡelɔ ba iru kora ta, dɛ́ ŋɔ o be ŋɔ ó ka kpɔ o laa tena bwa dɛɛ ba dɛ́ ba yo.”

³⁰ Sebul waa dɛ nyiŋi bwɛjen la ta aa no waa Ɛbɛd bibaa Gaal aa bola la, o baah diu kɛrɛdɛ.

³¹ O sɔɔh tomɛ nɛra Abemɛlɛk be ŋɔ, “Ɛbɛd bibaa Gaal ne o dɔɔranar ne nimanar ba Sɛkem dɛ baa vuuɡi bwɛɛ la dɛɛ nyin ba yoi.

³² Jwaana he ne he laa tena le ba sɔh kpɔɡ bini dɛ́ɛ kpaa ba.

³³ Tɔɔ perɔ wee ɛɛ le aa, hé le bela dɛ́ kpɔ sie chaɡɛ bwɛjen la ta dɛɛ la. Dɛ Gaal ne o nɛra leɔ dɛ́ ba yo heya aa, ásɛ he ɛɛ ba ɡɛ bwa haa wona.”

³⁴ Anomanta, Abemɛlɛk ne o laa tena bwa kpɔ ba te jwaana, dɛ bɔne ba bini kuore anaarɛ, dɛ ba sɔh bɛne Sɛkem.

³⁵ Tɔ aa pera la, Ɛbɛd bibaa Gaal le buse dɛ che bwɛjen la doonyojen ta, dɛ Abemɛlɛk ne o laa tena le bela baa sɔah la dɛɛ ba.

³⁶ Gaal na ba dɛ ŋɔ Sebul be ŋɔ, “Na, nɛra le bwejena la dor dɛɛ ba!” Asɛ Sebul ɡe ŋɔ, “Gɛ laa. Bwea chunchulii he na dɛ ŋɔ nɛraa la.”

³⁷ Gaal berɔ bol o be ja ŋɔ, “Na! Nɛra le bwejen la doa dɛɛ ba, asɛ bane ɡe le voɡra daa la mun dɛɛ ba.”

³⁸ Anee Sebul ŋɔ o be ŋɔ, “He mbarafo wobol haa bola la, ɛrɛɛ a do taraken ɔ? Henee fa bola ŋɔ, ‘Umee Abemɛlɛk ya kpɔ ya te kaa do o lɔɡa la.’ A ɡɛ nɛra nɔɔ he faa mamɛ la. Le ka yoo ba!”

³⁹ Anomanta, Gaal tɔ Sɛkem tena sie dɛ ka yo Abemɛlɛk ne o laa tena.

⁴⁰ Abemɛlɛk ne o laa tena doŋ ba ba berɛ chwa dɛɛ kaa Sɛkem, asɛ ba do ba ɡalɡa bwa bola ka tel bwɛɛ la doonyojen ta.

⁴¹ Abemɛlɛk kaa so Aruma, asɛ Sebul doŋi Gaal ne o dɔɔranar ne nimanar la le Sɛkem.

⁴² Tɔ aa pera la, Sɛkem tena la berɔ la kpɔɡ bini bela, asɛ ba ka ŋɔ Abemɛlɛk be.

⁴³ Anomanta, o bɔne o laa tena la bini kuore atoro dɛ ɡel bɛlbwa kaa ka sɔh. Baa naa kɛŋɔ Sɛkem tena la leɔ dɛɛ ba la, ba iro le ba sɔɔhbɔr bela dɛ́ ba yoo ba.

⁴⁴ Abemɛlɛk ne o laa tena kuo beŋkpoŋ ɛ warane dɛ ka tɔ bwɛjen la doonyoa. Asɛ kuore anɛ baa kaa la ɛ warane, dɛ ka yo banɔ la baa lɔ kpɔɡ bini la dɛ kpoo ba.

⁴⁵ Awola tɔpere la bwa, Abemɛlɛk yo bwɛjen la tena, ka tel kɛŋɔ waa kpoo ba bwa. O paɡre bwɛjen la dɛ kpɔ yar merɛ o ta.

⁴⁶ Banɔ la baa lɔ dejaŋ waa lɔ Sɛkem la aa fela no la, ba bwa chwao ka jo ba voɡ baa dɛ yerɔ Ɛl-Berit la dekpeɡ bini.

⁴⁷ Abemɛlɛk aa noa kɛ ba bwa lɔ bela la,

⁴⁸ o ne o laa tena la bwa teehnɔ kaa Salmɔn Bwejen doa. O kpɔ kpanfɛ teŋe daa dawɛ vam, dɛ do nɛra baa ja o nɛɛ la ŋɔ, “Hé ɛ ɡɛ maa ɛa nɔ warane!”

⁴⁹ Nɛra la bwa teŋni daa dawɛ vaama teŋɛ o nɛ, dɛ kpɔa ka teɡli dekpeɡ la bwa bar, dɛ tɔ nɛra la do dɛ kpaa nii do o ta ba fuh. Nɛra baa fuah, baala ne haahna bwa, ɛɛ ɛ nɛra kaɡboŋii dɛ ja nɛra baa kpoa mɔɔ la nɛ.

⁵⁰ Abemɛlɛk ne o laa tena teŋɔ la Tɛbɛs dɛ ka chɔ baro, dɛ yoo ba dɛ pɔ ba nɛ.

⁵¹ Dɛ dejaŋ bɛl lɔ bwɛɛ la ta. Bela baala ne haahna bwa chwao ka jo o bini dɛ laa ɡbera karɛ ba nɛ, dɛ teeh kaa o saldoa.

⁵² Abemɛlɛk ne o laa tena la dejaŋ la bɔr dɛ kpɔ kpeɡri dɛɛ nyin ba jo o bini. Abemɛlɛk aa suuhna tel ŋɔ ó ka fuh dea la ɡbera la,

⁵³ haah bɛl ɡɔɔ nambwe bɛl lɔ o nyu ta, o nyu paɡre.

⁵⁴ O yerɛ o bonɔɔ waa cheɡɛ o dɔmkwaa la dɛ ŋɔ, “Ɛ warane dɛ́ kpɔ he kere ba kpo mɛ, ɡɛ aa ɛ ba bɛ ba ŋɔ haahnee kpo mɛ.” Asɛ o bonɔɔ la laa kere pamɛ dɛ tɔɡɔ o sewɛ.

⁵⁵ Israel tena la aa naa kɛ ba nomoa Abemɛlɛk sewɔ la, ba berɔ kaa dem.

⁵⁶ Gɛɛ a do Korowii tɛr Abemɛlɛk deŋne dɛ le nyubinikpeɡ waa ɛ o mɛɛ dɛ kpoo o dɔɔranar ne nimanar fifraanuanɛ ɡe la.

⁵⁷ Korowii berɔ bɔ Sɛkem tena nyubinikpeɡ baa ɛa la kem, dɛ ɡel Gedeɔn bibaa Jotam nyotaahna la laɡ ba.