Sitɔɔla 8 - mzwDBL

Seba ne Salmuna

¹ Efrem dea tena la bɔɔ Gedeɔn ŋɔ, “Ɛrɛɛ he ɛ yaa ɡɛ nɔɔ? Ɛrɛɛ he ta yaa yerɛ ya ba chae yo Midian tena ɔ?” Ba pwaoh sibeɡra ne.

² Asɛ o chaŋ ba ŋɔ, “Amee n ɛ a tel anɔ haa ɛa nɔɔ? Efrem tena daa nɔna baa kuuhna la ta Abeɛsa kobir ɡrepo daa nɔna baa chaara la ɡwaalaa?

³ Korowii kpɔ Midian nomonome Oreb ne Siib do he nɔn ta. Bɔkwa waa ń won ɛ dɛ́ kpɔ maɡɛ ɡɛ haa ɛa nɔɔ?” A ɡɛ wobol nɔ sɔɔh ba bandia la nyoa tama.

⁴ Gedeɔn ne o laa tena lafraatoro la koɔh kɛrɛdɛ, kɛ ba ti nɛra la dɛ ba ɡale Jɔɔdan Moo la.

⁵ Ba kaa tel Sukot, asɛ o ŋɔ bela tena be ŋɔ, “Hé tɛ n nɛra nɔ kondikwaa bá di. Ba koɔh taeh, kɛ n ta dɛ ti Midian tena koranar Seba ne Salmuna.”

⁶ Anee Sukot nomonome la ŋɔ, “He ta Seba ne Salmuna lawɛ mɔɔ. Bɔkwa waa chɛ kɛ yá tɛ he laa tena nɔ kondikwa ɔ?”

⁷ Anee Gedeɔn chaŋ ba ŋɔ, “Gɛ haa bola nɔ nomanta, dɛ Korowii kpɔ Seba ne Salmuna do n nɔn ta naa, sɔɔhne ne jabalnadaŋɛree mɛɛ ba kpɔe ba lɔɔ heya.”

⁸ Waa le bela la, o la Pɛneɛl tena ɡe be, dɛ ka soŋ ba ɡɛ waa nɔ tenten, asɛ ba ɡe chaŋo ɡɛ Sukot tena aa chaŋo la.

⁹ Anomanta, o ŋɔ Pɛneɛl tena la be ŋɔ, “Dɛ n kaa yo n dɔma dɛ pɔ ba nɛɛ dɛ ba silɛɛ ne naa, mɛɛ ba kuuɡi he dejaŋ nɔɔ!”

¹⁰ Dɛ Seba ne Salmuna laa tena baa kaa la lɔ kaɡboŋa fi dɛ banue ba ne ba do Kaakɔ. Banee kaa dɛ le wee leebɔr laa tena la bini, asɛ laa tena kaɡboŋa lafa fifraanɛ ɡe serewe.

¹¹ Gedeɔn kpɔ ŋwɛnɛ nɛra baa wola soŋnibɔr dɔe yon kpɔ o ta o chɔ Nɔba ne Joɡbeha wee leebɔr la, dɛ ba piɡri Midian laa tena baa lɔ bela dɛ yoo ba.

¹² Midian koranar banɛ, Seba ne Salmuna chwao, kɛ Gedeɔn ti ba ka laɡ ba, asɛ ba laa tena la bwa chwa kaa.

¹³ Waa bera baa kaa la, o kpɔ Heres ŋwɛnɛ waa chɔ bwejena baah ta.

¹⁴ Gedeɔn lawɛ Sukot bonɔɔ bɛl dɛ bɔɔro nomonome baa lɔ Sukot wa. Asɛ o chwerɛ Sukot nomonome fifraanuanɛ dɛ banuanɛ sɔna tɛo.

¹⁵ Gedeɔn la Sukot nomonome la be dɛ ka ŋɔ, “Seba ne Salmuna laanee la. Banee he muɡli n baah ŋɔ dɛ n ta ban lawɛ aa, haa n laa tena baa koah kohona la kondikwaa tɛ la.”

¹⁶ O lawɛ bwɛɛ la nomonome dɛ lɔɔ ba sɔɔhne ne jabalnadaŋɛre ne, dɛ tɛr ba deŋne bá kpɔ hweli wa.

¹⁷ O berɔ la dɛ ka kuuɡi dejaŋ waa lɔ Pɛneɛl la dɛ kpoo baala baa lɔ bwɛɛ la ta.

¹⁸ Ate, Gedeɔn bɔɔ Seba ne Salmuna ŋɔ, “Ɛrɛɛ baala haa kpoo ba Tabɔ la doɔ?” Asɛ ba chaŋo ŋɔ, “Baala baa do kɛ hen, dɛ do kɛ koobiirii.”

¹⁹ Gedeɔn ŋɔ, “Ba ɛ n dɔɔranar ne nimanar, n ne ba pɛ nya. N ŋwɛɛ Korowii kɛŋɔ dɛ he ta ban kpooraa, n ɡe fe aa heyaa kpoo.”

²⁰ Anee o ŋɔ o bibaa nomoa baa dɛ yerɔ Jɛta be ŋɔ, “Kpoo ba.” Kɛ bie la ta o kere kpɔe a ba ɛ kɛŋɔ wɛɛ kpoo baa. O ɛ bechala dɛɛ ɔmɛ.

²¹ Asɛ Seba ne Salmuna ŋɔ, “He ɡbaɡba den kpoo yaa, a ta chɛ kɛ he kpɔ nomoa toma tɛ bechala.” Anomanta, o suuhno tel ba be dɛ kpoo ba, dɛ laa kondɛɛɡa baa kpɔ suuɡaswɛm ɛa a do ba nyoɡmare baŋa la foo.

Gedeɔn voɡ kwaara wa

²² Laa la habɔɔ la, Israel tena ŋɔ Gedeɔn be ŋɔ, “Ɛ ya kooro, ásɛ dɛ he baa sewaa, he bibaa ɡe di, dɛ o baa sewaa he naa ɡe di, dɛkalkɛ henee lɛ yaa Midian tena nɔn ta.”

²³ Anee o ŋɔ, “Maa won di kora he nɛ, ɡɛɛ n bibaa kɛɛ n naa ɡe aa wola won di kora he nɛ. Korowiirii dɛ́ di he kora.”

²⁴ O berɔ ŋɔ, “Kombeŋkpoŋii mɛɛ ba heyaa soŋa. Hé bini bɛlbwa tɛ mɛ deŋne kon beŋkpoŋ dɛ́ le laala haa paa laa ta la ta.” Midian tena la nawee waa suuɡaswɛm deŋna kwaa doe.

²⁵ Ba chaŋo ŋɔ, “Ya sie lɛɔ, yaa tɛɛ.” Asɛ ba paɡri yal bil, nomɛlbwa kpɔ suuɡaswɛm deŋne kon dɛ le kwaa waa dɔa laa ta baa bil o ta.

²⁶ Suuɡaswɛm deŋna kwaa baa ba a ne la tɔɡre ɛɛ ɛ suuɡapoŋa kaɡboŋ lafraanuanɛɛ. Ba dɔ bwara kondɛɛɡa ne baŋa kwaa ne laala kɔla Midian koranar aa dɛ do, dɛ kwaa aa lɔ ba nyoɡmare baŋa baa wola a te kure ja.

²⁷ Gedeɔn kpɔ suuɡaswɛm la ɛ voɡ dɛ kpɔ cheɡ o bwɛɛ Ofra. Israel tena la bwa berɔ vɛh Korowii toma, dɛ ka tomɛ voɡ la, asɛ o ɛ bel dɛ chɔ kpa Gedeɔn ne o dem tena.

Gedeɔn seo wa

²⁸ Gɛɛ a do Israel tena pɔ Midian tena nɛɛ ba ta kpeɡri dɔe kpa. Israel tena dɔ deŋnesɔɔhna bene fifraanaarɛ dɛ Gedeɔn ta soɡe le.

²⁹ Joas bibaa Gedeɔn baa bera dɛɛ yerɔ Jerub Baal berɔ kaa o bwɛɛ ka so.

³⁰ Dɛ o haahna warɔ, anomanta, o bibaala lɔ fifraanuanɛ.

³¹ Dɛ o dɔ haah bɛl o do Sɛkem o ne wɛɛ di sɛm o lolɛ bibaa dɛ pa o sɔn Abemɛlɛk.

³² Joas bibaa Gedeɔn biɡro kɛrɛdɛ mɔɔ dɛ sewɛ, asɛ ba huɡo o mɛɛ buɡ ta Ofra waa ɛ Abeɛsa dea tena bwɛ.

³³ Gedeɔn aa sewa la, Israel tena berɔ vɛh Korowii dɛ kaa tomɛ voɡ Baal ja. Ba cheɡ Baal Bɛret dɛɛ tomɔ,

³⁴ dɛ soh Korowii waa lɛɛ ba le ba dɔma baa soɡa bar ba cheme nɔn ta la.

³⁵ Wedɛɛɡa Gedeɔn baa dɛ yerɔ Jerub Baal aa ɛa tɛ Israel tena la, ba te ta wone ɛ ane tɛ o dem tena.