Sitɔɔla 7 - mzwDBL

Gedeɔn yo Midian tena dɛ pɔ ba nɛ

¹ Tɔɔ aa pera chɔmbibi la, Gedeɔn baa bera dɛɛ yerɔ Jerub Baal ne o laa tena bwa iro, dɛ ka baŋre ba tɛnte deene bobɛl nee aa bula dɛɛ le baa yerɔ Harɔd. Dɛ Midian tena ɡe baŋre ba tɛnte deene Gedeɔn laa tena la weekaŋle nyunduabɔr, fɛlembɔjen waa bɛne More Deŋɡare ta.

² Korowii ŋɔ Gedeɔn be ŋɔ, “He laa tena la warɔ ɡwaa ɡɛ maa dɛ nyin kɛ ń kpɔ Midian tena do ba nɔn ta bá pɔ ba nɛɛ la. Gɛ aa ɛ Israel tena bɛ ba lii kɛŋɔ ba ɡbaɡba kpeɡrii lɛɛ ba kɛ n ta wobɛlbwa ɛɛ la,

³ bol ba be kɛŋɔ nómɛlbwa waa dɛ ɔmɛ la le Gelead bwe nɔ ta dɛ berɛ kaa dem.” Anomanta, laa tena kaɡboŋa fifraanɛ dɛ banɛ laa berɛ kaa, asɛ a ka kaɡboŋa fi.

⁴ Korowii berɔ ŋɔ o be ja ŋɔ, “Nɛra la ta warɔ kohona. He ne ba kaa nee nyoa bá ka nyɔ ne, ásɛ n chalɛ ba bini tɛɛ. Bɛlbwa maa ŋɔ ó pui kaa la, he ne ó kaa. Dɛ n berɔ ŋɔ bɛl bɛ kaa laa, bɛ ɡel ó teŋɛ he nɛ.”

⁵ Anomanta, Gedeɔn kpɔ ba kaa nee nyoa. Korowii ŋɔ o be ŋɔ, “Chale banɔ la baa kpɔ nɔn lɔ nee dɛɛ ta nyoa kɛ nyootena la le banɔ la baa ɡuŋa dɛ kpɔ nyoa pi dɛɛ nyɔ la nɛ.”

⁶ Baala lafraatoroo lɔ nee ta nyoa. Banɔ la baa kaa la te bwa, ɡuŋaa ba ɡuŋi dɛ kpɔ nyoa pi nyɔ.

⁷ Belaa Korowii ŋɔ Gedeɔn be ŋɔ, “Nɛra lafraatoro baa lɔ nee ta nyoa la nɛɛ mɛɛ ba cheɡa, dɛ́ lɛ heyaa he pɔ Midian tena nɛ. Gel ba kar la bɛlbwa kaa bela waa lea ba.”

⁸ Gedeɔn ɡelɔ nɛra lafraatoro la so, asɛ o lɛ banɔ la baa kaa la kondikwaare ne ba bɛle, dɛ́ ɡel ba kaa ba tɛnte deene bini, dɛ́ kpɔ ba kondikwaare ne bɛle la tɛ baala lafraatoro la. Dɛ Midian tena lɔ fɛlembɔjen la bini, asɛ Gedeɔn ne o laa tena ɡe do o diŋɡoŋ ta.

⁹ Awola jwaana la, Korowii ŋɔ Gedeɔn be ŋɔ, “Ir dɛ́ kaa Midian tena sobɔr bela ka yoo ba. N dɛ ba ba kpɔe do he nɔn ta.

¹⁰ Dɛ he dɛ ɔmɛ kɛ he yoo ba aa, he ne he bonɔɔ Pura la bela baa lole.

¹¹ Hɛɛ ka no waa baa dɛ bolee, dɛ́ won che a ta dɛ́ dɔ bambikpeɡ dɛ́ yoo ba.” Anomanta, o ne o bonɔɔ Pura kaa pɛl ba dɔma la dahara.

¹² Dɛ Midian ne Amalɛk tena ne wee leebɔr tena la su fɛlembɔjen la bini pirim kɛŋɔ tontombɛ ken. Ba nyoɡmare ɡe warɛ kɛŋɔ mpo nyoa hɛŋle ken, haa won kur ba.

¹³ Gedeɔn aa dena tel bela la, dɛ baa bɛl dɛ baɡle deera waa deera o dɔŋ be ŋɔ, “N deero dɛ na kɛŋɔ paanoɡuɡule aa ɡbila jo ya Midian sobɔr bonɔ dɛ ba lɔ ya tɛnte dea kpeɡri nɛ asɛ o chole chɔ harɛ.”

¹⁴ Asɛ o dɔŋ la chaŋo ŋɔ, “Waa aa dɛ baɡle bwaa kɛŋɔ Joas bibaa Gedeɔn waa ɛ Israel te dɛ́ ba ba yo yaa. Korowii kpɔ ya Midian tena ne nɛra baa bala dɛ́ ba cha yaa la bwa do o nɔn ta.”

¹⁵ Gedeɔn aa no deera la ne ɡɛ naate la aa baɡle a bini la, o ɡuŋo dɛ jam Korowii, dɛ laa berɛ ba ba sobɔr dɛ ba ŋɔ takpeɡ ne ŋɔ, “Hé ir, Korowii kpɔ Midian tena do he nɔn ta.”

¹⁶ O bɔne o laa tena lafraatoro la bini kuore atoro, dɛ kpɔ bɛla ne vii kapɛla aa lɔ o bini dɛɛ hɔ tɛ bɛlbwa.

¹⁷ O ŋɔ ba be ŋɔ, “Hɛ́ɛ nyiŋ mɛ, dɛ́ teŋɛ n nɛ. Ya kaa bɛne ba aa, ɡɛ bwa maa ɛ la, hé ɡe ɛ ɡɛ tenten.

¹⁸ Dɛ he baa no banɔ la maa ja ba bini la hoh ya bɛle aa, hé kar la haa bar ba cheme la ɡe hoh hé kwaa dɛ́ moo ŋɔ, ‘Hé yo tɛ Korowii, hé yo tɛ Gedeɔn!’ ”

¹⁹ Gedeɔn ne o nɛra lafa la tel Midian tena sobɔr dahara bela harambaŋa. Gɛ saŋ dɛ Midian tena la le nɛnfala ba baa daah ba sobɔr bela. Asɛ Gedeɔn ne o laa tena la hoh bɛle la dɛ paɡre viine baa kpoŋa la.

²⁰ Kuore atoro la bwa hoh ba kwaa dɛ paɡre ba viine la. Ba kpoŋe kapɛle la nɔŋɡal ta, dɛ kpoŋe bɛle baa hoah la ɡe nɔndiɡ ta dɛɛ moo ŋɔ, “Hé kpɔ keri yo tɛ Korowii ne Gedeɔn!”

²¹ Gedeɔn nɛra la cheɡɔ kiŋkiŋ bar Midian tena sobɔr la, asɛ Midian tena la ɛɛ dooɡe lɔŋɔre dɛɛ chwa.

²² Nɛra lafraatoro la aa hoh ba bɛle la, Korowii ɡelɔ Midian tena baa lɔ ba sobɔr la bwa la ɡbaɡba ɛɛ kpoo dɔŋa. Asɛ ba bini laa tena baa kaa la chwa kpɔ sie chaɡɛ Sɛrɛra dɛ kaa Bɛt Sita dɛ kpoŋe kaa Ebel Mehola jwɛh waa bɛne Tabat la ta.

²³ Gedeɔn ɡelɔ ba yerɛ Naftale ne Aasa dɛ banɔ la baa le Manasɛ deene ta bwa, asɛ ba ti Midian tena la.

²⁴ Gedeɔn tomɛ nɛra Efrem dea tena be deŋɡarere harɛ la bwa ta ŋɔ, “Hé ba yo Midian tena la, dɛ́ ka tɔɔɡe bɔra baa kpɔ a ta ɡale Jɔɔdan Moo la, dɛ́ kpoŋe ka le Bɛt Bara.” Anomanta, Efrem laa tena bwa baa tɔɔɡe bɔra la ka le Bɛt Bara.

²⁵ Ba berɔ lawɛ Midian tena nomonome bane baa dɛ yer ba Oreb ne Seeb. Ba kpo Oreb bwe baa dɛ yerɔ Oreb ta, asɛ dɛ kpo Seeb ɡe bobɛl baa dɛ harame daa nɔna baa kpɔa dɛɛ ɛ sen baa yerɛ bela Seeb. Ba ti nɛra la asɛ dɛ teŋe Oreb ne Siib nyuune ba tɛ Gedeɔn Jɔɔdan Moo nyoa bela.