Sitɔɔla 6 - mzwDBL

Gedeɔn wa

¹ Israel tena berɔ ɛ wechɔɡa dɛ jo Korowii nɛɛ ja, asɛ o kpɔ ba do Midian tena nɔn ta ba di kpeɡri ba nɛɛ bene anuanɛ.

² Midian tena nyu bini aa baa do kpeɡri Israel tena nɛɛ kohona la, ba chwao kaa bwejena bɔɔne bini ne bela baa wola ban na, dɛ kpɔ bela berɛ deene dɛ so a bini.

³ Saŋ bɛlbwa Israel tena la aa parɛ ba kooni dɛ du kwaa la, ɡɛɛ Midian ne Amalɛk tena dɛ harɛre aa lɔ wee leebɔr nɛra yon ka jo harɛ la ta dɛ́ lɛ dɔɔh.

⁴ Ba dɛ baŋre ba tɛnte deene harɛ la ta dɛ́ so bela, dɛ́ chɔɡ kwaa baa dua dɛ kpoŋe ka le Gasa. Baa peera ne nae dɛ keeɡore, hale hweera kon te bɛlbwa ɡelɛ dɛɛ tɛɛ ba.

⁵ Ba cheɡɛ ba tɛnte deene ba ne ba kondɛɛra fuɡe le aa, ba do kɛŋɔ tontombɛ ken. Haa won kure ba ne ba nyoɡmare. Ba dɛ so harɛ la ta dɛ́ chɔɡ ba kwaa bwa.

⁶ Midian tena la ɡelɔ Israel tena la nya komɛlbwa kwaraa, asɛ ba wi no Korowii ŋɔ ó cha ba.

⁷ Israel tena aa wia no Korowii Midian tena waa la,

⁸ Korowii Israel tena aa dɛ tomɛ ɡelɔ o keame bɛl ba ba be ŋɔ, “Men lɛ heyaa le Ijipt harɛ ta somanjiri dii ta.

⁹ N lawɛ heyaa le Ijipt tena ne nɛra baa dɛ ɛ heyaa hɔhɔrɔwa nɔn ta kpeɡri ne. N doŋi harɛre nɛra le he sie dɛ kpɔ ba harɛ tɛ heya.

¹⁰ N ŋɔ he be kɛŋɔ menee Korowii haa dɛ tom mɛ. He bɛ Amɔre tena haa soɡe ba harɛ ta voɡare la dɛɛ tomɛ. Kɛ he vɛh n waa la noe.”

¹¹ Awola bɛl, Korowii nyundua torome baa so dajen bɛl mun bwɛɛ Ofra. Gɛ daa la ɛ Abeɛsa te baa dɛ yerɔ Joas kon. Dɛ o bibaa Gedeɔn sɔɔh dɛɛ lɔ mea daa la mun bobɛl baa dɛ harame daa nɔna baa kpɔa dɛɛ ɛ sen, ásɛ Midian tena la bɛ on na.

¹² Korowii nyundua torome la kpɔ o te baɡle Gedeɔn, dɛ ŋɔ o be ŋɔ, “Banyoo, Korowii ja he nɛ.”

¹³ Anee o chaŋo ŋɔ, “Nomoa, dɛ Korowii ja ya nɛ aa, ɛrɛɛ anɔ bwa berɛ pu yaa nɔɔ? Nyokpowaa ya naawa aa bol a waa baɡle yaa ŋɔ Korowii ɛa dɛ lɛ yaa le Ijipt harɛ ta la, ɛrɛɛ waa wola ane ɛɛ ya ɡe na nɔɔ? Taraken o ta yaa, dɛ kpɔ yaa do Midian tena nɔn ta.”

¹⁴ Belaa Korowii ɡbabir ŋɔ o be ŋɔ, “Gedeɔn, menee dɛɛ tomɛ. Kpɔ bokpeɡa haa dɔa la ka lɛ Israel tena le Midian tena nɔn ta.”

¹⁵ Asɛ Gedeɔn chaŋe ŋɔ, “N Naa Korowii, ɛrɛɛ mɛɛ ba ɛɛ dɛ́ won lɛɛ baɔ? Manasɛ dea tena bini la, n dem nɛraa ɡwɛɡra, asɛ n lolanar ɡe be pera la, n toole wobɛlbwa bini.”

¹⁶ Asɛ Korowii ŋɔ, “Mɛɛ ja he nɛɛ ásɛ he kpoo Midian tena bwa, kɛŋɔ haa yo nɛmbeŋkpoŋ ken.”

¹⁷ Anee Gedeɔn chaŋe ŋɔ, “Dɛ he sie lɛ n nɛ aa, ɛ waane ásɛ n jemɛ kɛŋɔ henee dɛɛ bol waa n be nɔ.

¹⁸ N poori so bonɔ ka tel kɛŋɔ maa ba saraha kwaa ne ba tɛɛ.” Asɛ Korowii ŋɔ, “Mɛɛ soo ka tel kɛŋɔ haa ba.”

¹⁹ Gedeɔn kaa kpo bohlor dɛ daalo, dɛ kpɔ men kuruware fi ɛ paanoo iisi aa wola toole a ta. O pa ola la do wɛɡrɛ bini, asɛ dɛ fuɡe yooma la do vii bini, dɛ kpɔ ba tɛo dajen la mun.

²⁰ Korowii nyundua torome la ŋɔ o be ŋɔ, “Kpɔ ola la ne paanoo iisi aa wola toole a ta la ba chɔŋɛ bwe nɔ ta, dɛ́ fuɡe yooma la do ola la ta.” Asɛ Gedeɔn ɛ ɡɛ.

²¹ Dɛ Korowii nyundua torome la kpoŋe daŋɡbala bɛl. O kpɔ daŋɡbala la nyoa leɡe ola la ne paanoo la, asɛ nii le bwe la ta dɛ fuh ola la ne paanoo la bwa. Asɛ Korowii nyundua torome la den nyoɡre le o sie kaa.

²² Gedeɔn aa baa na kɛŋɔ Korowii nyundua toromee la, o do lɔŋɔ ŋɔ, “Ei! Nemenɛ Korowii, n ne he nyundua torome sie ɡba dɔŋa.”

²³ Anee Korowii ŋɔ o be ŋɔ, “Sɔɔh bwara! Dɛɛ berɛ ɔma, haa sewa ba.”

²⁴ Anomanta, Gedeɔn ɛ kon baa dɛ ɛ saraha o ta tɛ Korowii bela dɛ pa o sɔn ŋɔ, ‘Korowiirii Deŋnesɔɔhna’. Kpoŋe ba le fini, kon la ta cheɡɛ Abeɛsa dea tena bwɛɛ Ofra.

²⁵ Awola jwaana la tenten Korowii ŋɔ Gedeɔn be ŋɔ, “Lawɛ he mɛɛ nabal, ne nabal bɛl waa di bene anuanɛ, dɛ́ kpɔ ka ɛ we-ɛɛla, dɛ́ kuuɡi kon he mɛɛ aa ɛ saraha o ta dɛɛ tɛ voɡ Baal, ásɛ dɛ teŋe voɡhaah Asera dajaŋ waa cheɡɛ o jwɛɛh la ta,

²⁶ ásɛ dɛ pa bwea darawe dɔŋa nɛ, dɛ́ ɛ saraha kon waa chɛ Korowii haa dɛ tomɔ la deŋɡare nɔ doa. Kpɔ voɡ Asera daa haa teŋa ta la dawɛ saraha kon la ta, dɛ́ fuh nabal nɛɛte la, dɛ́ ɛ saraha tɛ mɛ.”

²⁷ Anomanta, Gedeɔn kpɔ o bonɔɔna la bini fi dɛ ɛ ɡɛ Korowii aa bol o be la. Kɛ waa dɛ ɔmɛ o dem nɛra ne bwɛɛ la baala la nomanta, o ta an webaŋa ɛɛ dɛ ɛa jwaana.

²⁸ Bwɛɛ la tena aa ira chɔɔ la, ba nao kɛŋɔ ba kuuɡi voɡ Baal saraha kon la, dɛ teŋe voɡ Asera dajaŋ waa cheɡɛ o jwɛɛh la, dɛ berɛ fuh nabal nɛɛte saraha konfale la ta.

²⁹ Anee baa bɔɔ dɔŋa ŋɔ, “Umee baa ɛ ken nɔɔ?” Ba nyiŋi waa la ta kɛrɛdɛ dɛ na kɛŋɔ Joas bibaa Gedeɔnee ɛa.

³⁰ Ate, bwɛɛ la baala la Joas be dɛ ka ŋɔ, “Le he bibaa Gedeɔn ne ba. A chɛ kɛŋɔ ó sewɛ, dɛkalkɛ o kuuɡi ya voɡ Baal saraha kon la dɛ berɛ teŋe voɡ Asera dajaŋ waa cheɡɛ o jwɛɛh la ɡe ta.”

³¹ Kɛ Joas chaŋe baala baa wura ba o be bandia ne la ŋɔ, “Hé dɛ nyin kɛ he lɛ voɡ Baal waa bol kɛɛ? Hé dɛ nyin hé yo lɛo waa? Naate waa ŋɔ wɛɛ yoo dɛ́ lɛo la, chɔmbibii baa ba o kpoe. Dɛ Baal ɛ voɡ kasinteŋ aa, baa dɛ kuuɡi o saraha kon la, o fe wono yo lɛ o te.”

³² Anomanta, le awola tɔpere la, ba pa Gedeɔn sɔn Jerub Baal. O munii o ne voɡ Baalee dɔ wa, dɛkalkɛ onee kuuɡi o saraha kon.

³³ Midian ne Amalɛk tena dɛ nɛra baa soɡe wee leebɔr la bwa pɛo, dɛ ka baŋre ba tɛnte deene Jɔɔdan Moo baŋ Jesreel Fɛlembɔjen bini.

³⁴ Korowii Doma baa so Gedeɔn nɛ, asɛ o hoh bɛla dɛɛ yerɛ Abeɛsa tena bá ba teŋɛ o nɛ.

³⁵ O tomɛ toroma ba kpɔ Manasɛ harɛ ta dɛɛ yerɛ nɛra bá ba yo laa. Dɛ berɛ kpɔ Aasa ne Sebulon ne Naftale harɛre ta, dɛ yerɛ ba ɡe bá ba ja ba nɛ.

³⁶ Belaa Gedeɔn ŋɔ Korowii be ŋɔ, “N Naa Korowii, dɛ hɛɛ che n nɛɛ dɛ́ lɛ Israel tena ɡɛ haa baɡ mɛ nyoa la aa,

³⁷ mɛɛ kpɔ pee ponaa bil pɛla nɔ ta. Tɔɔ perɔ chɔɔ dɛ pee pona la pweɔh asɛ bela aa chɔa la te ta pweɛh yaa, ate dɛ n jemɔ kɛŋɔ hɛɛ che n nɛɛ lɛ Israel tena ɡɛ haa bola la.”

³⁸ Gɛ waa la ɛ ɡɛ. Gedeɔn iro chɔmbibi, o harame pee pona mɛn le a ta dɛ dɔ nee hɛna del.

³⁹ Gedeɔn berɔ ŋɔ Korowii be ŋɔ, “Bɛ ɡel he baah di n nɛ. Tɛ mɛ ŋwɛnɛ ń soŋe webeŋkpoŋ ja. Gel n kpɔ pee pona nɔ daah na ja. Taraken nɔ, ɡel pee pona nɔ hol ásɛ bela aa chɔa la pweh.”

⁴⁰ Awola jwaana la, Korowii ɛ ɡɛ. Pee pona la ɡboo hola asɛ bela aa chɔa la pweh.