Sitɔɔla 5 - mzwDBL

Dɛbora ne Barak yel

¹ Awola tɔpere la Dɛbora ne Abinoam bibaa Barak ɡo yel nɔ dɛ ŋɔ,

² “Hé kpɛɛ Korowii! Israel sitɔɔla tɔ sie dɛɛ la laa, ásɛ ba nɛra ɡe kpɔ ba te tɛ silɛɛ ne.

³ Koranar, nɛra haa dɛ nyiŋi harɛre ta, hé cheɡ deŋne dɛ́ no! Mɛɛ ɡo yelaa kpɛɛ Korowii. Yelsomaa mɛɛ ba ɡoe tɛ Korowii Israel tena aa dɛ tomɔ.

⁴ N Naa Korowii, haa le Sɛɛ Bwejen ta Edom harɛ ta la, harɛ jiɡro baama tɔ, asɛ bwaala nee fuɡe le nyundua.

⁵ Bwejena jiɡro hen Korowii waa ɛ Sinai Bwejen dɔɔ sie, Korowii Israel tena aa dɛ tomɛ la bala ta.

⁶ Anat bibaa Samɡa bere saŋ la, Jael ɡe aa lole la, nɛra vɛh ŋwɛnɛjena ta kpɔe, dɛ berɛ dɛɛ kpɔ ŋwɛnɛbie ta.

⁷ Nɛra tama banee ka Israel bwɛjeɡre ta, ka tel kɛŋɔ men Dɛbora aa bala dɛ berɛ Israel tena nya.

⁸ Gɛ saŋ Israel tena aa dɛ tomɛ voɡa la, laa ba bwɛɛre la ta. Baala kaɡboŋa fifraanaarɛ baa lɔ harɛ la ta, bɛlbwa ta lampea kɛɛ dɔmkon bɛlbwa kpoŋe.

⁹ N bambile lɔ sitɔɔla baa lɔ Israel harɛ nɛ, nɛra baa kpɔ silɛɛ le ba te cheɡ la. Hé kpɛɛ Korowii!

¹⁰ Hé no, he banɔ la haa soɡe keeɡopoŋa ta, dɛ so kwaa baa paa dawɛ a ta, ne he banɔ la haa dɛ valɛ nakpale ta.

¹¹ Hé no nɛra baa dɛ ɡo yela ɡbɔɡa aa dɛ le buli ta, dɛɛ baɡle Korowii laa waa yoa dɛ pɔ nɛra nɛ, ne Israel banyoola ɡe yoi baa yoa. Asɛ Korowii nɛra valɛ teŋɛ dɔŋa nɛɛ le ba bwɛjena ta dɛ ŋɔ,

¹² Dɛbora, ir dɛɛ ɡo yela! Ir che dɛ́ pa mun ɡo yela dɛɛ la! Barak, ir dɛ́ tɔ sie, Abinoam bibaa, ir lawɛ nɛra haa laɡ ba kaa harɛfale ta la kaa.

¹³ Belaa Korowii nɛra baa kaa la ba ja ba nomonome la nɛ, Korowii nɛra la ba n be dɛ ba ja banyoola la nɛ.

¹⁴ Bane le Efrem dea harɛ ta dɛ le Amalɛk tena luɡe ta, bane le Bɛnjamen dea harɛ ta dɛ ba, laa sitɔɔla le Makir harɛ ne Sebulon dea harɛ ta dɛ ba.

¹⁵ Isaaka dea nomonome ja Dɛbora nɛ, ba ja Barak nɛɛ dɛ chwa jo fɛlembɔjen la bini. Rubin dea tena te bini peɡro, ba ta wone la.

¹⁶ Bɔkwa waa he ta so peera nɔ baah nɔ? Peteɡra la foola baa foola dɛɛ yerɛ ba peera laanee hɛɛ no kɛɛ? Rubin dea tena bini peɡro, ba ta wone la.

¹⁷ Gelead tena soɡe Jɔɔdan Moo baŋ, asɛ Dan dea tena ta do bela stiimaere aa dɛ chuɡe. Aasa dea tena ɡe ka mpo nyoa dɛ den so bela.

¹⁸ Sebulon ne Naftale dea tena kpɔ ba nyu charɛ seo dɛ do laa ta.

¹⁹ Koranar balɔ dɛ ba yo, Keenan harɛ ta koranar balɔ dɛ ba yo. Ba baa yo Taanak waa bɛne nenabɔɔ Meɡido, kɛ ba ta wone kpɔ suuɡapoŋa kɛɛ komɛlbwa laa la ta.

²⁰ Hale weweela kwara aa lɔ nyundua, iro dɛɛ yo Sisera.

²¹ Kesɔn Moo palɛ laa tena kaa, Kesɔn Moo waa lole saŋ la bwa lɔ ba kaa. Mɛɛ kaa bambikpeɡ nee!

²² Belaa Sisera jaɡre chwa dɛ baa kaa a nakpale ɛɛ si harɛ, a dɛ jah a nakpale ɛɛ si harɛ kip kip kip.

²³ Korowii nyundua torome bolɔ ŋɔ, ‘Taah Mɛrɔs bwɛ, dɛ́ taah nɛra baa lɔ bwɛɛ la ta kohona. Ba ta Korowii ba chae. Ba ta leɛ dɛ ba yo Korowii dɔma ba bwara aa kpeɡa.’

²⁴ Haah waa na som bwaa Jael, Ken te Heba haah. Onee na som haahna baa soɡe tɛnte deene bini bwa nɛ.

²⁵ Sisera soŋe nee Jael be, o tɛo na-elne o nyɔ. Numol o fe aa chɛ nɛnjena binii o do na-elne aa soma tɛo.

²⁶ Jael kpɔ nɔŋɡal kpɔ kon baa kpɔa dɛɛ baŋre tɛnte la, dɛ kpɔ nɔndiɡ kpɔ hamba, dɛ kpɔ lɔ Sisera lwɛɛma, dɛ laa o nyu paɡre.

²⁷ Jael naa lɔɡree o chole. Waa chola la belaa o sewɛ dɛ sɔɔh chɔ.

²⁸ Sisera nya cheɡɛ tokoro ta dɛ nyiŋi bojaŋ dɛ ŋɔ, ‘Ɛrɛɛ Sisera biɡri o ta balɛ mɔɔ nɔɔ? Ɛrɛɛ yaa wola torɔɡore baa vɔwa pɛl jaɡre la ɡbɔɡa noɛ mɔɔ nɔɔ?’

²⁹ Gɛɛ haahna baa jemɛ waa dɛ so o jwɛɛh la chaŋe, o ɡe ta teŋɛ dɛɛ dalwe a ta dɛ ŋɔ,

³⁰ ‘Ba ken pa laa ta kwaa dɛɛ bɔna, baa bɛlbwa dɔ haah beŋkpoŋ kɛɛ banɛ, Sisera ɡe dɔ laaladɛɛɡa baa sɔh kwaa dawɛ a ta, haahna laaladɛɛɡa aa wera dɛ́ ba tɛ mɛ. Anɔ bwa ɛ kwaa baa paa laa ta.’

³¹ N Naa Korowii, ɡel he dɔma bwa serewe, Kɛ nɛra baa dɛ nyini la, ɡel ba dɔ kpeɡri kɛŋɔ wee yon le kpeɡri nɛɛ la.” Ate, deŋnesɔɔhna ba harɛ la ta bene fifraanaarɛ.