Sitɔɔla 4 - mzwDBL

Dɛbora ne Barak

¹ Ehud aa sewa habɔɔ la, Israel tena berɔ ɛ wechɔɡa dɛ jo Korowii nɛɛ ja.

² Anomanta, Korowii kpɔ ba do Keenan Kooro Jabin waa di kora bwɛjen Hasɔ nɔn ta. Kooro Jabin laa nomoa sɔne Sisera, dɛ so bwɛɛ Harɔsɛt Haɡoyim ta.

³ Dɛ Kooro Jabin dɔ bune kwaa aa do kɛ torɔɡo ba vɔwɛ dɛɛ pɛl jaɡre la lafraanuanaarɛ. O fɔɡɛ Israel tena kɛrɛdɛ bene fifraanɛ, asɛ ba berɛ wi no Korowii ŋɔ ó cha ba.

⁴ Dɛ haah bɛl sɔne Dɛbora dɛ ɛ Korowii keame, dɛ ɛ Israel tena sitɔɔ ɡɛ saŋ. O jaa sɔne Lapedɔt.

⁵ Dɛ bambi daa bɛl cheɡɛ Rama ne Bɛtel baah ta Efrem deŋɡarere harɛ ta baa yerɔ Dɛbora Bambi wɛɛ so o mun, asɛ Israel tena yon la o be o bol ba waa dɛɛ tɛɛ ba.

⁶ Awola bɛl, Dɛbora ɡelɔ ba ka yerɛ Abinoam bibaa Barak waa le bwɛɛ Kedes o do Naftale harɛ ta o ba, asɛ o ŋɔ o be ŋɔ, “Korowii Israel tena aa dɛ tomɔ la ŋɔ ń ŋɔ he be hé ka kpɔ Naftale ne Sebulon deene baala kaɡboŋa fi ja he nɛɛ dɛ́ tɔ ba sie kaa Tabɔ Bwejen ta.

⁷ Korowii ɛɛ ba Kooro Jabin laa nomoa Sisera ne torɔɡore baa vɔwa pɛl jaɡre la ne o laa tena nee Kesɔn Moo la nyoa, ásɛ dɛ ɡel he pɔ ba nɛ.”

⁸ Anee Barak chaŋe ŋɔ, “Dɛ hɛɛ puu mɛɛ kaa laa, mɛɛ lao. Kɛ dɛ haa la tenaa, n ɡe aa la.”

⁹ Dɛbora ɡe ŋɔ, “A wer, n ne hɛɛ kaaloo. Kɛ ŋwɛnɛ yaa dɛ ba kaala nɔ, he laa dɛ dɔ sɔn o ta. Haahnee Korowii ɛɛ ba ɡela o pɔ Sisera nɛ.” Anomanta, Dɛbora ja Barak nɛɛ ba kaa Kedes.

¹⁰ Barak yerɛ Sebulon ne Naftale deene baala kaɡboŋa fi ba teŋɛ o nɛ, asɛ Dɛbora ɡe ja ba kaa.

¹¹ Dɛ baa bɛl sɔne Heba dɛ ɛ Ken te. O le o nɛra bini dɛ ka baŋre o tɛnte dea dajen bɛl waa cheɡɛ Saananim dɛ bɛne Kedes mun. Ken tena nɔ ɛ Mosis menchoro Hobab naanar.

¹² Baa bol Sisera be ŋɔ Abinoam bibaa Barak kaa Tabɔ Bwejen ta la,

¹³ o kpɔ bune kwaa aa do kɛŋɔ torɔɡo ba vɔwɛ dɛɛ pɛl jaɡre la lafraanuanaarɛ ne o laa tena baa lɔ o be bwa, dɛ kpoŋe le Harɔsɛt Haɡoyim kaa Kesɔn Moo la nyoa.

¹⁴ Dɛbora ŋɔ Barak be ŋɔ, “Kaa! Fini tɔpere nɔɔ Korowii kpɔ Sisera do he nɔn ta hé pɔ o nɛ. Korowii te tɔ he sie kaa.” Anomanta, Barak ne o laa tena kaɡboŋa fi la tuo le Tabɔ Bwejen doa ba harɛ.

¹⁵ Barak aa dɛ tel Sisera be la, Korowii yoo tɛ Israel tena ba pɔ Sisera ne kwaa aa do kɛ torɔɡo ba vɔwɛ dɛɛ pɛla la bwa, ne o laa tena nɛɛ ba wili, asɛ Sisera tu le o bune kon waa do kɛ torɔɡo ba vɔwɛ pɛl jaaɡɔ la dɛ kpɔ nakpale ta chwa kaa.

¹⁶ Kɛ Barak ti kwaa aa do kɛ torɔɡore la ne laa tena la ka tel Harɔsɛt Haɡoyim. Ba kpoo Sisera laa tena la bwa kere ne, beŋkpoŋ kwaraa ta kae.

¹⁷ Dɛ Sisera te kpɔ nakpale ta, dɛ chwa kaa Ken te Heba haah Jael tɛnte bɔr, dɛkalkɛŋɔ dɛ Hasɔ Kooro Jabin ne Ken te Heba dem tena som.

¹⁸ Jael le buse ka cheme Sisera dɛ ŋɔ o be ŋɔ, “Dɛɛ ba nomoa, den dɛɛ ba. Dɛɛ berɛ ɔma.” Anomanta, o jo o tɛnte dea la bini, asɛ o kpɔ yal bɔlo.

¹⁹ Sisera ŋɔ, “Nyɔɡre dɛ kpo mɛ, n dɛ soŋe, tɛ mɛ nee ń nyɔ.” O kpɔ oltɔn loŋ ne na-elne tɛo o nyɔ, dɛ kwaa kon tɔ o nɛ.

²⁰ Sisera ŋɔ Jael be ŋɔ, “Ir che tɛnte doonyoa bela. Dɛ nomɛl baa bɔɔ ŋɔ nɛn lɔ bonɔ naa, he ŋɔ ɔɔhɔh.”

²¹ Koeh kohona nomanta, Sisera chɔ dom kwaraa, asɛ Heba haah Jael kpɔ kwaa baa kpɔa dɛɛ baŋre tɛnte la bɛl ne hamba, dɛ ɛ bɔeeh dɛ kpɔ kon la jaɡɛ o lwɛɛma ta, dɛ kpaa do o ka marɛ harɛ o sewɛ.

²² Barak ti Sisera dɛɛ ba, asɛ Jael le buse ka chemo dɛ ŋɔ, “Dɛɛ ba, mɛɛ chaɡle nɛn haa dɛ ɡaaɡe o bɔr nɔɔ.” Anomanta, o ne Jael jo tɛnte la bini, o na kɛ ba kpɔ kon baa kpɔa dɛɛ baŋre tɛnte jaɡɛ o lwɛɛma ta marɛ harɛ o sewɛ.

²³ Awola tɔpere la, Korowii ɡelɔ kpeɡri Keenan harɛ Kooro Jabin aa dɔa la nyoa sɔɔh Israel tena bwa siwi ta.

²⁴ Israel tena berɔ ba dɔ kpeɡri kɛrɛdɛ Keenan tena Kooro Jabin nɛɛ ka tel kɛŋɔ baa kpoo.