Sitɔɔla 3 - mzwDBL

Harɛre nɛra baa ka Keenan harɛ ta

¹ Korowii ɡelɔ a ɡɛ harɛre la nɛra bane so harɛ la ta, ásɛ dɛ kpɔ daah Israel tena baa wola Keenan harɛ ta laa laŋɛ ka la na.

² A ɡbo waa o ɛ ɡɛ dɛ́ kpɔ daah Israel tena naanar baa wola laa laŋɛ ka la, ásɛ ba jemɛ laa wa.

³ Nɛra waa ɡel ba laanee Filisti tena koranar banue, ne Keenan tena bwa, ne Sidon ne Hivi tena baa soɡe Lɛbanɔn bwejena ta, dɛ kpoŋe le Baal Hɛmɔn ka tel Lebo Hamat.

⁴ Gɛ nɛra laanee Korowii ɡel ba so, dɛ́ kpɔ daah Israel tena, dɛ́ na kɛŋɔ baa dɛɛ teŋɛ waa waa cheɡɛ Mosis nɛɛ dɛ do ba naawa la taa yaa.

⁵ Israel tena la ne Keenan ne Hiti ne Amɔre ne Pɛrɛs, ne Hivi dɛ Jebus tenaa pɛa so Keenan harɛ la ta.

⁶ Ba mo ba bihaahna dɛ lawɛ ba bihaahna tɛ ba ɡe ba mo, dɛɛ tomɛ ba voɡa.

Otniel wa

⁷ Israel tena la ɛ wechɔɡa dɛ jo Korowii nɛ. Ba berɛ habɔɔ kpo Korowii baa dɛ tomɔ la dɛ kaa tomɛ voɡa Baalre ne Asera.

⁸ Anomanta, Korowii baah di ba nɛɛ kohona dɛ kpɔ ba do Mɛsopoteemea Kooro Kusan Risataim nɔn ta, asɛ ba tomɔ bene anuatoro.

⁹ Kɛ ba wio yerɛ Korowii, asɛ o le Kenas bibaa Otniel o ba lɛɛ ba. Dɛ Kaleb nimee on.

¹⁰ Korowii Doma baa so o nɛ o ɛ ba sitɔɔ dɛ tɔ ba sie dɛɛ la laa. Korowii tɛo kpeɡri o won ka yo dɛ pɔ Mɛsopoteemea Kooro Kusan Risataim nɛ.

¹¹ Anomanta, deŋnesɔɔhna ba Israel harɛ ta bene fifraanaarɛ mɔɔ Otniel sewɛ.

Ehud wa

¹² Israel tena berɔ ɛ wechɔɡa dɛ jo Korowii nɛɛ ja, asɛ o ɡel Moab Kooro Ɛɡlɔn ɛɛ di kpeɡri ba nɛ.

¹³ O yerɛ Amɔn ne Amalɛk tena ja o nɛra nɛɛ ba ka yo Israel tena dɛ kpɔ nɔn dawɛ Jeriko ta.

¹⁴ Israel tena tomɛ Moab Kooro Ɛɡlɔn bene fi dɛ anuatoro.

¹⁵ Israel tena wio no Korowii ja, asɛ o le Bɛnjamen dea te Gɛra bibaa Ehud tɛɛ ba, ó ba lɛɛ ba. O ɛ ɡal te. Gɛ Ehud nɔɔ Israel tena tomɛ o kpɔ suuɡa ne kwaa baa bɔa dɛɛ tɛ Moab Kooro Ɛɡlɔn la dɛ ka tɛo.

¹⁶ Dɛ Ehud loɡɛ tokobi o jaŋne aa ɛ naɡale beŋkpoŋ ne tama, dɛ kpɔ sɛɡle o diɡ kɛɡra yapea bini.

¹⁷ Suuɡa ne kwaa Israel tena aa kpɔa tɛo la, o la a ne ka tɛ Moab Kooro Ɛɡlɔn. Dɛ kooro la ɛ nɛn waa bara kɛrɛdɛ.

¹⁸ Ehud aa kpɔ kwaa la ka tɛ kooro la, o ɡelɔ baala baa cheɡɛ kwaa la ka doo, dɛ laa berɛ kaa dem.

¹⁹ Ehud ne ba kaa tel voɡa aa bɛne Gelɡal, asɛ o te laa berɛ dɛ ba Kooro Ɛɡlɔn be ba ŋɔ, “N naa kooro, n dɔ wesɔɔhla ane dɛɛ ba he be bola.” Kooro la ŋɔ ó hel mɔɔ, asɛ o bonɔɔna la bwa le o jwɛɛh kaa.

²⁰ Ate, Ehud suuh bɛno, dɛ o ɡbo soɡe saldoa bela waa dɛ lɛ peu la dɛ ŋɔ, “N dɔ waane le Korowii be dɛɛ ba he tɛɛ.” Kooro aa ira le o kara ta la,

²¹ Ehud kpɔ nɔŋɡal dɛ laa tokobi la tɛr le o diɡ kɛɡra ta, dɛ kpɔ tɔɡɛ kooro tea.

²² Hale kere la daa la bwa joɔ o nyoa vah le o nyaŋ ta. Ehud ta kere la tɛrɛ le o tea ta, asɛ o noyal bɔle o ta.

²³ Asɛ o le dea bela dɛ karɛ ɡbeni tɔ kooro la nɛɛ dɛ le kaa.

²⁴ Waa kaala tonɛ la, kooro bonɔɔna la balɔ dɛ ba na kɛŋɔ kooro sobɔr ɡbeni la bwa kaɡrɔ. Dɛ ba liiree kɛŋɔ o ken kaa dahara.

²⁵ Ba cheɡɛ bela biɡri, dɛɛ kpa kɛŋɔ kooro ɛɛ ya ɡberaa. Waa wola ya la, ba lii kɛŋɔ ba dɛ ɛ bechawa, dɛ kpɔ safoa laa ɡbera la ya, dɛ na kɛŋɔ ba nomoa sewɔ chɔ.

²⁶ Kooro bonɔɔna la aa cheɡɛ bela la, dɛ Ehud te le bela dɛ chwa kpɔ voɡa la bɔr kaa Sɛɛra biɡri.

²⁷ Waa tel Efrem deŋɡarere harɛ ta la, o hoh bɛla yerɛ Israel tena, asɛ ba teŋɛ o nɛɛ le deŋɡarere la dor o tɔ ba sie ba kaa laa.

²⁸ O do ba ŋɔ, “Hé teŋɛ n nɛ, Korowii ɛɛ lɛ heyaa le Moab tena baa ɛ he dɔma nɔn taa.” Anomanta, ba teŋɛ Ehud nɛɛ dɛ kaa bɔra baa kpɔ a ta dɛɛ ɡale Jɔɔdan Moo dɛ kaa Moab harɛ ta la dɛ ka tɔɔɡa. Ba ta ɡelɛ nomɛlbwa ɡale moo la.

²⁹ Awola ba kpoo Moab laa tena dɛ ɛ kaɡboŋa fi baa ɡbaŋa dɛ do kpeɡri, bɛlbwa ta wone chwa kaa.

³⁰ Le awola tɔpere dɛɛ kaa la, Israel tena dɔ deŋnesɔɔhna bene fifraanuatoro, asɛ Moab tena ɛɛ tom ba.

Samɡa wa

³¹ Ehud aa bala habɔɔ la, Anat bibaa Samɡa ɡe kpoo Filisti tena lafraanumɛl daa waa seɡre o nyoa, dɛ kpɔ dɛɛ teɡɛ o nae la ne. O ɡe jao dɛ lɛ Israel tena.