Sitɔɔla 21 - mzwDBL

Bɛnjamen dea tena haahna moe wa

¹ Israel tena la aa cheme Mispa la, ba ŋwɛɛrɔ kɛŋɔ ba bini bɛlbwa bɛ o bihaah kpɔ tɛ Bɛnjamen dea bie ó mo.

² Israel tena la Bɛtel dɛ ka so Korowii sie dɛ kpɔ takpeɡ wi noo kohona ka tel jɔmɔra.

³ Ba wio ŋɔ, “Korowii ya Israel tena aa dɛ tomɛ, ɛrɛ taa a che ɡɛ waa nɔ pu yaa nɔɔ? Bɔkwa waa debeŋkpoŋ tena nyoɡre le ya bini fini nɔɔ?”

⁴ Tɔ aa pera chɔmbibi la, nɛra la ɛ kon baa dɛ ɛ saraha o ta bela, dɛ ɛ saraha baa dɛ fuah ne deŋnesɔɔhna saraha o ta tɛ Korowii.

⁵ Israel tena la bɔɔ dɔŋa ŋɔ, “Israel deene nɔ bwa bini, debesoo tenaa wola Korowii sie bonɔ balɔɔ?” Ba fa ŋwɛɛrɔ bil kɛŋɔ dea bɛlbwa waa wola Korowii sie Mispa bonɔ balɛ la, bá kpoo o nɛra.

⁶ Israel tena la wio tɛ ba bala Bɛnjamen dea tena la ŋɔ, “Fini tɔpere nɔ, dea beŋkpoŋ nɛra toole ya bini.

⁷ Ɛrɛɛ yaa ba ɛɛ dɛ won dɔ haahna tɛ Bɛnjamen dea tena baa kaa nɔɔ? Ya ɡe dɔɔ ŋwɛɛ Korowii sɔn ta kɛŋɔ ya bɛ ya bihaahna kpɔ tɛɛ ba bá mo.”

⁸ Ba berɔ ŋɔ, “Israel dea besoo nɛraa vɛah ba ta Korowii sie Mispa balɔɔ?” Ba baa na kɛŋɔ nomɛlbwa ta bwɛɛ Jabes Gelead ta leɛ ba,

⁹ dɛkalkɛŋɔ baa kure nɛra baa ba bela la, ba nao kɛŋɔ Jabes Gelead harɛ ta te beŋkpoŋ kwaraa toole bela.

¹⁰ Anomanta, nɛra baa cheme bela la le laa tena kaɡboŋa fi dɛ banɛ baa jemɛ yoi, dɛ do ba ŋɔ bá ka kpoo nɛra baa lɔ Jabes Gelead, dɛ́ kpoo hale ba haahna ne bechale bwa ja.

¹¹ Ba ŋɔ, “Hé kpoo baala ne haahna baa jemɛ baala bwa, dɛ́ ɡel toli baa wola baala jemɛ ka.”

¹² Ba na toli lafraanaarɛ Jabes Gelead baa wola baala jemɛ bwa, asɛ ba laɡ ba kaa bela baa baŋre ba tɛnte deene Silo waa lɔ Keenan harɛ ta.

¹³ Nɛra baa cheme bela la bwa tomɛ nɛra Remɔn Bwe la ta bá ka larawe Bɛnjamen dea tena baa lɔ bela.

¹⁴ Anomanta, Bɛnjamen dea tena la berɔ ba ɡɛ saŋ, asɛ Israel tena la kpɔ haahna baa laɡ ba le Jabes Gelead baa wola ban kpoorɛ la tɛɛ ba ba mo, kɛ ba ta baala la nyoa tele.

¹⁵ Israel tena la tea bini chɔɡɔ Bɛnjamen dea tena la wa, ɡɛ Korowii aa ɡela dea beŋkpoŋ tena aa wola toole ba bini la.

¹⁶ Nomonome baa lɔ nɛra baa cheme bela la ŋɔ, “Bɛnjamen dea haahna aa serewa nɔ, ɛrɛɛ yaa ba ɛɛ dɛ́ dɔ haahna tɛ baala baa kaa nɔɔ?”

¹⁷ Ba ŋɔ, “A chɛ kɛ Bɛnjamen dea tena baa dɔ ba nyu ba ta serewɛ nɔ mo haahna dɛ́ dɔ bii bá di ba kwa, ɡɛ aa ɛ Israel deene fi dɛ anɛ la bɛl sɔn bɛ he.

¹⁸ Ya Israel tena aa ŋwɛɛ ntam nɔ, yáa won kpɔ ya bihaahna tɛɛ ba ba mo. Ya bini bɛlbwa waa ɡela o bihaah yalɛ Bɛnjamen dea bie la, nyotaahna ɛɛ lawɔɔ.

¹⁹ Kɛ hé no! Ya dɛ ba tɔpejen bɛl dii Silo waa lɔ Bɛtel weekaŋle nyundua, ne ŋwɛnɛ waa lɔ Bɛtel ne Sɛkem wee leebɔr, ne Lɛbɔna weekaŋle harɛbɔr.”

²⁰ Israel tena la do Bɛnjamen dea tena la ŋɔ, “Hé ka sɔh ɡrepo daa kooni ta,

²¹ dɛɛ nyiŋi. Hé na Silo bitoli ba baa sa aa, hé ɛ warane dɛ́ le daa kooni la baah, ásɛ bɛlbwa ka lawɛ bɛl kaa he Bɛnjamen dea tena harɛ ta ó ɛ he haah.

²² Ba mɛɛnanar kɛɛ ba dɔɔranar ba dɛ bol ba waa ya be naa, ya ŋɔ ba be ŋɔ, ‘Hé takapɔ dɛ́ cha yaa, dɛkalkɛŋɔ ya ta haahna dɔe tɛɛ ba laa la nomanta. He kon som haa wola he bihaahna kpɔe tɛɛ ba la. Nyotaahna aa he nɛɛ ba.’ ”

²³ Anomanta, ɡɛɛ Bɛnjamen dea tena la ɛ. Haahna la aa ba dɛ sa la, asɛ bɛlbwa le ba lawɛ o kon dɛ kaa o ne, ó ɛ o haah. Ba berɔ kaa ka so ba harɛ ta, dɛ ka kwaa vɔrɔwe ba bwɛɛre dɛ so a ta.

²⁴ Israel tena le bela dɛ berɛ kaa ba harɛ ta ba lolanar be ne ba bwɛɛre ta.

²⁵ Gɛ saŋ dɛ kooro toole Israel harɛ ta, asɛ bɛlbwa ɛɛ ɛ ɡɛ aa wera o be.