Sitɔɔla 20 - mzwDBL

Israel tena kaa yo Bɛnjamen dea tena

¹ Israel tena baa soɡe Dan dea harɛ ta dɛ kpoŋe kaa Beɛseeba, dɛ banɔ la baa soɡe Gelead harɛ ta bwa baa cheme Korowii sie Mispa kɛ nɛmbeŋkpoŋ.

² Nomonome baa chɔ Israel deene nyoo la bwa baa ja Korowii nɛra baa chema la nɛ. Asɛ laa tena kaɡboŋa lafraanaarɛ kpoŋe tokobie.

³ Dɛ Bɛnjamen dea tena la noɔ kɛŋɔ Israel tena la kaa cheme Mispa. Israel tena la ŋɔ, “Hé baɡle yaa waa aa cheɡɛ a ta wedoŋa nɔ ba.”

⁴ Anee Lewi dea te baa kpo o sɛno la ŋɔ, “N ne n sɛnoo ba Gebea Bɛnjamen dea harɛ ta dɛ ba chɔ.

⁵ Jwaana la ne Gebea baala koh n wa dɛ bar dem la cheme dɛɛ nyin mɛ dɛ kpo. Ba ɡuɡri n sɛno la ba ne o chɔ, asɛ o sewɛ.

⁶ N kpɔ o lale la dɛ ba mɔne o bini bɔne tɛ Israel deene fi dɛ anɛ la bɛlbwa, ásɛ a chaɡle wedoŋa ne waa baa kia ba ɛa Israel harɛ ta la.

⁷ Israel tena, he bwa aa chema nɔ, hé bol a waa dɛ́ baɡle ɡɛ aa chɛ kɛ yá ɛ.”

⁸ Nɛra la bwa pɛo dɛ ŋɔ, “Ya bini bɛlbwa toole dɛɛ ba dem kaala. Akai! Ya bini bɛlbwa aa o bwɛɛ kaa.

⁹ Kenii yaa ba Gebea tena ɛɛ. Yáa bil daa, ásɛ dɛ ka yoo ba ɡɛ daa la aa baɡla la.

¹⁰ Yá kpɔ nɛra fi le nɛra lafa bɛlbwa bini Israel dea bɛlbwa ta, ásɛ baa tɛ ba laa tena la kondikwa. Ásɛ dɛ laa tena la tel Gebea waa lɔ Bɛnjamen dea harɛ ta naa, bá dɔ kondikwaa á tel ba, bá won yo Gebea tena la dɛ́ tɛr ba deŋne, wedoŋa baa ɛa Israel harɛ ta la wa.”

¹¹ Anomanta, Israel nɛra la bwa pɛo kɛ nɛmbeŋkpoŋ, dɛ́ ka yo Gebea tena.

¹² Israel deene la tomɛ nɛra Bɛnjamen dea harɛ ta bobɛlbwa ŋɔ, “Ɛrɛɛ he na wedoŋa baa ɛa he bini nɔ waɔ?

¹³ Hé le Gebea nɛnchɔɡa nɔ tɛ yaa yá kpoo ba, ásɛ ɡɛ wedoŋa nɔ le Israel harɛ ta.” Kɛ Bɛnjamen dea tena la ta ba bala Israel tena waa la mun noɛ,

¹⁴ dɛ ɡe le ba bwɛɛre ta ba cheme Gebea dɛ vɔrɔwe kɛ bá yo Israel tena.

¹⁵ Buɡ la ta, Bɛnjamen dea tena boa laa tena kaɡboŋa fifraanɛ dɛ banumɛl nyoa le ba bwɛɛre ta ba kpoŋe tokobie, dɛ kpɔ ja baala lafraanuanɛ baa lee ba le Gebea bela la nɛ.

¹⁶ Laa tena baa lee ba nɔ bwa bini, lafraanuanɛ ɛ ɡal tena ba nɔɔra aa dɛ na kɛrɛdɛ, baa wola kon waa do kɛ nyumpon kwaraa kur ta.

¹⁷ Israel tena dɔ laa tena kaɡboŋa lafraanaarɛ baa dɛ yo kɛrɛdɛ. Bɛnjamen dea tena ta ba nɛɛ jae.

¹⁸ Israel tena la Bɛtel dɛ ka bɔɔ le Korowii be ŋɔ, “Ya bini bamewaa dɛɛ ba sie tɔe ka yo Bɛnjamen dea tena nɔɔ?” Belaa Korowii chaŋ ba ŋɔ, “Juda dea tenaa dɛ́ tɔ sie ka yo.”

¹⁹ Tɔ aa pera chɔɔ la, Israel tena iro dɛ ka baŋre ba tɛnte deene bɛne Gebea,

²⁰ dɛ kpɔ ba te dɛ́ ka yo Gebea tena la. Bɛlbwa kaa che bela waa che dɛ kpɔ o te dɛ́ yoo ba.

²¹ Bɛnjamen dea tena la le Gebea, dɛ ba kpoo Israel tena kaɡboŋa fifraanɛ dɛ banɛ laa la ta awola tenten.

²² Kɛ Israel tena la do dɔŋa ɡbemba ja, dɛ berɛ ka che bela bɛlbwa fa aa cheɡa loɡla la.

²³ Israel tena la kaa wi no Korowii ka tel jɔmɔra, dɛ berɛ soŋo ŋɔ, “Yá ka pu ya bala Bɛnjamen dea tena la yo ja aa?” Anee Korowii chaŋe ŋɔ, “Hé kaa ka yoo ba.”

²⁴ Tɔpenɛɛte ta la, Israel tena suuhno tel Bɛnjamen dea tena la.

²⁵ Awola tɔpere la Bɛnjamen dea tena le Gebea dɛ ba yo, dɛ kpoo Israel tena kaɡboŋa fi dɛ banuatoro, dɛ ba bwa kpoŋe tokobie.

²⁶ Asɛ Israel tena la bwa la Bɛtel dɛ ka so Korowii sie dɛ wi noo ja. Ba vɔwɛ nyoa awola tɔpere le chɔɔ ka tel jɔmɔra. Ba fuh kwaa ɛ saraha ne deŋnesɔɔhna saraha tɛ Korowii.

²⁷ Israel tena la bɔɔ Korowii dɛ́ no le o be. Gɛ saŋ dɛ Korowii Ne Nɛwɛnyina Fɔo Daka la lɔ Bɛtel.

²⁸ Dɛ Eliasa bibaa Fenehas lɔ bela dɛɛ ɛ Korowii toma, o nabaalee Arɔn. Israel tena la bɔɔ Korowii ŋɔ, “Yá ka yo ya bala Bɛnjamen dea tena nɔ kɛɛ yá ɡelɔ?” Anee Korowii sɛh ŋɔ, “Hé kaa! Kere te mɛɛ kpɔ baa do he nɔn ta, ásɛ he pɔ ba nɛ.”

²⁹ Baa lea kaa la, ba kaa chɔ bar Gebea.

³⁰ Tɔpetooro wee la, ba kaa che ba chebɔra ɡɛ ba fa aa ɛa la, ásɛ dɛ yo Gebea tena.

³¹ Bɛnjamen dea tena la leɔ ba cheme Israel tena la, asɛ Israel tena saah kpɔ ba le bwɛɛ la dahare kaa sie. Ba pa mun dɛ kpoo Israel tena ɡɛ ba fa aa ɛɛ ba la. Nɛra fifraatoroo ba kpoo, ba chɔ kooni ne Bɛtel dɛ Gebea ŋwɛnɛre ta.

³² Dɛ Bɛnjamen dea tena la dɛ bol ŋɔ, “Ya dɛ pɔ ba nɛɛ ja.” Asɛ Israel tena la ɡe ŋɔ, “Yá chwa, ásɛ ba teŋɛ ya nɛɛ dɛ́ le bwɛɛ nɔ ta ba ŋwɛnɛre ta.”

³³ Israel tena la bwa le ba chebɔra dɛ berɛ ka che Baal Taama, asɛ banɔ la baa chɔa bar la ɡe den ɛɡɛ le ba sɔɔhbɔra Gebea wee cholibɔr wɔrɔbe nɛ.

³⁴ Israel tena kaɡboŋa fi baa jemɛ yoi kohona laanee lea dɛ ba yo Gebea tena, dɛ yoi la kpeɡri awola tɔpere. Dɛ Bɛnjamen dea tena la ta jemɛ kɛŋɔ ba seo tɔperee awola.

³⁵ Korowii cha Israel tena la ba pɔ Bɛnjamen dea tena nɛ. Ba kpoo ba laa tena kaɡboŋa fifraanɛ dɛ banue dɛ nɛra lafa, ba bwaa kpoŋe tokobie awola tɔpere.

³⁶ Ate, Bɛnjamen tena na kɛŋɔ Israel tena pɔ ba nɛ. A ɡɛ waa Israel tena chwa le Bɛnjamen dea tena nɛ, dɛ ba dɛ hwɛɡɛ ba bala baa chɔ kpɔɡ bini Gebea dahare la nɛ.

³⁷ Israel tena baa chɔa bar Gebea la lɔɔ jo bwɛɛ la bini bwa wɔrɔbe nɛ, dɛ kpoo bwɛɛ la tena bwa tokobie ne.

³⁸ Dɛ Israel tena la vɔrɔwɔ kɛŋɔ banɔ la baa chɔ kpɔɡ bini la ɡel chuu vɔwɛ bwɛɛ la ta bwa,

³⁹ ásɛ banɔ la baa kaa la jemɛ dɛ berɛ ba laa la ta. Gɛ saŋ Israel tena la aa laa berɛ dɛɛ ba bwɛɛ la ta la, dɛ Bɛnjamen dea tena dɔɔ kpoo Israel tena la nɛra fifraatoro asɛ dɛɛ bol ŋɔ, “Ya dɛ pɔ ba nɛɛ kɛŋɔ loɡla yoi la.”

⁴⁰ Kɛ chuu aa dɛ le bwɛɛ la ta dɛ tɛr dɛɛ kaa nyundua la, Bɛnjamen dea tena la keo nyiŋi dɛ na kɛ ba bwɛɛ la bwa vɔwɛ chuu.

⁴¹ Israel tena aa laa berɛ dɛ ba yo baa la, ɔmee lawɛ Bɛnjamen dea tena la kohona, ba ɡbabir jemɛ kɛŋɔ ba serewɔ tonɛ.

⁴² Ba chwao le Israel tena la be dɛ chaɡɛ pua hɛŋle ɡbo harɛ la ta, kɛ ba ta wone chwa le laa la ta. Israel tena la le bwɛɛ la ta dɛ ba kpoo ba bela.

⁴³ Ba bar Bɛnjamen dea tena la, dɛ chwa teŋɛ ba nɛɛ dɛ ka puu ba Gebea wee leebɔr.

⁴⁴ Ba kpoo Bɛnjamen dea laa tena kaɡboŋa fi dɛ banuatoro baa jemɛ yoi kɛrɛdɛ.

⁴⁵ Bɛnjamen dea tena la pa sie pua hɛŋle ɡbo harɛ la ta dɛɛ kaa Remɔn Bwe ta, asɛ Israel tena la kpoo ba bini kaɡboŋa banue, ba chɔ ŋwɛnɛre la ta. Ba nao teŋɛ ba nɛɛ ka le bwɛɛ baa dɛ yerɔ Gedɔm dɛ berɛ kpoo ba bini kaɡboŋa banɛ ja.

⁴⁶ Awola tɔpere la, Bɛnjamen dea laa tena kaɡboŋa fifraanɛ dɛ banue baa jemɛ yoi kɛrɛdɛ dɛ kpoŋe tokobiee serewa.

⁴⁷ Kɛ ba bini lafraanumɛl ɡboo wona chwa kaa Remɔn Bwe la ta dɛ ka so bela korobie anaarɛ.

⁴⁸ Israel tena la laa berɛ kaa Bɛnjamen dea tena harɛ ta, dɛ ka kpoo nɛra baa lɔ bwɛɛre la ta bwa, ne ba kondɛɛra, dɛ kon te bɛlbwa baa nao. Ba fuh bwɛɛre la bwa.