Sitɔɔla 2 - mzwDBL

Korowii nyundua torome ba Bokim tena be

¹ Korowii nyundua torome le bwɛɛ baa dɛ yerɔ Gelɡal dɛ ba bol waa Bokim tena be ŋɔ, “Menee lɛ heyaa le Ijipt harɛ ta, dɛ ba he ne harɛ maa baɡɛ he naawa nyoa kɛŋɔ mɛɛ kpɔɔ tɛ heyaa la ta la. N bol he be ŋɔ maa fɔo n ne haa fɔwa laanee chɔɡ bwa.

² N ŋɔ he ne nɛra baa lɔ harɛ la ta la bɛ fɔo bɛlbwa fɔwɛ, dɛ́ kuuɡi kwaa baa dɛ ɛ saraha a ta dɛɛ tɛ ba voɡa la. Kɛ he ta waa maa do heyaa a ta la noɛ. Ɛrɛɛ he ɛ ɡɛ nɔɔ?

³ Anomanta, n dɛ bol he be kɛŋɔ maa ban doŋi tɛ heya. Mɛɛ ɡeloo ba berɛ sɔɔhne dɛɛ tɔɡre heya, ásɛ ba voɡa ɡe berɛ do kɛŋɔ baa harɛ heyaa bela.”

⁴ Korowii nyundua torome la aa bol waa nɔ baɡle Israel tena la bwa la, ba wio kohona.

⁵ A waa ba pa bela sɔn Bokim. Ba kpoo kwaa ɛ saraha tɛ Korowii bela.

Josua seo wa

⁶ Josua ɡelɔ Israel tena la peɡre, bɛlbwa ka so harɛ waa bɔna tɛɛ ba la ta.

⁷ Ba tomɛ Korowii ɡɛ saŋ Josua aa soɡe le la bwa. O seo habɔɔ ɡba la, ba tomɛ Korowii ɡɛ saŋ bwa nomonome ba siwi aa na wejena Korowii aa ɛa tɛɛ ba la aa lole la.

⁸ Korowii bonɔɔ Nun bibaa Josua, dɔ bene lafa dɛ fi mɔɔ dɛ sewɛ.

⁹ Ba huɡo harɛ baa bɔna o dɔ la ta, Timnat Heres waa lɔ Efrem deŋɡarere harɛ ta, Gaas Bwejen weekaŋle nyunduabɔr.

¹⁰ Josua ne o nɛra la kapa aa baa serewe la, bane ɡe iro dɛ baa jemɛ kɛ Korowii lole, á ba ɛ kɛ baa na waa waa ɛa tɛ Israel tena laanee.

¹¹ Israel tena la ɛ wechɔɡa dɛ jo Korowii nɛ dɛɛ tomɛ voɡa Baalre.

¹² Ba vɛh Korowii ba naawa aa tomɔ o lɛɛ ba le Ijipt harɛ ta la toma, dɛɛ tomɛ nɛra baa soɡa bar ba la voɡa, a ɡel Korowii baah di ba nɛ

¹³ ɡɛ baa vɛh o toma dɛ kaa tomɛ voɡa Baalre ne voɡhaah Astɔrɛt la wa.

¹⁴ Korowii baah aa di Israel tena nɛɛ la, o ɡelɔ nɛra ba lɔ tɔ ba nɛ, dɛ pa ba laala bwa kaa kɛŋɔ laa ta kwa. O berɔ kpɔ ba do ba dɔma baa soɡa bar ba la nɔn ta, baa di kpeɡri ba nɛ ba lɛ ba te kahonɛ.

¹⁵ Saŋ bɛlbwa Israel tena aa ka yo laa la, Korowii yon laa nɔn kpɔ ba nɛ, asɛ ba dɔma pɔ ba nɛɛ ɡɛ waa ŋwɛɛra la. Dɛ ba waa sum kɛrɛdɛ.

¹⁶ Ate, Korowii tɛɛ ba sitɔɔla, asɛ ba lɛɛ ba le nɛra ba yon ba lɔ tɔ ba nɛɛ dɛ pa ba laala la nɔn ta.

¹⁷ Kɛ ba vɛh sitɔɔla la be noe, dɛ kpɔ ba te tɛ voɡa dɛɛ toma. Ba ta doe kɛŋɔ ba naawa ba fa aa dɛ no Korowii wa dɛɛ teŋɛ waa waa do ba a ta la ta. Ba vɛh o ŋwɛnɛ ta teŋa buɡ ta.

¹⁸ Saŋ bɛlbwa Korowii aa tɛɛ ba sitɔɔ la, o dɛ chao dɛ́ lɛɛ ba le ba dɔma nɔn ta ɡɛ saŋ sitɔɔ la taa soɡe le la. Korowii dɔ tedoma dɛɛ tɛɛ ba, wii baa dɛ wi hɔhɔrɔwa nɛra aa dɛ ɛɛ ba la wa.

¹⁹ Kɛ sitɔɔ la baa sewaa, dɛ ba berɔ kaa ba webena aa ɡwaa ba naawa kwaa la, dɛ kaa teŋɛ voɡare nɛɛ dɛɛ toma. Baa nyin ba ɡel ba wechɔɡa ne ba deŋnekpeɡ we-ɛɛla.

²⁰ Anomanta, Korowii baah di Israel tena nɛɛ o ŋɔ, “Chɔɡa nɛra nɔ aa chɔɡ fɔo n ne ba naawa aa fɔwa dɛ vɛh n waa noe nɔ,

²¹ maa harɛre nɛra Josua aa sewa ɡel ba laanee doŋi le ba harɛre ta tɛɛ ba kpa.

²² Mɛɛ kpɔ ɡɛ waa nɔɔ daah Israel tena na kɛ baa dɛɛ teŋɛ n nɛɛ dɛɛ tom mɛ, ɡɛ ba naawa fa aa dɛ ɛ la kɛɛ.”

²³ Gɛɛ a do Korowii ɡel nɛra la bane ka harɛ la ta, o ta ban kpɔe do Josua nɔn ta o doŋ ba le harɛ la ta kera beŋkpoŋ.