Sitɔɔla 19 - mzwDBL

Lewi dea te bɛl ne o sɛno wa

¹ A saŋ la, dɛ kooro toole Israel harɛ ta. Dɛ Lewi dea te bɛl soɡe bojaŋ bwɛɛ bɛl ta, Efrem deŋɡarere harɛ ta, dɛ ka kpɔ haah Bɛtlɛham waa lɔ Juda harɛ ta o ne wɛɛ di nyoa sɛm.

² Haah la le baa la habɔɔ dɛ ka chɔ banfale be, dɛ berɛ le o sɛno la be dɛ kaa Bɛtlɛham ka so o mɛɛ dem korobie anaarɛ.

³ Banloɡle la la o be dɛ ka larawo ásɛ o berɛ ba. Keeɡore anɛɛ o kpɔ o ne o bonɔɔ bɛl kaa. Haah la kpɔ baa la la o mɛɛ dem, o mɛɛ ɡe lɛo silɛɛ ne.

⁴ Dɛ haah la mɛɛ aa nyin kɛ baa la kaa dɛ ŋɔ ó so bela tama. Anomanta, o soɡe bela tɔpera atoro, belaa wɛɛ di kwaa dɛɛ nyɔ sen dɛɛ chɔ ɡe.

⁵ Tɔpenaarɛ wee la, ba felo ir asɛ o kpɔ o te dɛ fe ɛɛ kaa. Anee haah la mɛɛ ŋɔ, “Chɔɔ nyoa mɔɔ dɛ́ dɔ bokpeɡa dɛɛ la.”

⁶ Anomanta, baala banɛ la soɡo dɛ pɛ di kwaa la. A habɔɔ la, haah la mɛɛ berɔ ŋɔ baa la be ŋɔ, “N dɛ soŋe, lɛ he sie dɛ chɔ.”

⁷ Baa la aa ira dɛɛ ba kaala la, o hela la ta sɛɛh, asɛ o berɛ chɔ bela awola tɔpere la.

⁸ Tɔpenue wee waa ira chɔmbibii dɛɛ ba kaala la, o hela la ŋɔ o be ŋɔ, “So dɛ́ di kwa, webaŋa mɔɔ dɛ kaa.” Asɛ ba nɛra banɛ la so dɛ di kwaa la.

⁹ Baa la ne o sɛno la ne bonɔɔ la aa ira dɛɛ ba kaala la, haah la mɛɛ ŋɔ ba be ja ŋɔ, “Taraken bɔr joɔ tonɛ, so lɛ he sie dɛ chɔ, ásɛ kere chɔmbibii, hé chiɡ ŋwɛnɛ ta kaa.”

¹⁰ Kɛ dɛ baa la aa nyin kɛ o chɔ bela jwaana kpa, dɛ pa kwaa baa paa dawɛ keeɡo ta dɛɛ so o ta la dawɛ keeɡore anɛ la ta, asɛ o ne o sɛno la kpɔ sie chaɡɛ Jebus waa ɛ Jerusalam.

¹¹ Baa dɛ tel Jebus waa ɛ Jerusalam bɔr ɛɛ ba joe la, bonɔɔ la ŋɔ o dɔɔ be ŋɔ, “Nomoa, yá chɔ Jerusalam bonɔ, ásɛ kere chɔɔ dɛ́ kaa.”

¹² Nomoa la ŋɔ, “Akai, yaa nɛŋhɔɔhra baa wola Israel tena ɛɛ bee chɔ. Yaa kaa Gebeaa.”

¹³ O bolɔ ja ŋɔ, “Yáa la! Yá takapɔ tel Gebea kɛɛ Rama, dɛ́ ka chɔ a ɡɛ bwɛɛre nɔ bɛl ta.”

¹⁴ Ba kaalɔ ka bɛne Gebea waa lɔ Bɛnjamen dea harɛ ta, dɛ wee le harɛ.

¹⁵ Belaa ba choɡ ŋɔ bá chɔ. Ba kaa so bela bwɛɛ la tena aa dɛ cheme, kɛ nomɛlbwa ta ban kpɔe kaa dɛ́ ka tɛɛ ba bɔr bá chɔ.

¹⁶ Awola jɔmɔra la, dɛ banjena bɛl le koo dɛɛ ba. Dɛ o le Efrem deŋɡarere harɛ dɛ ba so Gebea bela, Bɛnjamen dea tena bwɛɛ.

¹⁷ Banjena la aa na hɔɔhra la bela bwɛɛ la tena aa dɛ cheme la, o bɔɔ ba ŋɔ, “Leperaa hɛɛ kaalɔ? Lee he leɔ?”

¹⁸ Anee o ŋɔ, “Ya le Bɛtlɛham waa lɔ Juda harɛ ta dɛɛ kaa Efrem deŋɡarere harɛ bojaŋ, belaa n so. N dɛ kaa n bwɛ, kɛ nomɛlbwa ta yaa kpɔe kaa o dem yá ka chɔ.

¹⁹ Nomoa, ya dɔ kondikwaa dɛ́ tɛ ya keeɡore nɔ, dɛ dɔ ya ɡbaɡba kondikwaa ne sen. N ne n sɛno ne bonɔɔ nɔ dɔ komɛlbwa ya be.”

²⁰ Ate, banjena la ŋɔ, “Mɛɛ kaa he ne n demii. Mɛɛ tɛ heyaa komɛlbwa haa dɛ nyinii, kɛ waa aa hiah mɛɛ kɛ he bɛ bwɛɛ nɔ cheremibɔr bonɔ chɔ jwaana nɔ ne.”

²¹ Anomanta, o kaa ba ne o dem, dɛ tɛ keeɡore la kwaa a di. O tɛ nɛra la nee ba sarame ba nakpale, dɛ tɛɛ ba kondikwaa ba di dɛ tɛɛ ba sen ɡe ba nyɔ.

²² Baa dɛ lɛ ba sie la, nɛnchɔɡa bane baa lɔ bwɛɛ la ta baa bar dem la cheme, dɛɛ lɔ dem la doonyoa ɡbera la, dɛɛ kɔɡre dem te la ŋɔ, “Le baa la waa ba he dem bonɔ la ne tɛ yaa yá lawɔ ka chɔ kɛ baa ne haah.”

²³ Dem te la le buse dɛ ka ŋɔ ba be ŋɔ, “Akai! Ya bala, he bɛ wedoŋa nɔ ɛ. N hɔɔhree, hɛɛ berɛ a ɡɛ sihihwaa nɔ ɛɛ.

²⁴ N bihaah waa wola baa jemɛ bwa lole, mɛɛ le o ne n hɔɔh nɔ sɛnoo tɛ heya, ásɛ he ne ba ka chɔ. Kɛ baa nɔ te, he bɛ on a ɡɛ sihihwaa nɔ ɛ.”

²⁵ Nɛra la vɛh banjena la waa la. Anomanta, hɔɔh la lawɛ o sɛno la le buse tɛɛ ba, ba lawɔ dɛ ka ɡuɡru ba ne o chɔ jwaana la ne bwa. Bɔr aa dɛ chaah la, ba tao ŋwɛnɛ o kaa.

²⁶ Bɔr aa dɛ chaah la, haah la berɔ kaa dem bela o dɔɔ aa lole la. O cholo chɔ dem la doonyoa ka tel kɛŋɔ bɔr aa chaahna.

²⁷ Baa la aa ira chɔɔ ne la, o kaa ya dem la ɡbera dɛ le buse dɛ́ kaa, asɛ dɛ na ɡɛ o sɛno la aa chɔa o nɔɔra ba dawɛ doonyojoo ɡbera daa la ta.

²⁸ Anee o ŋɔ o be ŋɔ, “Ir ya kaa!” Kɛ haah la ta on chaŋɛ, asɛ o na kɛŋɔ o sewɔ. Belaa o kpɔ o lale dawɛ keeɡo ta dɛɛ kaa o bwɛ.

²⁹ Waa tel dem la, o kpɔ kere mɔne o sɛno la bini bɔre fi dɛ anɛ, dɛ kpɔ ka tɛ Israel deene fi dɛ anɛ la bwa.

³⁰ Nomɛlbwa waa no ɡɛ waa nɔ la ŋɔ, “Dɛ le kɛŋɔ Israel tena aa le Ijipt harɛ ta ba la, ya ta waa nɔ dɔŋa nae bwa, ya ta a dɔŋa noɛ ɡe bwa. Ɛrɛɛ yaa ba ɛɛ yɔ? Yá nyiŋi a ta kɛrɛdɛ. A chɛ kɛ yá ɛ waane.”