Sitɔɔla 18 - mzwDBL

Dan dea tena Lais soɡa wa

¹ Kooro toole Israel tena harɛ ta ɡɛ saŋ. Dɛ Dan dea tena ta harɛ dɔe o ɛ ba ɡbaɡba kon Israel harɛ ta, ba ɡaaɡe dɛɛ nyin bela baa so.

² Anomanta, Dan dea tena tomɛ laa tena banue le bwɛɛre Sora ne Ɛstaol ŋɔ bá ka sɔh ɡaaɡe harɛ la ta dɛ́ na ɡɛ waa doa. A ɡɛ laa tena nɔ cheɡɔ tɛ Dan dea tena bwa. Ba ŋɔ ba be ŋɔ, “Hé ka ɡaaɡe harɛ la dɛ́ na ɡɛ waa doa.” Ba jo Efrem dea tena deŋɡarere harɛ ta, dɛ ka le Maeka dem dɛ chɔ bela.

³ Baa lɔ dem bela la, ba no Lewi bonɔɔ bɛl taa, dɛ la o be ka bɔɔro ŋɔ, “Umee ba he ne bonɔ nɔ? Bɔkwaa hɛɛ ɛ bonɔ nɔ? Bɔkwa waa he do bonɔ nɔ?”

⁴ O ŋɔ ba be ɡɛ Maeka aa ɛa tɛo dɛ ŋɔ, “O kpɔ mɛ ɛ o voɡ kerekpoŋri dɛɛ bɔ mɛ kem.”

⁵ Ba ŋɔ o be ŋɔ, “Ya poori, bɔɔ Korowii na kɛ ya ŋwɛnɛ yaa dɛ kaa nɔ ɛɛ ka do werii tɛ yaa kɛɛ?”

⁶ Anee kerekpoŋri la ŋɔ, “Hé kaa deŋnesɔɔhna ne. Korowii ja he nɛ.”

⁷ Anomanta, baala banue la leɔ dɛ kaa Lais harɛ. Belaa ba ka na kɛŋɔ bela nɛra la soɡe deŋnesɔɔhna ta kɛŋɔ Sidon tena ken, dɛ so kɛrɛdɛ, dɛɛ lii kɛŋɔ wobɛlbwa aa ban pu. Komɛlbwa lɔ ba harɛ la ta, ba dɔ ba te. Ba ne Sidon tena baah jaŋne, ba ne nomɛlbwa aa chamene di.

⁸ Nɛra banue la aa bera ba Sora ne Ɛstaol la, ba bala bɔɔ ba ŋɔ, “Bɔkwaa he ka na nɔ?”

⁹ Anee ba chaŋe ŋɔ, “Hé ba yá ka yoo ba! Ya nao kɛŋɔ harɛ la wer kɛrɛdɛ. Hé ɛ warane, hɛɛ berɛ ɔma. Yá kaa, yaa pɔ ba nɛɛ dɛ́ kpɔ harɛ la.

¹⁰ Hé laŋaa, hɛɛ pu nɛra baa wola lii kɛŋɔ waane ɛɛ pu baa. Harɛ la kan. Korowii kpɔɔ do he nɔn ta. Komɛlbwa ta o ta nyae.”

¹¹ Anee baala lafraanumɛl le Dan dea dɛ vɔrɔwe laa le Sora ne Ɛstaol dɛɛ kaa ka yoo ba.

¹² Baa dɛ kaa la, ba kaa baŋre ba tɛnte deene Kiriat Jearim, o lɔ Juda harɛ ta. A ɡɛ nomanta, ba dɛ yerɛ Kiriat Jearim wee cholibɔr Mahane Dan, dɛ ba le fini.

¹³ Baa le bela la, ba kaa Efrem deŋɡarere harɛ ta, dɛ ka le Maeka dem.

¹⁴ Baala banue baa laŋa ka sɔh nyiŋi Lais harɛ la ŋɔ ba bala laa tena la be ŋɔ, “Hé jemɔ kɛŋɔ batakaarebora waa do kɛŋɔ efɔd ne dem voɡare baa sɛah kɛɛ dɛ loɡa lɔ deremi nɔ bɛl ta naa? Ɛrɛɛ chɛ kɛ yá ɛɔ?”

¹⁵ Ba bɛɡɔ jo Maeka dem dɛ ka na Lewi bonɔɔ la bela dɛ chɔɔro.

¹⁶ Dan dea laa tena baa kpɔ ba te dɛ́ ka yo la cheɡɛ dem la doonyoa.

¹⁷ Baala banue baa kaa sɔh ɡaaɡe harɛ la ta la joɔ kaa dem la bini, dɛ ka kpɔ batakaarebora waa do kɛ efɔd la, ne voɡ baa sɛah la, ne deremi voɡa ane ne voɡ baa kpɔ suuɡapoŋa ɛo la, dɛ anɔ la aa jaa bwa. Asɛ kerekpoŋri la ne laa tena lafraanumɛl la ɡe che doonyoa la ta.

¹⁸ Nɛra nɔ aa kaa jo Maeka dem dɛ ka pa a ɡɛ kwaa nɔ la, kerekpoŋri la bɔɔ ba ŋɔ, “Ɛrɛ ɡee hɛɛ ɛ ɡɛ nɔɔ?”

¹⁹ Anee ba chaŋo ŋɔ, “Tɔ nyoa, bɛ nyoa pili bol wa. Ba ja ya nɛɛ dɛ́ ɛ ya mɛɛ ne nɛn waa dɛɛ ja yaa. Dɛ he tomɛ Israel dea bɛl nɛra kwaraa naa, a laa wera ɡwaa kɛŋɔ haa dɛ tomɛ nɛmbeŋkpoŋ ne o dem tena ɡbo naa?”

²⁰ Sɔfo la sɛoh silɛɛ ne dɛ pa batakaarebora waa do kɛ efɔd, ne voɡ baa sɛah ne deremi voɡa dɛ kwaa aa jaa bwa, dɛ teŋɛ nɛra la nɛɛ kaa.

²¹ Ba kpɔ ba bii ne ba laala dɛ teɡɛ ba kondɛɛra tɔ ba sie kaa.

²² Baa vala le Maeka dem tel sie tama la, Maeka yerɛ nɛra o ne ba deremi aa bɛne dɔŋa la, dɛ ti Dan dea tena la dɛ ka puu ba.

²³ Ba teŋɛ ba nɛɛ dɛ kpɔ takpeɡ dɛɛ yer ba, asɛ Dan dea tena la laa berɛ dɛ bɔɔ Maeka ŋɔ, “Bɔkwa waa yɔ? Ɛrɛɛ he yerɛ he nɛra bá ba yo yaa nɔɔ?”

²⁴ Anee o chaŋ ba ŋɔ, “Haa jemɛ waa haa ɛa aa? He kpɔ n voɡa maa ɛa ne n Kerekpoŋri kaa. Bɔkwaa n dɔ jaɔ?”

²⁵ Asɛ Dan dea tena la ŋɔ, “Bɛ yaa tɔŋle, ya bini bane baah aa biɡri dii. Ba baah diu waa, baa yo heyaa dɛ́ kpoo he ne he dem tena bwa.”

²⁶ Anomanta, Dan dea tena la kaalɔ, asɛ Maeka aa naa kɛŋɔ ba kpeɡri ɡwaalo la, o berɛ kaa dem.

²⁷ Asɛ ba kpɔ kwaa Maeka aa ɛa la ne o sɔfo la kaa Lais harɛ ta, dɛ yo nɛra ba fe aa soɡe deŋnesɔɔhna ta, baa wola lii kɛ wobɛlbwa ɛɛ puu baa la, dɛ fuh ba bwɛɛ la.

²⁸ Ba ta lɛɛ bɛlbwa dɔe, dɛkalkɛŋɔ ba ne Sidon tena baah jaŋne. Ba ta nomɛlbwa ɡe dɔe ba ne baa di chamene. Bwɛɛ la chɔ fɛlembɔjen bɛl bini dɛ bɛne bwɛɛ Bɛt Rehob. Dan dea tena kwaarɔ vɔrɔwe bwɛɛ la dɛ so o ta.

²⁹ Ba kpɔ ba nabaa Dan sɔn pa bwɛɛ la, ba bwa nabaa Jekɔb aa lolɔ la. Dɛ ba fa dɛ yerɛ bwɛɛ la Lais.

³⁰ Dan dea tena cheɡ voɡa la bwɛɛ la ta dɛɛ toma, asɛ dɛ kpɔ Jonatan ɛ ba kerekpoŋri. O mɛɛ sɔne Gɛɛsɔm, Gɛɛsɔm ɡe mɛɛ sɔne Mosis. Jonatan bibaala ɛ ba sɔfore dɛ kpoŋe ka tel saŋ nɛra bane aa baa laɡ ba laa ta kaa harɛfale ta.

³¹ Gɛ saŋ Korowii Tɛnte Dea aa lɔ Silo la bwa, dɛ ba ta teŋɔ dɛɛ tomɛ voɡa Maeka aa ɛa la.