Sitɔɔla 17 - mzwDBL

Maeka voɡa wa

¹ Baa bɛlee fa lole baa yerɔ Maeka. O le Efrem dea dɛ so Efrem deŋɡarere harɛ ta.

² Awola bɛl, o iro dɛ ŋɔ o nya be ŋɔ, “N noɔ kɛ haa dɛ taah naate waa kpɔ he suuɡapoŋa kaɡboŋ dɛ lafa. Menee kpɔa, a lɔ n be.” Asɛ o berɛ kpɔ suuɡapoŋa la tɛ o nya, anee o nya ŋɔ, “N bie, Korowiirii dɛ sweere andɛɛɡa.”

³ Waa kpɔa tɛ o nya la, o nya ŋɔ, “N kpɔɔ do Korowii nɔn ta, ásɛ n bie Maeka kpɔ ɛ voɡ dɛ́ kpɔ suuɡapoŋa la maɡre o ta. Anomanta, n bie, n kpɔɔ tɛɛ.”

⁴ O kpɔ suuɡapoŋa la tɛ o nya, o ɡe kpɔ a bini lafraanɛ ka tɛ nɛn waa dɔ suuɡapoŋa kpɔe dɛ ɛ kwaa wejema, asɛ o kpɔ ɛ voɡ, ba kpɔ ka cheɡ Maeka dem.

⁵ Dɛ Maeka nɔ dɔ voɡ dea, asɛ o ɛ batakaarebora kɛŋɔ sɔfo batakaare baa dɛ yerɔ efɔd la ken ne voɡa ane, dɛ kpɔ o bibaala la bɛl ɛ o kerekpoŋri.

⁶ Gɛ saŋ dɛ Israel tena ta kooro dɔe, asɛ bɛlbwa ɛɛ ɛ waa waa dɛ nyin.

⁷ Dɛ bonɔɔ bɛl ɛ Lewi dea te dɛ le Bɛtlɛham waa lɔ Juda harɛ ta, dɛ so Juda dea tena bini.

⁸ O le Bɛtlɛham dɛɛ la ka nyin bofale dɛ́ so. Waa chiɡ ŋwɛnɛ ta dɛɛ kaa la, o kaa le Maeka dem Efrem deŋɡarere harɛ la ta.

⁹ Anee Maeka bɔɔro ŋɔ, “Leperaa he leɔ?” Asɛ o ŋɔ, “N ɛ Lewi dea te, n le Bɛtlɛham Juda harɛ ta dɛɛ nyin bobɛl dɛ́ so.”

¹⁰ Anee Maeka ŋɔ o be ŋɔ, “So n be bonɔ dɛ berɛ n mɛɛ ne n kerekpoŋri, ásɛ benanyoa bɛlbwa mɛɛ tɛɛ suuɡapoŋa fi ne laala dɛ kondikwa.”

¹¹ Anomanta, bonɔɔ la sɛoh so Maeka be, o kpɔɔ ɛ o bibaala la bɛl.

¹² Maeka kpɔɔ ɛ o voɡ la kerekpoŋri, o do dem bela.

¹³ Ate, Maeka ŋɔ, “Taraken maa dɔ Lewi dea te o ɛ n kerekpoŋri nɔ, n jemɔ kɛŋɔ Korowii ɛɛ ɡeloo n wobɛlbwa do wer tɛ mɛ.”