Sitɔɔla 16 - mzwDBL

Samsen ba Gasa

¹ Awola bɛl, Samsen la Filisti tena bwɛɛ Gasa ta. O na jwamanhaah bɛl dɛ ka chɔ o be.

² Asɛ nɛra bol bwɛɛ la tena be ŋɔ, “Samsen ba bonɔ!” Anomanta, ba bar bwɛɛ la cheme jwaana la ne dɛɛ kpao bwɛɛ la doonyoa. Ba ta bela leɛ jwaana la ne bwa dɛɛ bol ŋɔ, “Bɔr chaahna binii yaa ba o dɔe dɛ́ kpoo.”

³ Samsen chɔ bela ka tel harambaŋa ɡbo. Asɛ o ir dɛ ka lawɛ bwɛɛ la doonyoa ɡbeni, dɛ laa a daa ne buni baa kpɔa karɔ la bwa huɡri dawɛ o vam ta, dɛ kpɔ kaa deŋɡare bɛl waa chaɡɛ Hɛbrɔn ta.

Samsen ne Delaela

⁴ A habɔɔ la, o pɛla lawɛ haah bɛl baa dɛ yerɔ Delaela. O soɡe fɛlembɔjen bɛl baa dɛ yerɔ Sorek bini.

⁵ Filisti nomonome la la haah la be ŋɔ, “Takapɔ dɛ tao baradeɛre, ásɛ o baɡle o bokpeɡa kohona waa dɔa nɔ mun, ne ɡɛ yaa dɛ ba wona pɔ o nɛɛ dɛ́ won vɔrɔwo o sɔɔh. Ya bini bɛlbwa fe ɛɛ tɛɛ suuɡapoŋa kaɡboŋ dɛ lafaa.”

⁶ Anomanta, Delaela ŋɔ Samsen be ŋɔ, “Baɡ mɛ he bokpeɡa kohona haa dɔa nɔ mun, ne ŋwɛnɛ yaa kpɔ o ta dɛ́ won vɔrɔwe he sɔɔh.”

⁷ Anee Samsen chaŋo ŋɔ, “Dɛ nomɛlbwa kpɔ ol tɔnlwɛɛ ŋwɛɛra bele anuanɛ aa wola holɛ vɔɡ mɛ naa, mɛɛ ɡwɛɡroo dɛ do kɛ baa bɛlbwa aa doa.”

⁸ Filisti nomonome la nyin ol tɔnlwɛɛ ŋwɛɛra bele anuanɛ aa wola holɛ tɛ haah la ásɛ o vɔrɔwo.

⁹ Dɛ baala bane sɔh o be dea, asɛ o yerɔ takpeɡ ne ŋɔ, “Samsen, Filisti tena dɛ ba he nɛ!” O chaa ol tɔn ŋwɛɛra la kɛŋɔ jise baa choŋi nii leɡo ken. Anomanta, ba ta wone jemɛ o bokpeɡa waa dɔa la mun.

¹⁰ Delaela ŋɔ Samsen be ŋɔ, “Gɛnee men hɛɛ neɡ mɛ naa? Name te, chaɡ mɛ ɡɛ baa ɛ dɛ́ won vɔrɔwe.”

¹¹ Samsen ŋɔ o be ŋɔ, “Dɛ ba vɔɡ mɛ kɛrɛdɛ ŋwɛnfala baa wola a ne wobɛlbwa ɛɛ mɔɔ ne naa, mɛɛ ɡwɛɡroo dɛ́ do kɛ baa bɛlbwa aa doa.”

¹² Anomanta, Delaela kpɔ ŋwɛnfala ba vɔrɔwo, dɛ baala bane sɔh dea. O yerɔ takpeɡ ne ŋɔ, “Samsen, Filisti tena dɛ ba he nɛ!” O berɔ chaa ŋwɛɛra la kɛŋɔ jise ken.

¹³ Delaela berɔ ŋɔ o be ja ŋɔ, “He kpɔ mɛ ɛ ɡɛne dɛ ba le saŋ nɔ dɛ ta na dɛɛ neɡ mɛ. Name te, den chaɡ mɛ ɡɛ baa vɔrɔwe.” Anee o chaŋo ŋɔ, “Dɛ he kpɔ n nyumpona baa pɛra anuanɛ dɛ do kokorowa kon ta dɛ sɔh pɛ, dɛ kpɔ dajeɡa la hama aa, mɛɛ ɡwɛɡroo dɛ́ do kɛ baa bɛlbwa aa doa.” Anomanta, waa baa chɔ dom la, Delaela ɛ ɡɛ. O lawɛ o nyumpona baa pɛra anuanɛ la dɛ sɔah ja jisere la ta, dɛ kpɔ dajeɡa la hama kiŋkiŋ ken.

¹⁴ O yerɔ takpeɡ ne ja ŋɔ, “Samsen, Filisti tena la dɛ ba he nɛ!” O ir dom ta dɛ tɛr dajeɡa la ne kokorowa kon ne jisere la bwa le.

¹⁵ Anee o ŋɔ Samsen be ŋɔ, “Ɛrɛɛ he ŋɔ he dɛ nyin mɛ, dɛ haa he tea bini waa n be bol nɔɔ? Tooro tenaa he ta na dɛɛ ɛɛ mɛ ɡɛne, haa wola men he bokpeɡa haa dɔa kohona nɔ mun baɡlɛ la.”

¹⁶ Tɔpere bɛlbwaa haah la teŋɛ dɛɛ bɔɔro, a ba le o mee.

¹⁷ Anomanta, Samsen bol o tea bini waa bwa chaɡlo ŋɔ, “Ba ta fon kpɔe fonɛ n nyu bwa. Nasiri tee men. Korowii lee mɛ cheɡ tɛ o te, dɛ le n lola saŋ bwa. Ba fonɛ n nyu aa, n bokpeɡa maa dɔa nɔ bwa dɛ ba tona n ɡwɛɡre kɛ baa bɛlbwa ken.”

¹⁸ Delaela nao kɛŋɔ o bol o kasinteŋ bwa baɡlo, anomanta, o tomɛ nɛra ba ka ŋɔ Filisti tena nomonome la be ŋɔ, “Name te hé den ba kerabeŋkpoŋ. O baɡ mɛ o kasinteŋ bwa.” A ɡelɔ anɔ te, ba kpoŋe suuɡapoŋa la dɛ la.

¹⁹ Haah la ɡbɛɡbɛ Samsen o chɔ dom dawɛ o nakpale ta. Asɛ o yerɛ baa bɛl o ba fonɛ o nyumpona baa pɛra anuanɛ la. Belaa o pa mun ɡwɛɡre, o bokpeɡa la bwa tonɛ.

²⁰ Delaela yerɔ ŋɔ, “Samsen, Filisti tena la pui!” O ir dom ta dɛ lii kɛŋɔ, “Mɛɛ le busee ɡɛ n fa aa dɛ ɛ la, dɛ́ kpɔ n bokpeɡa lɛ n te.” Dɛ o ta jemɛ kɛ Korowii laa nɔn kpɔ o nɛ.

²¹ Filisti tena la lawɔ, dɛ foromi o sibie dɛ kaa o ne Gasa. Ba doo ayaawa jɔɡrɔre dɛ doo dea, dɛ ɡel wɛɛ namɛ kwa.

²² Baa fonɛ o nyu la habɔɔ, o nyumpona berɔ pa mun dɛɛ moɡɛ ja.

Samsen seo

²³ A balɔ kɛŋɔ Filisti tena nomonome chemo dɛ kpoo kwaa ɛ sarahajen tɛ ba voɡ baa dɛ yerɔ Daɡɔn dɛɛ lɛ ba sie. Ba ŋɔ, “Ya voɡ kpɔ Samsen waa ɛ ya dɔm la do ya nɔn ta.”

²⁴ Nɛra la aa na Samsen la, ba duu ba voɡ la ŋɔ, “Ya voɡ kpɔ ya dɔm do ya nɔn ta. Naate waa chɔɡ ya harɛ, dɛ kpoo nɛra kohona la lɔ ya nɔn ta.”

²⁵ Ba sie lɛo kohona, ba moo ŋɔ, “Hé ba Samsen ne ó ba lɛ ya sie.” Anomanta, ba kaa lawɔ le dea baa doo la bini, ó ba ɛ ɡɛ baa dɛ nyin bwa tɛɛ ba. Ba kpɔɔ ka che pilare ane baah ta,

²⁶ asɛ Samsen ŋɔ bonɔɔ waa lawɛ o nɔn la be ŋɔ, “Kaa n ne pilare aa lawɛ voɡ dea nɔ kpoŋe nɔ jwɛh ásɛ n ka yala.”

²⁷ Dɛ baala ne haahna bwaa su dea la bini, asɛ Filisti nomonome bwa ɡe do bela. Asɛ nɛra dɛ ɛ kaɡboŋa batoro, haahna ne baala, do dea la saldoa dɛɛ nyiŋi we-ɛɛla Samsen aa dɛ ɛ la.

²⁸ Belaa Samsen soŋe Korowii ŋɔ, “Nemenɛ Korowii, n dɛ soŋe, dɛɛ lii n wa. N Naa Korowii, n poori, ɡel n bokpeɡa berɛ ba kerabeŋkpoŋ ja, ásɛ n ɛ we-ɛɛle beŋkpoŋ dɛ́ kpɔ tɔ n wel Filisti tena baa foromi n sibie nɔ nɛ.”

²⁹ Anomanta, o suuhno bɛne baah ta pilare anɛ aa lawɛ dea la kpoŋe la. O kpɔ nɔndiɡ lawɛ bɛl asɛ dɛ kpɔ nɔŋɡal lawɛ nɛɛte, dɛ kpɔ o bokpeɡa bwa ta a ta

³⁰ dɛ ŋɔ, “N Naa Korowii, ɡel n ne Filisti tena nɔ pɛ serewe!” Asɛ o taɡɛ pilare la o bokpeɡa bwa ne, asɛ dea la chole pi Filisti nomonome ne nɛra baa lɔ o bini bwa nɛ. Gɛɛ a do nɛra o ne baa pɛa dɛ sewɛ la ɡwaa banɔ la ɡɛ saŋ o siwi aa lole o kpoo ba la.

³¹ Asɛ o dɔɔranar ne nimanar ne o mɛɛ nɛra bwa la ka kpɔ o lale, dɛ ba o ne dɛ ba pili bɔɔ baa huɡe o mɛɛ Manoa o bini la ta dɛ huɡo. Lalbɔɔ la lɔ bwɛɛre Sora ne Ɛstaol baah ta. Samsen tɔ Israel tena sie bene fifraanɛ.