Sitɔɔla 15 - mzwDBL

Samsen tɔ o wel Filisti tena nɛ

¹ A habɔɔ la, dɛ mea koma saŋ telo, asɛ Samsen lawɛ bombie ŋɔ ó kpɔ ka tɛ o haah. Waa laŋa la o ŋɔ, “Mɛɛ jo n haah be deaa.” Kɛ o haah mɛɛ ta on ŋwɛnɛ tɛɛ o jo.

² Haah la mɛɛ ŋɔ, “N ken ŋɔ he vɛoh, haa on nyin kpa. N kpɔɔ tɛ he daamanar baa ba he hanfalkondikwa mun la bɛl. O dɔ nime bɛl o do wer ɡwaalo kwara, amɔ kpɔɔ chiɡ o naa ta.”

³ Anee Samsen ŋɔ ba be ŋɔ, “Taraken te n dɔ ŋwɛnɛ ń so Filisti tena nɛ, mɛɛ ɛɛ ba tomaa kɛrɛdɛ.”

⁴ Samsen kaa lawɛ kalampoŋare lafraatoro dɛ vɔrɔwe a dini pɛ anɛnɛ, dɛ vɔwɛ kapɛle su a dini la ta.

⁵ O choŋi nii do kapɛle la ta dɛ ɡel kalampoŋare la ta Filisti tena mea a taa cheɡɛ kooni ta, dɛ fuh mea ne daa kooni la bwa.

⁶ Filisti tena la bɔɔrɔ ŋɔ, “Amɔ umee ɛ ken ɔ?” Asɛ ba bol ba be ŋɔ, “Samsen o helabaa aa ɛ Temna te laanee. O hela lɛ o haah la tɛ o dam bɛl.” Anomanta, Filisti tena la kaa fuh tolo la ne o mɛɛ bwa.

⁷ Anee Samsen ŋɔ ba be ŋɔ, “Waa haa ɛa nɔ nomanta, maa ɡela ba, ka tel kɛŋɔ maa tɔ n wel he nɛ.”

⁸ O kaa yoo ba sibeɡra ne dɛ kpoo ba ɡalɡa, dɛ ka so bwe Etam bɔɔ bini.

⁹ Filisti laa tena kaa baŋre ba tɛnte deene Juda dea harɛ ta, dɛ ka yo bwɛɛ bɛl waa bɛne ba baa yerɔ Lehi.

¹⁰ Asɛ Juda harɛ ta baala bɔɔ ba ŋɔ, “Bɔkwa waa hɛɛ ba ba yo yaa nɔɔ?” Anee ba ŋɔ, “Samsenee yaa ba bá lawɛ, dɛ́ ka ɛo ɡɛ waa ɛ yaa la bɔ kem.”

¹¹ Ate, Juda harɛ baala kaɡboŋa batoro la Samsen be Etam bwebɔɔ la bɔr dɛ ka ŋɔ o be ŋɔ, “Haa jemɛ kɛŋɔ Filisti tenaa dɛɛ di kpeɡri ya nɛɛ kɛɛ? Ɛrɛɛ he ɛ yaa ken nɔɔ?” Anee o chaŋ ba ŋɔ, “Gɛ baa ɛɛ mɛ la, ɡɛ ɡboo n ɡe ka ɛɛ ba.”

¹² Ba ɡe ŋɔ o be ŋɔ, “Ya balɔ dɛ́ ba vɔrɔwe, dɛ́ kpɔe ka do Filisti tena nɔn ta.” Ate, Samsen ɡe ŋɔ, “Hé ŋwɛɛ baɡ mɛ kɛŋɔ he ɡbaɡba aa men kpo.”

¹³ Ba sɛoh ŋɔ, “Yaa hen kpo. Vɔrɔwaa yaa ba he vɔrɔwa dɛ́ kpɔe ka do ba nɔn ta.” Anomanta, ba vɔrɔwo ŋwɛnfala anɛ ne dɛ le o ne bwebɔɔ la ta kaa.

¹⁴ Waa dɛ bɛne Lehi la, Filisti tena la ɛɛ moo dɛ kpɔ sie pa o be dɛɛ ba. Buɡ la ta, Korowii Doma ba so o nɛ dɛ tɛo kpeɡri kohona. Asɛ ŋwɛɛra baa kpɔa vɔrɔwo la ɛ kɛŋɔ kwaa baa fuah ken dɛ le o nɔɔra ta.

¹⁵ O na keeɡo kaŋe hoɡfale harɛ, asɛ o laa kee dɛ kpɔ kpoo baala kaɡboŋ.

¹⁶ Anomanta, Samsen ŋɔ, “Keeɡo kaŋe hoɡ nee n kpoo baala kaɡboŋ, n kpoo ba ba daŋɛ chɔ.”

¹⁷ Waa bol ɡɛ waa nɔ tonɛ la, o kpɔ keeɡo kaŋe hoɡ la viɡri, asɛ ba pa bela sɔn Ramat Lehi.

¹⁸ Dɛ nyɔɡre dɛ kpoo kohona, anomanta, o wio no Korowii ŋɔ, “N Naa Korowii, henee tɛ men maa ɛ he bonɔɔ kpeɡri n won ɛ wejena nɔ dɔŋ dɛ pɔ n dɔma nɛ, asɛ nyɔɡre ɛɛ kpo mɛ. Ń sewɛ voɡtoroma nɔ nɔn ta naa?”

¹⁹ Asɛ Korowii ɡel bɔɔ bɛl pili Lehi, asɛ nee le o bini. Samsen aa nyɔa la, o bwara berɔ ir o dɔ bokpeɡfala ja. Anomanta, ba pa bela nee aa bula le la sɔn Ɛn Hakore. O ta chɔ Lehi ba le fini.

²⁰ Samsen tɔ Israel tena sie bene fifraanɛ ɡɛ saŋ Filisti tena aa dɛ di kpeɡri ba nɛɛ la.