Sitɔɔla 14 - mzwDBL

Samsen haah moe wa

¹ Awola bɛl, Samsen iro dɛ la Temna, dɛ ka na Filisti tolo bɛl.

² Waa bera ba dem la, o ŋɔ o nya ne o mɛɛ be ŋɔ, “Maa la Temna la, n na Filisti tolo bɛl n sie lɛ o nɛ. N dɛ nyin kɛ hé ka moo tɛ mɛ.”

³ Anee ba chaŋo ŋɔ, “Haahna toole ya dea kɛɛ ya Israel tena bini hɛɛ la ka mo haah Filisti tena voɡtoroma nɔ bini naa?” Asɛ o ŋɔ o mɛɛ be ŋɔ, “Onee n bambile lawɛ, nyinu tɛ mɛ.”

⁴ O mɛɛ ne o nya ta wone jemɛ kɛ Korowii bee a le wɛɛ nyin ŋwɛnɛ waa kpɔ o ta Samsen won ka yo Filisti tena. Gɛ saŋ dɛ banee dɛɛ nyiŋi Israel tena nɛ.

⁵ Samsen ne o nya ne o mɛɛ bwa pɛo la Temna. Baa dɛ tel bwɛɛ la daa kooni ta la, buɡ la ta, nyujente bie den le dɛ kɔɡre dɛɛ ba o be.

⁶ Korowii Doma den ba so Samsen nɛɛ kerabeŋkpoŋ dɛ tɛo kpeɡri, asɛ o lawɛ nyujente la dɛ kpɔ nɔn toɡru kɛŋɔ bombie ken. O ta o nya ne o mɛɛ be ɡɛ waa ɛa la bolɛ.

⁷ Samsen aa la Temna la, o kaa bol waa haah la be, o pɛla lawɔ.

⁸ Aa dɛ la sie la, o berɔ la ŋɔ ó ka nyin haah la, dɛ ka bɛɡɛ jo bela waa kpo nyujente la, dɛ na kɛ toohna aa do noo nyujente la lale ta.

⁹ O kwɛɛ tohnoo la do o nɔɔra ta dɛ di dɛɛ kaa. Waa la o nya ne o mɛɛ be la, o tɛɛ ba ane ba di, kɛ o ta ba be bolɛ ŋɔ nyujente lale la taa o le a ne.

¹⁰ O mɛɛ laŋɔ ka na haah la. Samsen ɡelɔ ba ɛ kondikonjena ɡɛ hanfale jaa bɛlbwa aa dɛ ɛ la.

¹¹ Baa na Samsen la, ba tɛo bonɔɔna fifraatoro ba so o jwɛh.

¹² O ŋɔ ba be ŋɔ, “Hé ɡel n bɔɔ heyaa wobobeele bɛl. Dɛ he wono baɡ mɛ o mun tɔpera anuanɛ yaa dɛ ba dii hanfalkondikwaa nɔ mun aa, mɛɛ tɛ heya yapondɛɛɡa fifraatoro ne yabele fifraatoroo.

¹³ Dɛ he baɡ mɛ kahonɛ ɡe aa, mɛɛ lɛ heya yapondɛɛɡa fifraatoro ne yabele fifraatoroo.” Anee ba ŋɔ, “Bol waa la ya no.”

¹⁴ Anee o ŋɔ, “Didii bee kondikwaa le, bokpeɡa te bee kontora do.” Tɔpera atoro bwa dɛ ba ta wone baɡle ɡɛ waa la mun.

¹⁵ Tɔpenaarɛ wee la, ba ŋɔ Samsen haah la be ŋɔ, “Yeraa he yerɛ yaa dɛ́ ba ŋwɛ yaa kɛɛ? Ta he jaa baradeɛ ó baɡle yaa waa nɔ mun. Gɛ la aa, yaa fuh he ne he mɛɛ dem tena bwaa.”

¹⁶ Samsen haah la kpɔ wii la o be ka ŋɔ, “He hah mɛ, haa men nyin. He tɛ n nɛra wobobeele kɛ he ta men a mun baɡlɛ.” Anee o ŋɔ, “N ta n nya ne n mɛɛ ɡba baɡlɛ. Ɛrɛ waa mɛɛ baɡle he te nɔ?”

¹⁷ O wio tɔpera anuanɛ baa kpɔa dɛɛ ɛ hanfalwaa la bwa. Waa teŋa dɛɛ pɛɛro la, o sɛh dɛ baɡlo a mun tɔpenuanɛ wee la ta. Asɛ o ɡe ka bol o nɛra la be.

¹⁸ Wee aa dɛ ba joe la, nɛra la baɡle Samsen waa la mun ŋɔ, “Tohnoo som ɡwaa komɛlbwa. Nyujente bwara kpeɡri ɡwaa komɛlbwa.” Anee Samsen chaŋe ŋɔ, “N haah laa baɡle heya aa, he fe aa won jemɛ waa nɔ mun.”

¹⁹ Korowii Doma baa so Samsen nɛɛ dɛ tɛo kpeɡri. O la Filisti tena bwɛɛ Askɛlɔn, dɛ ka kpoo baala fifraatoro, dɛ pa ba laala ba tɛ nɛra baa baɡlo wobobeele la mun la. O baah diu kɛrɛdɛ, o chiɡ ŋwɛnɛ ta kaa o bwɛ o mɛɛ be.

²⁰ Haah la mɛɛ berɔ kpɔ Samsen haah la tɛ o dam tɛnte waa soɡe o jwɛh hanfalkondikwaa la mun la.