Sitɔɔla 12 - mzwDBL

Jɛfta ne Efrem dea tena wa

¹ Efrem dea tena yerɛ ba laa tena cheme dɛ ɡale Jɔɔdan Moo kaa bwɛjen Safɔn ka ŋɔ Jɛfta be ŋɔ, “Ɛrɛɛ he ka yo Amɔn tena haa wola yaa yerɛ ja he nɛɔ? Yaa fuh he dem nɔɔ ta he nɛ.”

² Anee o chaŋe ŋɔ, “N ne n nɛra fa aa lɔ wekpeɡa ta, dɛ yo Amɔn tena la, n yerɛ heya, he vɛh bala dɛ́ ba lɛ yaa le ba nɔn ta.

³ Maa naa kɛ haa men cha la waa n kpɔ n nyu charɛ seo dɛ ɡale ka yo Amɔn tena, asɛ Korowii ɡel n pɔ ba nɛ. Aah ɛrɛ waa he ba taraken dɛ́ ba yoo mɛ nɔɔ?”

⁴ Jɛfta yerɛ Gelead harɛ ta laa tena cheme dɛ ka yo Efrem dea tena dɛ pɔ ba nɛ, dɛkalkɛŋɔ Efrem tena bolɔ ŋɔ Gelead tena pere ba te le Efrem ne Manasɛ deene tena nɛ.

⁵ Gelead tena kaa teŋe leebɔɔne baa cheɡɛ a ta dɛ ɡale Jɔɔdan Moo dɛɛ kaa Efrem harɛ ta la. Dɛ nomɛlbwa chwao le laa la ta dɛ ba tel bela aa, ɡɛɛ ba bɔɔro ŋɔ, “Efrem dea tee hen aa?” Dɛ o ŋɔ, “Ɔɔhɔh” naa,

⁶ ɡɛɛ ba yon ŋɔ ó si “Shibolet”. Dɛ o ta jemɛ siu kɛrɛdɛ dɛ ŋɔ “Sibolet” aa, ɡɛɛ ba lawɔ dɛ kpoo Jɔɔdan Moo nyoa bela. Efrem dea tena kaɡboŋa fifraanaarɛ dɛ banɛɛ ba kpoo bela ɡɛ saŋ.

⁷ Jɛfta tɔ Israel tena sie bene anumɛl mɔɔ dɛ sewɛ, asɛ ba huɡo Gelead harɛ bwɛɛre la bɛl ta.

Ibsan ne Ɛlɔn dɛ Abdɔn wa

⁸ Jɛfta habɔɔ, Bɛtlɛham te Ibsan baa ɛ Israel tena sitɔɔ.

⁹ Dɛ o dɔ bibaala fifraatoro dɛ bihaahna ɡe fifraatoro. O kpɔ o bihaahna la tɛ baala baa wola o dea ta leɛ ba mo. Asɛ dɛ ka mo toli fifraatoro baa wola o dea ta leɛ tɛ o bibaala la. Ibsan tɔ Israel tena sie bene anuanɛ.

¹⁰ O baa sewɛ asɛ ba huɡo Bɛtlɛham.

¹¹ O ɡe seo habɔɔ la, Ɛlɔn waa le Sebulon deaa baa so o buɡ ta dɛ ɛ Israel tena sitɔɔ. O ɡe tɔ Israel tena sie bene fi.

¹² Waa baa sewa la, ba huɡo Aejalɔn Sebulon dea harɛ ta.

¹³ O habɔɔ, Abdɔn baa so o buɡ ta, dɛ tɔ Israel tena sie. O mɛɛ sɔne Helɛl dɛ le bwɛɛ Peratɔn.

¹⁴ O dɔ bibaala fifraanaarɛ dɛ naanar fifraatoro, baa so keeɡore fifraanuanɛ ta. Bene anuatoroo o ɛ Israel tena sitɔɔ.

¹⁵ Helɛl bibaa Abdɔn baa sewɛ ba huɡo Peratɔn, Efrem dea deŋɡarere harɛ Amalɛk tena fa aa soɡe bela la ta.