Sitɔɔla 11 - mzwDBL

Jɛfta wa

¹ Dɛ Gelead te bɛl fa lole baa yerɔ Jɛfta, o ɛ banyoo. O mɛɛ sɔne Gelead, asɛ o nya ɛ hanjwamane.

² Gelead haah ɡbaɡba ɡe lolɛ bibaala tɛo, asɛ baa kpeɡa la ba doŋi Jɛfta. Ba ŋɔ o be ŋɔ, “Haa kapɛrɛ komɛlbwa dɔe ba dɛ́ le ya dem bonɔ. He nya korɔ.”

³ Anomanta, o chwao le ba bini dɛ ka so Tob harɛ ta. Belaa nɛra bane baa wola waane dɔe dɛɛ ɛ la, ba ja o nɛɛ dɛɛ teŋɛ o nɛ.

⁴ Aa baa tel saŋ bɛl la, Amɔn tena baa yo Israel tena laa,

⁵ asɛ Gelead harɛ nomonome tomɛ nɛn Jɛfta be Tob harɛ ta,

⁶ o ka ŋɔ o be ŋɔ, “Ba ɛ ya laa sitɔɔ, ásɛ ya won ka yo Amɔn tena nɔ.”

⁷ Belaa Jɛfta chaŋe ŋɔ, “He hah mɛ, dɛ doŋ mɛ le n mɛɛ dem. Ɛrɛɛ waa aa pu heyaa name te la, he berɛ ba n be nɔɔ?”

⁸ Gelead nomonome la ŋɔ o be ŋɔ, “Kpelaa he ŋɔ. Kɛ name te ya dɛ ba he be. Ba ja ya nɛɛ yá won ka yo Amɔn tena, ásɛ he ɛ ya Gelead tena bwa sitɔɔ.”

⁹ Anee Jɛfta ŋɔ ba be ŋɔ, “A balɔ kɛŋɔ n ne he laŋɔ dɛ ka yoo ba, asɛ Korowii sɛh n pɔ ba nɛ aa, hɛɛ ɡeloo ń ɛ he sitɔɔ kpela aa?”

¹⁰ Gelead nomonome la ŋɔ, “Korowiirii ya danseɛ. Yaa ɛ ɡɛ tenten haa bola nɔɔ.”

¹¹ Anomanta, Jɛfta pu nomonome la kaa, asɛ ba ɛo ba sitɔɔ ne ba laa nomoa. O ɡe ŋwɛɛ a ɡɛ waa la tenten Korowii sie Mispa.

¹² Jɛfta tomɛ toroma ba la Amɔn kooro be dɛ ka bɔɔro ŋɔ, “Bɔkwa waa ya ne he dɔ asɛ hɛɛ ba ba yo yaa ɔ?”

¹³ Amɔn kooro chaŋe Jɛfta toroma la ŋɔ, “Israel tena aa le Ijipt harɛ ba la, ba lɛ n harɛ le Aanɔn Moo ta ka tel Jabɔk Moo ta, dɛ kpoŋe ka tel Jɔɔdan Moo ta bwa. Taraken nɔ, berɛ kpɔ tɛ mɛ jeih ken.”

¹⁴ Ate, Jɛfta ɡe berɛ tomɛ toroma Amɔn kooro be ŋɔ,

¹⁵ “Israel tena ta Moab kɛɛ Amɔn harɛre lɛɛ.

¹⁶ Kɛ baa le Ijipt harɛ ta la, ba valɔ kpɔ pua hɛŋle ɡbo harɛ ta, dɛ ka le Mposwɛm ta, dɛ ka so Kades.

¹⁷ Israel tena tomɛ nɛra Edom kooro be ŋɔ ó tɛɛ ba ŋwɛnɛ ba kpɔ o harɛ ta, kɛ Edom kooro vɛoh. Ba tomɛ nɛra Moab kooro ɡe be, asɛ o ɡe vɛh. Anomanta, ba soɡe Kades bela.

¹⁸ Ba berɔ valɛ kpɔ pua hɛŋle ɡbo harɛ ta dɛ fɛre Edom ne Moab harɛre la, dɛ kpɔ ka le Moab wee leebɔr pera dɛ ka so Aanɔn Moo baŋ bɛl. Ba ta Moab harɛ la ta joɛ, dɛkalkɛ Aanɔn Moo ɛ ba jwɛh.

¹⁹ Israel tena tomɛ nɛra Amɔre kooro baa dɛ yerɔ Sihon o so bwɛjen Hɛsbɔn be ŋɔ, ‘Tɛ yaa ŋwɛnɛ yá kpɔ he harɛ ta dɛ́ ba kaa ya ɡbaɡba harɛ ta.’

²⁰ Kɛ ane a bwa, Kooro Sihon ta Israel tena la yaradae kɛ bá kpɔ o harɛ la ta. O cheme o laa tena bwa ba baŋre ba tɛnte deene dɛ so Jahas, asɛ o ne Israel tena yo.

²¹ Korowii Israel tena aa dɛ tomɔ la kpɔ Kooro Sihon ne o nɛra bwa do Israel tena nɔn ta, dɛ ɡel ba pɔ ba nɛ, dɛ kpɔ ba harɛre la bwa.

²² Ba lɛ harɛ la bwa dɛ kpoŋe ka le Aanɔn Moo dɛ kaa Jabɔk Moo ta, dɛ berɛ lɛ le pua hɛŋle ɡbo harɛ la ta, dɛ kaa Jɔɔdan Moo ta.

²³ Korowii Israel tena aa dɛ tomɔ la aa doŋi Amɔre tena le ba harɛ ta dɛ kpɔ tɛ Israel tena la, ŋwɛnɛ besoo he dɔ dɛ lɛo wɔ?

²⁴ Kon he voɡ Kemɔs aa tɛɛ la, he dɛ lɛ. Gɛɛ a do, kon Korowii yaa dɛ tomɔ la aa tɛ yaa la, ya ɡe won lɛ.

²⁵ He ɡwaa Moab Kooro Sepɔ bibaa Balak aa? O ne Israel tena ta waa beɡrɛ á ba ɛ kɛŋɔ baa yoo.

²⁶ Bene lafraatoroo nɔ, Israel tena aa lɛ Hɛsbɔn ne Arowa ne bwɛɛre aa bara, dɛ bwɛɛre aa lɔ Aanɔn Moo la nyoa. Ɛrɛɛ haa wola berɛ lɛa saŋ laɔ?

²⁷ N ta hen wechɔɡa ɛɛ, he tenee dɛɛ ɛɛ mɛ wechɔɡa, dɛ vɔrɔwe n yoi vɔrɔwa. N dɛ soŋe kɛŋɔ Korowii waa dɛ pa bole la pa waa aa lɔ Israel tena ne Amɔn tena baah ta nɔ bole fini.”

²⁸ Kɛ ane a bwa, Amɔn kooro ta sie waa Jɛfta aa ɡela ba ba bol la ta doe.

²⁹ Anee Korowii Doma ba so Jɛfta nɛ, asɛ o ne o laa tena tawɛ Gelead ne Manasɛ deene harɛre ta, dɛ ba Mispa waa lɔ Gelead harɛ ta la, dɛ le bela ka yo Amɔn tena.

³⁰ Asɛ o baɡɛ Korowii nyoa ŋɔ, “Dɛ he kpɔ Amɔn tena do n nɔn ta n pɔ ba nɛ aa,

³¹ kon te bɛlbwa waa le n dem, dɛ ba chem mɛ ɡɛ saŋ maa kpɔ silɛɛ le Amɔn tena be dɛ berɛ dɛɛ ba dem la, mɛɛ kpoo dɛ́ fuuh ɛ saraha tɛɛ.”

³² Anomanta, Jɛfta ɡale Moo la dɛ́ ka yoo ba, asɛ Korowii kpɔ ba do o nɔn ta o pɔ ba nɛ.

³³ O chɔɡ bwɛɛre fifraanɛ, kpoŋe le Arowa dɛ kaa Minit pera ka tel Ebel Keramim. Gɛɛ a do Israel tena pɔ Amɔn tena nɛ.

Jɛfta bihaah wa

³⁴ Jɛfta aa bera dɛɛ ba o dem Mispa la, dɛ o bihaahnee lea ba chemo, dɛ yiiɡi kwaa kɛŋɔ loŋa dɛɛ sa. Dɛ o ɡbosoroo ɛ o bie. O ta bie bɛlbwa dɔe kpa.

³⁵ Waa na o bihaah la, o tea bini chɔɡɔ, o laa laala waa doa la kɛɛ dɛ do lɔŋɔ ŋɔ, “Aa, n bie! He ɡelɔ n loo ku! N baɡɛ Korowii nyoa maa wola won berɛ nyoa kpa.”

³⁶ O bie la ŋɔ, “N mɛɛ, he dɔɔ baɡɛ Korowii nyoa. Kpɔ mɛ ɛ ɡɛ haa baɡɔ nyoa la. Korowiirii tɛ kpeɡri he won kpoo he dɔma Amɔn tena tɔ he wel la.

³⁷ Kɛ no n webeŋkpoŋ nɔ tɛ mɛ. Tɛ mɛ korobie anɛ, ásɛ n ne n chamene tena ɡaaɡe deŋɡarere nɔ ta, dɛ́ wi suna dɛkalkɛŋɔ maa yala ba.”

³⁸ O mɛɛ ɡe ŋɔ, “He won kaala.” Asɛ o kaa korobie anɛ. O ne o bala la kaa wi suna, yala waa wola won yalɛ la wa.

³⁹ Korobie anɛ la habɔɔ la, o berɔ ba o mɛɛ be, asɛ o kpɔɔ ɛ ɡɛ waa baɡɛ Korowii nyoa la. O ɛ bitolo waa wola baa jemɛ bwa. Gɛ waa nɔ taa Israel tena dɔ ba nawee waa bɛl le.

⁴⁰ Benanyoa bɛlbwaa toli yon le kaa tɔpera anaarɛ dɛ́ kpɔ dɛɛ lii Gelead te Jɛfta bihaah la wa.