Sitɔɔla 10 - mzwDBL

Tola wa

¹ Abemɛlɛk seo habɔɔ la, baa bɛl le Isaaka dea baa yerɔ Tola, o mɛɛ sɔne Pua, o nabaa ɡe sɔne Dodo. Tolaa baa lɛ Israel tena. O le Samir, waa lɔ Efrem deŋɡarere harɛ ta.

² O tɔ Israel tena sie bene fifraanɛ dɛ atoro mɔɔ dɛ sewɛ, asɛ ba huɡo Samir.

Jɛɛ wa

³ Tola seo habɔɔ la, Jɛɛ waa le Gelead harɛ, baa tɔ Israel tena sie bene fifraanɛ dɛ anɛ.

⁴ Dɛ o dɔ bibaala fifraatoro ba so keeɡore fifraatoro ta dɛɛ nyiŋi bwɛɛre fifraatoro Gelead harɛ ta. Ba dɛ yerɛ bela Havɔt Jɛɛ ba le fini.

⁵ Jɛɛ aa baa sewɛ la, ba kaa huɡo Kamone.

⁶ Israel tena ɛ wechɔɡa dɛ jo Korowii nɛɛ ja. Dɛ voɡa Baalre aa ɛ baala ne voɡhaahna Astɔrɛt, ne voɡa aa lɔ Aram ne Sidon, ne Moab ne Amɔn harɛre, dɛ voɡa Filisti tena aa dɛ tomɛ laanee baa tomɛ. Baa laa sie kpɔ Korowii nɛɛ dɛ vɛh o toma la,

⁷ o baah di ba nɛ. O kpɔ ba do Filisti ne Amɔn tena nɔn ta,

⁸ ba yoo ba a bena la, dɛ den pɔ ba nɛɛ kwaraa. Ba ɛ Israel tena la bwa baa lɔ Jɔɔdan Moo wee leebɔr, dɛ do Gelead harɛ o fa aa ɛ Amɔre tena la harɛ hɔhɔrɔwa bene fi dɛ anuatoro.

⁹ Amɔn tena la ɡale Jɔɔdan Moo dɛ ka yo Juda ne Bɛnjamen dɛ Efrem deene tena, asɛ Israel tena do bonyɛɡa ta kɛrɛdɛ.

¹⁰ Asɛ Israel tena wi no Korowii ŋɔ, “Ya ɛ wechɔɡa kɛ yaa vɛh he toma, dɛ kaa tomɛ voɡ Baal ne o voɡa bwa.”

¹¹ Belaa o chaŋ ba ŋɔ, “Ijipt ne Amɔre ne Amɔn, dɛ Filisti tena

¹² ne Sidon ne Amalɛk, dɛ Mayɔn tena aa ɛ heyaa hɔhɔrɔwa, he wi yer mɛ la, n laa lɛ heyaa le ba nɔn ta naa?

¹³ Kɛ he laa sie kpɔ n nɛɛ dɛ kaa tomɛ voɡa. Anomanta, maa heyaa lɛ kpa.

¹⁴ Waa pu heya aa, hé ka wi no voɡa haa lea cheɡ tɛ he te la, ásɛ a lɛ heya.”

¹⁵ Asɛ Israel tena la ŋɔ Korowii be ŋɔ, “Ya ɛ wechɔɡa. Ɛ yaa ɡɛ bɛlbwa haa naa kɛ a wer he be. Kɛ soŋe, dɛ́ lɛ yaa taraken.”

¹⁶ Anomanta, ba laa ba te kpɔ voɡa aa lɔ bela la ta dɛɛ tomɛ Korowii. Asɛ ba waa domɛ o tea, o sune ba nɛ.

¹⁷ Amɔn laa tena aa kpɔ ba te dɛ ka baŋre ba tɛnte deene Gelead harɛ ta dɛ so la, dɛ Israel laa tena ɡe kaa baŋre ba kwaa Mispa harɛ ta.

¹⁸ Asɛ Gelead nomonome la bol dɔŋa be ŋɔ, “Naate waa tɔ sie yá ka yo Amɔn tena la, onee dɛɛ ba nɛra baa lɔ Gelead harɛ nɔ ta sitɔɔ ɛɛ.”