Sitɔɔla 1 - mzwDBL

Israel tena yo Keenan tena

¹ Josua seo habɔɔ la, Israel tena soŋe Korowii ŋɔ, “Ya deene nɔ, bamewaa dɛ́ tɔ ya sie yá ka yo Keenan tena ba harɛ ta nɔ?”

² Anee Korowii chaŋe ŋɔ, “Juda dea tenaa dɛ́ tɔ sie mɔɔ. Banee mɛɛ ba harɛ la kpeɡri kpɔe do ba nɔn ta.”

³ Belaa Juda dea tena ŋɔ ba lolanar Simeon dea tena be ŋɔ, “Harɛ la bela Korowii aa kpɔa tɛ yaa la, Keenan tena soɡe o ta. Hé ba ja ya nɛɛ yá ka yoo ba.” Anomanta, Simeon dea tena ne Juda dea tena pɛo dɛ la ka yoo ba.

⁴ Korowii cha ba asɛ ba pɔ Keenan ne Pɛrɛs tena nɛ, asɛ dɛ kpoo baala kaɡboŋa fi bwɛjen Bɛsɛk.

⁵ Belaa ba na Bɛsɛk Kooro Adoni Bɛsɛk dɛ yo o ɡe dɛ won do o ne nɛra la sibeɡra.

⁶ Kooro la chwao kaa, asɛ ba tiu dɛ ka lawɔ, dɛ teŋe o nonibala ne o nanibala.

⁷ Belaa kooro la ŋɔ, “N fa teŋni koranar fifraanuanɛ nanibala ne nonibala, ba tɔɔ kondikompuɡrere dɛɛ di n tiɡ ta. Korowiirii ɡela waa maa ɛɛ ba la ɡure n nyu ta la.” Ba kpɔɔ kaa bwɛjen Jerusalam o ka sewɛ.

⁸ Juda dea tena kaa yo Jerusalam tena ɡe, dɛ pɔ ba nɛ. Ba kpoo nɛra baa lɔ o ta dɛ fuuh.

⁹ Baa le bela la, ba kaa yo Keenan tena baa soɡe deŋɡarere harɛ ne bwejena lɔɡre, dɛ Nɛɡɛv waa ɛ pua hɛŋle ɡbo harɛ dɛ chɔ weekaŋle harɛbɔr.

¹⁰ Ba berɔ ka pu Keenan tena baa soɡe bwɛjen Hɛbrɔn la yo, dɛ pɔ Sɛsae ne Ahiman dɛ Talmai deene tena nɛ.

Otniel yo bwɛjen Debir tena dɛ pɔ ba nɛ

¹¹ Baa le bela la, ba berɔ la ka pu bwɛjen Debir tena ɡe yo.

¹² Asɛ Kaleb ŋɔ, “Nomɛlbwa waa won yo Kiriat Sɛfa dɛ́ pɔ ba nɛɛ la, mɛɛ lawɛ n bihaah Aksaa tɛo ó mo.”

¹³ Kaleb nime Kenas bibaa baa dɛ yerɔ Otniel laanee wona ka yo bwɛɛ la dɛ pɔ ba nɛ. Anomanta, Kaleb lawɛ o bihaah la tɛo o mo.

¹⁴ Baa ɛ ba hanfalwaa tonɛ la, o jaa Otniel ŋɔ, “Ka soŋe he mɛɛ ó tɛɛ harɛ.” Asɛ o kpɔ o keeɡo dɛ kaa. Waa laŋa la o mɛɛ bɔɔro kon waa dɛ nyin.

¹⁵ Anee o chaŋe ŋɔ, “Nyiŋi n nɛ. He tɛ mɛ harɛ pua hɛŋle ɡbo harɛ Nɛɡɛv. Tɛ mɛ bela nee aa bula dɛɛ le ɡe.” Asɛ o ka tɛo harɛ nee aa bula dɛɛ le o ta. Bɛl do nyunduabɔr, bɛl do harɛbɔr pera.

¹⁶ Mosis helabaa naanar Ken tena le Jeriko, dɛ ba ja Juda dea tena nɛɛ ba ka so pua hɛŋle ɡbo harɛ nɛra bini waa lɔ Nɛɡɛv, dɛ bɛne bwɛɛ Arad.

¹⁷ Belaa Juda dea tena ne ba lolanar Simeon dea tena pɛ ka yo Keenan tena baa soɡe Sɛfat, dɛ pɔ ba nɛ. Ba chɔɡ bwɛɛ la kwaraa, dɛ pa o sɔn Hɔrma.

¹⁸ Juda baala la pɔ Gasa ne Askɛlɔn dɛ Ekron bwɛjena la bwa nɛ ne harɛre aa bara bwa.

¹⁹ Korowii cha Juda dea tena ba pɔ deŋɡarere harɛ tena nɛ, kɛ ba ta wone doŋi bwɛɛre aa chɔ harɛ deŋɡarere aa wola toole a ta la te nɛ, dɛkalkɛŋɔ ba dɔ bune kwaa aa do kɛŋɔ torɔɡo ba vɔwɛ dɛɛ pɛl jaɡre la ane.

²⁰ Ba kpɔ bwɛjen Hɛbrɔn tɛ Kaleb, ɡɛ Mosis aa bola la, asɛ o doŋi Anak tena deene atoro nɛra baa lɔ bela la.

²¹ Bɛnjamen dea tena ɡe ta wone doŋi Jebus tena baa soɡe bwɛjen Jerusalam, anomanta, ba bwa pɛo so le ɡɛ saŋ bwa ba le fini.

²² Josef bibaala Efrem ne Manasɛ dea tena kaa yo bwɛjen Bɛtel, asɛ Korowii che ba habɔɔ.

²³ Ba tomɛ nɛra ŋɔ bá ka sɔh nyiŋi Bɛtel,

²⁴ asɛ nɛra la na baa bɛl kɛ waa le bwɛjen la ta dɛɛ ba. Asɛ ba ŋɔ o be ŋɔ, “Chaɡle yaa ɡɛ yaa ɛ dɛ́ won jo bwɛjen nɔ bini, ásɛ ya bɛ hen wobɛlbwa ɛ.”

²⁵ Anomanta, o baɡ ba, ba jo o bini dɛ ka kpoo bela tena bwa, dɛ ɡel baa la ne o dem nɛra ɡbo.

²⁶ Baa la la Hiti harɛ ta dɛ ka vɔrɔwe bwɛ, dɛ pa o sɔn Lus. Ba ta dɛ yerɔ ɡɛ ba le fini.

²⁷ Manasɛ dea tena ta nɛra baa soɡe bwɛɛ Bɛt San ne Taanak ne Dɔr ne Ibleam ne Meɡido dɛ bwɛɛre aa bara cheme la doŋe, dɛkalkɛ dɛ ba sie beɡrɔ kɛŋɔ ba so bela.

²⁸ Israel tena aa baa dɔ kpeɡri la, ba ɡelɔ Keenan tena la ɛɛ ɛ tomkpeɡa, kɛ ba ta ban doŋe le kwaraa.

²⁹ Gɛɛ Efrem tena aa wola Keenan tena doŋe le Gɛsa, asɛ ba ne ba pɛ so bela.

³⁰ Sebulon dea tena ta Keenan tena baa soɡe bwɛjena Ketrɔn ne Nahalal doŋe. Ba ne ba pɛo so, kɛ tomkpeɡaa ba ɡel baa ɛ.

³¹ Gɛɛ Aasa dea tena ɡe aa wola nɛra baa lɔ Ako ne Sidon ne Alab ne Aksib ne Hɛlba ne Afɛk kɛɛ Rehob la doŋe.

³² A ɡɛ nomanta, Aasa dea tena la ne Keenan tena pɛo so harɛ la ta.

³³ Gɛɛ Naftale dea tena ta Keenan tena baa soɡe bwɛjena Bɛt Sɛmɛs ne Bɛt Anat la doŋe, kɛ tomkpeɡaa ba ɡel baa ɛ. Ba ɡe soɡe Keenan tena la baah ta.

³⁴ Amɔre tena chaɡle ba kpeɡri, ba ta ɡelɛ Dan dea tena so bela waa wera, dɛ ɡel ba ka so deŋɡarere dor harɛ waa chɔa kaa ta. Ba ta ɡelɛ ba tu ba so harɛ aa chɔa kaa deŋɡarere aa wola toole a ta la ta.

³⁵ Amɔre tena la sie beɡrɔ ba ta so Heres Bwejen ne Aejalɔn dɛ Saalabim ta. Kɛ Josef dea tena baa dɔ kpeɡri, dɛ ɡel baa ɛ tomkpeɡa.

³⁶ Amɔre tena jwɛh chɔ ŋwɛnɛ waa chɔ Akrabim Bwejena baah ta dɛ ka ɡarɛ Sela.