Hosia 5 - mzwDBL

Korowii bol Israel tena chɔɡa wa

¹ Korowii ŋɔ, “Sɔfore, hé no! Israel tena, hé cheɡ deŋne! Koobii ɡe, hé no! N dɛ ba he waa bola dɛ́ pa bole. He do kɛŋɔ baa harɛ bel Mispa, dɛ do kɛŋɔ asau baa taa bɔle Tabɔ Bwejen ta.

² Deŋnekpeɡ ne nɛŋkpoa tena kohona, mɛɛ tɛr he bwa deŋnee.

³ Israel, n jemɛ he waa bwa a chɔ n sie. He nɛra waa ta kasinteŋ dɔe, baa men Korowii tomɛ kpa.

⁴ Ba we-ɛɛla ɡelɔ baa won berɛ ba men Korowii baa dɛ tom mɛ be. Jwaman we-ɛɛla ɡboo su ba liire ta. Baa men Korowii jemɛ.

⁵ Israel tena mbarafo ɛ danseɛ kɛ ba di bolchɔɡe. Ba wechɔɡa ɡelɔ ba lɔ naa dɛ chole, Juda tena ɡe ja ba nɛɛ lɔ naa dɛ chole.

⁶ Ba kpɔ ba peera ne nae ɛ saraha dɛɛ nyin men Korowii bɔr aa, baa men na. N laa n te kpɔ ba nɛ.

⁷ Ba waa ta kasinteŋ dɔe tɛ mɛ, ba le n habɔɔ, sɛmbii ɡboo baa loɡle. Ba Korobifala Tɔpejena dii, ɛɛ chɔɡ ba ne ba kooni bwaa.

⁸ Hé hoh laa bɛla Gebea, dɛ́ hooh Rama ɡe. Hé do laa lɔŋɔ Bɛt Avɛn. Bɛnjamen dea tena, hé ir dɛ́ tɔ sie.

⁹ Israel harɛ ɛɛ chɔ pɛɛ, awola maa ba tɛr o nɛra deŋne la. Israel deene bwa bee mɛɛ bol waa aa ɛ kasinteŋ aa dɛ ba bala.

¹⁰ Juda sitɔɔla do kɛŋɔ ŋwɛɛra baa dɛ huɡri harɛre jwɛh bwea. N baah ɛɛ di ba nɛɛ kohonaa, kɛŋɔ nee aa sua dɛɛ chɔɡ kwaa la ken.

¹¹ Ba dɛ fiiɡi Israel tena, ba pa ba bolchɔɡe dɛ tiɡ ba do harɛ, hwɛɡa baa dɛ hwɛɡɛ voɡsale ta la wa.

¹² Mɛɛ chɔɡ Israel tenaa kɛ koŋɡaahla aa dɛ chɔɡ kwaa la, dɛ́ ɛ Juda tena ɡe kɛŋɔ kon waa pɔah.

¹³ Israel tena na ba weela, asɛ Juda tena ɡe na ba ŋwɛra, asɛ Israel la Asiiria koojen be ŋɔ ó ba cha ba. Kɛ o ta wone chah ba weela, o ta wone chah ba ŋwɛra ɡe.

¹⁴ Mɛɛ ɛo kɛŋɔ nyujente ken Israel harɛ ne Juda tena bini. Mɛɛ toɡri ba olaa, dɛ́ che ba kaa nomɛlbwa aa wola won lɛɛ ba.

¹⁵ Ásɛ n berɛ kaa n buɡ ta bela maa lole ka tel kɛŋɔ baa sɛh ba chɔɡre. Baa dɛɛ nyin n sie dɛ na, ásɛ a noo ba aa, bá ɡaaɡe n bɔr sibeɡra ne.”