Hosia 3 - mzwDBL

Hosia ne o haah berɛ pɛɛ wa

¹ Korowii ŋɔ men Hosia be ŋɔ, “Berɛ la he haah be, á baɡle kɛ he dɛ nyinu. A lole kɛŋɔ baa bɛl dɛ nyinu te, kɛ bɛ an dawɛ. Nyinu ɡɛ men Korowii aa dɛ nyin Israel tena baa berɛ habɔɔ kpo mɛ, dɛ kpɔ daa nɔna aa hola kaa tɛ voɡa n ɡarɛ dɛɛ nyin ba la.”

² Anomanta, suuɡapoŋa fi dɛ anue, dɛ mea a tɔɡre aa ɛ kilore lafa fifraanuee n kpɔ ka lɛo.

³ Asɛ n ŋɔ o be ŋɔ, “Gel n ne he so la sie, bɛ jwamane bɔ kpa, bɛ baa bɛlbwa nyin kpa.”

⁴ Gɛɛ Israel tena ɛɛ ba soɡa biɡri baa wola kooro kɛɛ nomoa bɛlbwaa dɔ. Baa saraharee ɛ, dɛ paaɡe bwea dɛɛ duura, ba sɔfore aa batakaareborii do, baa voɡaa cheɡ dɛɛ toma kpa.

⁵ Tɔpere bɛl dɛ ba bala, ásɛ Israel tena berɛ ba Korowii baa dɛ tomɔ, ne kooro waa ɛ Kooro Devid naa be. Bochela nee baa ba Korowii be bala, ásɛ o swee andɛɛɡa tɛɛ ba.