Hosia 14 - mzwDBL

Hosia soŋe Israel tena ŋɔ bá berɛ ba Korowii be

¹ Israel tena, hé berɛ ba Korowii haa dɛ tomɔ be. He wechɔɡa ɡelɔ he choɡli!

² Hé ɡel ɡɛ waa nɔ ɛ he wesoŋa, dɛ́ berɛ ba Korowii be. Hé soŋo ŋɔ, “Kpɔ ya wechɔɡa bwa kɛ yaa, dɛ́ sune ya nɛɛ dɛ́ lɛ yaa, ásɛ ya kpɛɛre, ɡɛ yaa baɡɛ nyoa la.

³ Asiiria tena aa won lɛ yaa, ya jaɡre yaa dɛ la ane laa la aa won lɛ yaa. Yaa berɛ yerɛ kwaa ya ɡbabir aa kpɔ nɔɔra ɛ la, ya voɡa kpa, dɛkalkɛ hen Korowiirii dɔ tedoma tɛ bilalbii.”

⁴ Korowii ŋɔ, “Mɛɛ berɔ lawɛ n nɛra ba n be, dɛ́ nyin ba waa n bambile bwa ne, dɛkalkɛ n bandia toole ba nɛɛ kpa.

⁵ Mɛɛ ɛo kɛŋɔ bwaala waa nɛ harɛ waa hola ta, dɛ́ tɛ Israel tena, ásɛ ba do kɛŋɔ kpɔɡa fee ken. Dɛ so kɛŋɔ daa lune aa kaa harɛ bini ken, kɛŋɔ peleme daa aa lɔ Lɛbanɔn harɛ ta ken.

⁶ Baa kpeɡuu dɛ́ so le, ásɛ dɛ do wer kɛŋɔ ɔleve daa ken. Ba sɔɔh ɛɛ do somee kɛŋɔ Lɛbanɔn peleme daa ken.

⁷ Baa berɔ so ásɛ n kpɔ nɔn tɔ ba nɛ. Israel tena ɛɛ parɛ mea, ásɛ ba wobɛlbwa do wer kɛŋɔ ɡrepo daa aa dɛ nɔnɛ kohona la. Ba sɔn ɛɛ leo kɛŋɔ Lɛbanɔn harɛ ta sen ken.

⁸ Israel tena aa voɡaa tomɛ kpa. Mɛɛ no ba wesoŋaa ásɛ dɛ nyiŋi ba nɛ. N do kɛŋɔ daa waa wola chure ken, n chunchule ɛɛ tɔ ba nɛɛ, ba wer doe bwa le n be.”

⁹ Umee wejereme ɔ? Naate ɛɛ jemɛ waa nɔɔ. Umee dɛɛ pese waɔ? Naate ɛɛ no a munii. Korowii ŋwɛnɛre toɡrɔ, nɛra ba wa aa toɡra dɛ teŋɛ a ta, kɛ deŋnekpeɡ tena dɛ lɔ naa a ta.