Hosia 13 - mzwDBL

Korowii baah di Israel tena nɛ

¹ Efrem dea tena fa bol wa aa, Israel deene aa kaa la dɛ ɔmɛ, banee Israel tena ɛɛ duu. Kɛ Efrem dea tena tomɛ voɡ Baal, anomanta, baa serewoo.

² Ba ta teŋɔ dɛɛ ɛ wechɔɡa kohona, ba kpɔ ba suuɡapoŋa dɛɛ ɛ voɡa, ba ɛa a do wer kɛrɛdɛ, a bwa ɛ kwaa nɛra baa dɔ a wejema aa ɛa. Ba bol ɡɛ nɛra nɔ waa ŋɔ, “Ba kpoo nɛra dɛɛ ɛ saraha, dɛɛ mo voɡ baa ɛo kɛŋɔ nabale la lwɛɛma.”

³ A ɡɛ nomanta, baa nyoɡroo warane kɛŋɔ kɔɔla aa tɔa chɔɔbɔr, kɛŋɔ mɛn aa wola biɡri dɛ a leo la, kɛŋɔ haahra peu aa taa dɛ kpɔa le pɛla ta kaa la, dɛ do kɛŋɔ chuu aa kpɔ tokoro ta dɛɛ le.

⁴ Korowii ŋɔ, “Menee Korowii haa dɛ tom mɛ n lawɛ heyaa le Ijipt harɛ la. He bɛ voɡ bɛlbwa yarada ka ja n nɛ. Lɛɛ bɛlbwa toole ka ja n nɛ.

⁵ N nyiŋi he nɛɛ pua hɛŋle ɡbo harɛ ta, harɛ o ta aa do wɔrɔbe kohona.

⁶ Maa tɛ heyaa kondikwaa he di la, he vaɡrɔ, haa vaɡra la, he ɛ mbarafo asɛ dɛ soh n wa.

⁷ Anomanta, mɛɛ ba he nɛɛ kɛŋɔ nyujente ken, kɛŋɔ noniete waa pɛl ŋwɛnɛ nyoa dɛɛ nyin kon dɛ́ lawɛ.

⁸ Mɛɛ ba yo heyaa kɛŋɔ sisire bii aa nyoɡra wɛɛ ɛ la, dɛ́ ba peeɡe he bini. Dɛ́ di he ola buɡ la ta kɛŋɔ nyujente ken, dɛ́ toɡri he bini kɛŋɔ kpɔɡ bini olchɔɡa aa dɛ ɛ la.

⁹ Israel tena, he serewɔ, dɛkalkɛ he ɛ wechɔɡa dɛ jo n nɛ.

¹⁰ Hé ŋɔ ń tɛ heyaa kooro ne nomonome, asɛ n tɛ heya, kɛ ɛrɛɛ baa ba wona lɛ heya ɔ?

¹¹ Bandia nee n tɛ heyaa kooro, dɛ berɛ che bandia ta dɛ le o ne.

¹² Israel tena ɛ wechɔɡa dɛ di bolchɔɡe, ba chwera do tɔn bini dɛ kwaara cheɡ.

¹³ Ba nyu som kɛ baa dɔ bɔr dɛ́ so, kɛ dɛ ɡɛn dɛ vɛh waa la. Ba do kɛ bechala baa dɛ ba o lola waa wola bala nyin.

¹⁴ Mɛɛ lɛɛ ba le lalbɔɔ bini, dɛ́ lɛɛ ba le seo nyoa. Seo, leperaa he weechɔɡa dɔɔ jaɔ? Lalbɔɔ, leperaa chɔɡa haa dɛ ba yaa chɔɡa dɔɔ? Maa tedomaa dɔ tɛ he Israel tena,

¹⁵ a lole kɛŋɔ he wer he bala bini. Mɛɛ ɡeloo peuchɔɡe ta le wee leebɔr, dɛ́ ta le pua hɛŋle ɡbo harɛ ta. Nee aa won palɛ le neerare nyuune ta, ásɛ buli hweeh. Mɛɛ pa he kondɛɛɡaa le bela haa dɛ cheɡa la kaa.

¹⁶ Samaria tena chɛ kɛŋɔ ba bolchɔɡe ɡure ba nɛ, dɛkalkɛ ba ɛ men Korowii baa dɛ tom mɛ la deŋnekpeɡ. Laa taa baa ba ba kpoora, ásɛ dɛ kpɔ ba bechale cha harɛ dɛ́ ya ba tekpoŋra teene.”