Hosia 12 - mzwDBL

¹ Israel tena wobɛlbwa ɛ wepɛɛ dɛɛ chɔɡ wa tɔpere te bɛlbwa. Ba chwao dɛɛ ti nyosone, asɛ naɡrenyin we-ɛɛla ɡe su ba bwa. Ba ne Asiiria tena fɔwɛ fɔo, ba ne Ijipt tena ɛɛ di bona.

² Korowii ne Juda tena dɔɔ, wɛɛ tɛr Israel tena deŋnee ɡɛ ba wechɔɡa aa doa wa, dɛ́ bɔ ba kem ɡɛ ba we-ɛɛla aa doa.

³ Ba nabaa Jekɔb ta aa lɔ o nya tea bini la, dɛ o lawɛ o kpar dɔŋ Esɔ nalume baa vuuɡi dɔŋa. Waa baa kpeɡ la, o ne Korowii su luɡe.

⁴ Jekɔb ne nyundua torome su luɡe asɛ Jekɔb pɔ o nɛ, o wio dɛ soŋe nyundua torome la ŋɔ ó sweero andɛɛɡa. Korowii ba o be Bɛtel dɛ bol waa o be bela.

⁵ Korowii Waa Ɛ Kpeɡri Bwa Dɔɔ, Jekɔb ne o su luɡe la, o sɔnee Korowii, onee chɛ kɛ yá tomɛ.

⁶ Kɛ a chɛ kɛŋɔ Jekɔb naanar, hé berɛ ba Korowii haa dɛ tomɔ la be, hé kpoŋe nyina ne kasinteŋ, dɛɛ no o be saŋ bɛlbwa.

⁷ Korowii ŋɔ, “Kon-yoɡra kpɔ kwaa aa wola chɛɛ maɡɛ kwaa dɛɛ faah nɛra, ba sie dɛ lɛ nɛn faahra ta.

⁸ Israel tena dɛ ɛ mbarafo dɛ ŋɔ, ‘Ya dɔ suuɡa, dɛ ɛ dɔɔhna. Ya kondɔɔh bwa habɔɔ baa wechɔɡa bɛlbwa ya nɛɛ na.’

⁹ Menee Korowii haa dɛ tom mɛ n lawɛ heyaa le Ijipt harɛ ta la. Mɛɛ berɔɔ ɡel he so tɛnte deene bini ja, kɛŋɔ ɡɛ saŋ he fa aa soɡe a bini tɔpejena dii maa lea cheɡ ta la.

¹⁰ N bol waa keamere la be, dɛ ɡel ba na wepila taeh, dɛ che ba nɛɛ kpɔ sɛɡla bol waa he be dɛ ja heya.

¹¹ Ane a bwa, Gelead tena dɛ tomɛ voɡa. Banɔ la baa dɛ tomɛ voɡa la ɛɛ serewoo. Ba dɛ kpoo nabala dɛɛ ɛ saraha Gelɡal. Kwaa baa dɛ ɛ sarahare a ta la, ɛɛ chɔɡoo kɛŋɔ bwea aa dawɛ dɔŋa nɛɛ harɛ baa parɔ ta.”

¹² Ya nabaa Jekɔb chwao kaa Mɛsopoteemea harɛ ta. Waa dɛ nyin haah dɛ́ mo la, o kaa teɡɛ baa bɛl peera.

¹³ Korowii cheɡɛ o keame Mosis nɛɛ dɛ lawɛ Israel tena le Ijipt harɛ ta, dɛ ɡel o nyiŋi ba nɛ.

¹⁴ Kɛ Israel tena ɡelɔ o baah di kohona, Korowii baa dɛ tomɛ ɛɛ ɡeloo ba wechɔɡa ɡure ba nɛ, dɛ́ bɔ ba kem waa baa ɛa wa.