Hosia 11 - mzwDBL

Korowii nyina waa nyin Israel tena

¹ Korowii ŋɔ, “Israel fa aa do kɛ bechala la n nyinu, dɛ yerɔ le Ijipt harɛ ta kɛŋɔ n bie.

² Kɛ maa teŋa dɛɛ yerɔ la, dɛ ɡɛɛ o teŋɛ dɛ jo dɛɛ kaa. N nɛra kpoo kwaa tɛ voɡa Baalre, dɛ fuh daawiile a sɔɔh aa soma tɛ voɡa.

³ Menee chaɡle Israel tena ba jemɛ vala, dɛ laɡ ba n nɔɔra ne ba ir che, kɛ ba ta jemɛ kɛŋɔ menee nyiŋi ba nɛ.

⁴ Nyinaa n kpɔ laɡ ba ba n be, dɛ kpɔ ba chwaa. N laa koeh aa dawɛ ba nɛɛ la kpɔ, asɛ dɛ ba harɛ dɛ pa ba kondikwa.

⁵ Ba vɛh ba liire chara dɛ́ ba n be, anomanta, a chɛ kɛ bá berɛ kaa Ijipt harɛ ta, dɛ́ ka do Asiiria tena lɔɡa.

⁶ Ba dɔma ɛɛ ba yoo ba laa ba bwɛjena taa, ásɛ dɛ kuuɡi bune baa kpɔa kaɡre ba doonyoo, á ɡel waa baa dɛ vɔrɔwe bwa ba a jaɡa.

⁷ N nɛra siwi beɡrɔ kɛ bá berɛ habɔɔ kpo mɛ. Baa wiu, dɛkalkɛ wejena dawɛ ba nɛ, kɛ nomɛlbwa aa laa kpɔ ba nɛ.

⁸ Israel tena, ɛrɛɛ mɛɛ ba wona ɡel heya ɔ? Ɛrɛɛ mɛɛ ba wona le heyaa tɛɔ? Mɛɛ won chɔɡ heyaa kɛŋɔ Adma tena aa? Ɛrɛɛ mɛɛ ba wona chɔɡ heyaa kɛŋɔ Seboiim tena ɔ? N liire aa men ɡɛ baɡle, nyina maa dɛ nyin heyaa la kan taeh.

⁹ Maa n bandia kohona laanee kpɔ ba tɛr he deŋne, kɛɛ dɛ́ berɛ ba chɔɡ heyaa kpa. Korowiirii men, nɛwɛnyini laa men. N ɡboo Korowii Maa Do Goroŋ dɛ do he baah ta, maa n bandia ne he bee ba.

¹⁰ Dɛ n kɔr n nɛra dɔma nɛɛ kɛŋɔ nyujente aa, baa teŋɛ n nɛɛ. Baa le wee cholibɔree dɛ́ ba n be warane.

¹¹ Baa kpɔ bochelaa dɛ́ ba kɛŋɔ Ijipt harɛ ta jumbii ken, kɛŋɔ Asiiria harɛ ta kwehre ken. Mɛɛ kpɔ baa ba so ba deremi ta ja. Men Korowiirii bola.”

Israel tena wechɔɡa

¹² Korowii ŋɔ, “Nyosone ɡboo Israel tena teŋe dɛɛ tɛ mɛ, tɔpere bwaa baa neɡ mɛ. Juda tena ta dɛ ɛɛ mɛ deŋnekpeɡ, men Korowii Maa Do Goroŋ dɛ dɔ kasinteŋ la.”